سرینگر//وزیر اعلیٰ محبوبہ مفتی نے ریاست میں سیاحتی صنعت سے جڑے تمام متعلقین سے اپیل کی ہے کہ وہ چند قومی میڈیا اداروں کی جانب سے ریاست سے متعلق منفی تاثرات پیدا کرنے کے عمل کو دورکرنے کی خاطر مل جل کام کریں تاکہ اس صنعت کے احیائے نو کو یقینی بنایا جاسکے۔یہاں سیاحتی مشاورتی بورڈ دوسر ی میٹنگ کی صدارت کرتے ہوئے وزیر اعلیٰ نے کہا کہ وقت کی ضرورت ہے کہ ریاست کی سیر پر آنے والے سیاحوں ،جو ریاست سے متعلق منفی پروپیگنڈہ کا شکا ر ہوئے ہیں ،کو یہاں کی اصل صورتحال کے بارے میں آگاہ کیا جائے ۔وزیر اعلیٰ نے کہاکہ انہوںنے ہمیشہ یہ بات کہی ہے کہ عوام سے عوام تک تعلقا ت کو مزید مستحکم بنانے کے لئے سیاحت ایک اہم وسیلہ ہے اورقومی سیاح اس سلسلے میں ایک اہم رول ادا کرسکتے ہیں۔میٹنگ میں بورڈ کے تمام ممبران بشمول سیاحت کی وزیر مملکت پریا سیٹھی ، سابق مرکزی سیکرٹری برائے سیاحت پرویز دیوان ،گورنر کے پرنسپل سیکرٹری اور آئی ٹی ڈی سی کے سابق چیئرمین و ایم ڈی امنگ نرولہ ، سیکرٹری سیاحت فاروق احمد شاہ ، وائس چیئرمین جے کے ٹی ڈی سی رفیع احمد میر اور نیشنل مونومنٹس اتھارٹی آف انڈیا کے ممبر محمد سلیم بیگ بھی موجود تھے۔وزیر اعلیٰ نے سیاحت سے جڑے افراد پر زور دیا کہ وہ ریاست میں سیاحوں کی آمد میں اضافہ کرنے کے لئے اپنا اثرو رسوخ استعمال کریں۔انہوںنے کہاکہ کانفرنس ٹورازم کو بھی فروغ دیا جاسکتا ہے ۔اس سلسلے میں انہوں نے محکمہ سیاحت کو بنیادی رول ادا کرنے کی تلقین کی۔وزیر اعلیٰ نے کہا کہ کشمیر میں مذہبی سیاحت کو ابھی تک مطلوبہ فروغ نہیں دیا جاچکا ہے ۔انہوں نے مذہبی سیاحت کے خواہشمند سیاحوں کی تعداد بڑھانے کے لئے تمام قدیم مساجد ، خانقاہوں اور عباد ت گاہوں کو اس نقشے پر لانے کی تلقین کی۔میٹنگ کے دوران بورڈ ممبران نے بورڈ کی گزشتہ دو برس کی کارکردگی پر بھی تبادلہ خیال کیا۔ میٹنگ میں بتایا گیا کہ محکمہ سیاحت نے گزشت برس تقریبا ً 15روڑ شوز منعقد کئے ۔میٹنگ میںمزید بتایا گیا کہ ریاست میں سیاحت کو مزید فروغ دینے کے لئے جموں وکشمیر بینک اپنا دست تعاون دے رہا ہے۔میٹنگ میں ناظم سیاحت کشمیر محمود احمد شاہ،للت گروپ آف ہوٹلز کی چیئرپرسن ڈاکٹر جیوتسنا سوری ،احد گروپ آف ہوٹلز کے مشتاق احمد برزہ ، گرینڈ ممتاز گروپ کے مشتاق احمد چایا، خیبر رزاٹس کے عمر ترنبو ، کے سی ریذیڈنسی کے بھارت چودھری ، ٹی اے ایس کے کے صدر محمد ابراہیم ، ہوٹل ایشیا ء کے ہردیپ سنگھ آنند ، ہاوس بوٹ اونرس ایسو سی ایشن کے صدرغلام رسول اور سی آئی آئی کے ممبر راہل چودھری کے علاوہ بورڈ کے دیگر ممبران نے بھی شرکت کی۔
سیاحتی مشاورتی بورڈ کی دوسری میٹنگ منعقد
