جموں//صوبہ جموں کے مختلف اضلاع وجموں شہر کے مختلف علاقوں میں شدت کے گرمی کے دنوں میں بجلی کے بحران کی وجہ سے لوگوں کوسخت پریشانیوں کاسامناکرناپڑرہاہے۔
بشناہ
اس سلسلے میں بشناہ کے لوگوں نے پانی کی عدم دستیابی کے معاملے کولے کر مظاہرہ کرتے ہوئے بڑی براہمناں سڑک کوآمدورفت کیلئے بندکیا۔ اس دوران مظاہرین نے حکومت مخالف نعرے بازی کرتے ہوئے ٹرانسفارمروں کی فوری مرمت کرکے علاقے میں بجلی سپلائی بحال کرنے کامطالبہ کیا۔اس موقعہ پر مظاہرین نے الزام لگایاکہ گذشتہ کچھ دنوں سے بشناہ میں بجلی بندہے جس کی وجہ سے شدت کی گرمی میں لوگوں کاجینادوبھرہوگیاہے لیکن محکمہ بجلی کی جانب سے بجلی سپلائی کوبحال کرنے کیلئے کوئی اقدامات نہیں اٹھائے گئے ہیں۔انہوں نے کہاکہ بجلی اکثررات کے وقت بندکی جاتی ہے جس کی وجہ سے لوگوں کی نیندیں حرام ہوجاتی ہیں اوروہ دن کوبھی کام نہیں کرسکتے ہیں۔انہوں نے کہاکہ ہرروز محکمہ بجلی کے خلاف کہیں نہ کہیں احتجاج ہوتاہے لیکن ریاستی نائب وزیراعلیٰ اور وزیربجلی ڈاکٹرنرمل سنگھ غفلت کی نیندمیں سوئے ہوئے ہیں۔مظاہرین نے کہاکہ ڈاکٹرنرمل سنگھ ودیگروزراء ٹھنڈے اے سی کمروں میں آرام فرمارہے ہیں اورعوام گرمی جھیلنے پرمجبورہیں۔انہوں نے کہاکہ محکمہ پی ڈی ڈی کے اہلکاران کوکئی دنوں سے بتایاجارہاہے لیکن وہ ایک دن بہانہ لگاتے ہیں کہ ارکان کمپنی کے لوگ پول وتاریں لگارہے ہیں اورجب دوسرے روزپوچھاجاتاہے تووہ کوئی دوسرابہانہ لگاتے ہیں جوکہ افسوس کی بات ہے۔انہوں نے کہاکہ محکمہ بجلی کے اہلکاران باربار بجلی کی کٹوتی کرتے ہیں ۔انہوں نے ایم ایل اے بشناہ پر غیرسنجیدگی برتنے کابھی الزام لگایا۔انہوں نے انتظامیہ سے فوری طورپربجلی سپلائی بحال کرنے کامطالبہ کیا۔
بھورکیمپ
بجلی اور پینے کے پانی کی کمی کو لیکر بھور کیمپ، بھور پنڈ اور بھور کلیاں کے کے لوگوں نے بطور احتجاج کرن باغ کے مقام پر دھرنا دے کر آرایس پورہ۔جموںشاہراہ پر قریباچار گھنٹے تک گاڑیوں کی آمد رفت بند رکھی۔مظاہرین نائب وزیر اعلیٰ کے خلاف نعرے بلند کر رہے تھے ۔ ان علاقوں کے لوگوں کا کہنا ہے کہ یہاں بجلیزیادہ تر بند ہی رہتی ہے جس کے نتیجہ میں پانی کی سپلائی بھی متاثر ہو رہی ہے۔اور گرمیوں کے اس موسم میں ان کی زندگی کسی عذاب سے کم نہیں۔ سابق وزیر و کانگرس کے لیڈرنے بھی اس موقعہ پر مظاہرین کی حمایت میں آئے اور کہا کہ پی ڈی پی ۔بی جے پی ریاستی عوام کو بنیادی سہولیات فراہم کر نے میں بری طرح سے ناکام ہوچکی ہیں۔مظاہرین نے ریاستی سرکار اور جموں خطہ کے ممبران اسمبلی اور ممبران قانون سازکونسل کے خلاف زور دار احتجاج اور نعرے بازی کی۔
کٹھوعہ
علاوہ ازیں کٹھوعہ ضلع کے راج باغ علاقہ میں لوگوں نے بجلی اورپانی کی عدم دستیابی اوربجلی کی باربارکٹوتی کے معاملے کو لے کر محکمہ بجلی اورپی ایچ ای کیخلاف زوردارنعرے بازی کی۔ تفصیلات کے مطابق راج باغ علاقہ کے لوگ سوموارصبح جموں ۔پٹھانکوٹ ہائی وے پرجمع ہوئے جہاں پرانہوں نے پانی اوربجلی کی عدم دستیابی کے معاملے کولے کرانتظامیہ کیخلاف نعرے بازی کی۔اس مظاہرے کی وجہ سے لگ بھگ تین گھنٹوں تک آمدورفت بھی مسدودرہا۔اس موقعہ پر مظاہرین نے الزام لگایاکہ شدت کی گرمی کے موسم میں بھی محکمہ پی ایچ ای اور بجلی کے اہلکاران اپنی ذمہ داریاں انجام دینے سے قاصر ہیں ۔انہوں نے کہاکہ علاقہ کاٹرانسفارمر جلے ہوئے دس دن گذرچکے ہیں لیکن ابھی تک محکمہ نے نہ اس کی مرمت کرائی اورنہ ہی کوئی متباد ل انتظامات کئے جوکہ لوگوں کے ساتھ سراسرناانصافی ہے۔ بعدازاں محکمہ بجلی کے عہدیداران موقعہ پرپہنچے اور سراپااحتجاج لوگوں کویقین دہانی کرائی کہ جلد ہی ٹرانسفارمروں کی مرمت کرکے بجلی سپلائی بحال کی جائے گی۔
