شاندار کامیابی کی بدولت اے ٹی پی رینکنگ میںفیڈرر تیسرے نمبر پر پہنچ گئے

نئی دہلی/ریکارڈ آٹھواں ومبلڈن اور 19 واں گرینڈ سلیم ٹائٹل جیتنے والے سوئٹزرلینڈ کے راجر فیڈرر اپنی اس شاندار کامیابی کی بدولت پیر کو جاری تازہ اے ٹی پی رینکنگ میں دو مقام کی چھلانگ لگا کر تیسرے نمبر پر پہنچ گئے ہیں۔فیڈرر نے اس کے ساتھ ہی نومبر میں لندن میں ہونے والے اے ٹی پی ورلڈ ٹور فائنلس کیلئے ریکارڈ 15 ویں بار کوالیفائی کر لیا ہے ۔فیڈرر نے کروشیا کے مارن سلچ کو مسلسل تین سیٹ میں شکست دے کر ریکارڈ آٹھویں بار ومبلڈن ٹائٹل اپنے نام کیا۔اس خطاب سے وہ 15 اگست 2016 کے بعد پہلی بار ٹاپ تین میں لوٹ آئے ہیں۔یہ اس سیزن کا ان کا پانچواں خطاب اور 19 واں گرینڈ سلیم خطاب تھا جس کی بدولت انہوں نے اس سال کا اختتام نمبر ایک کے طور پر کرنے کے اپنے امکانات روشن کرلئے ہیں۔اس دوران اے ٹی پی نے اعلان کیا کہ فیڈرر نے 12 سے 19 نومبر تک لندن میں ہونے والے اے ٹی پی فائنلس کیلئے ریکارڈ 15 ویں بار کوالیفائی کر لیا ہے ۔فیڈرر 11 مہینوں میں پہلی بار سرفہرست تین کھلاڑیوں میں شامل ہوئے ہیں۔فیڈرر گزشتہ سال 22 اگست کو تیسرے سے چوتھے نمبر پر پھسسل گئے تھے اور پھر چوٹ کی وجہ سے باقی سیزن میں نہیں کھیل پائے تھے جس سے ان کی رینکنگ گر کر 17 تک پہنچ گئی تھی۔ لیکن جنوری میں آسٹریلین اوپن جیت کر وہ ٹاپ ٹین میں لوٹ آئے تھے ۔کلے کورٹ سیزن سے ہٹنے کی وجہ سے وہ چوتھے سے پانچویں مقام پر کھسک گئے تھے ۔لیکن 19 ویں گرینڈ سلیم ٹائٹل کے بعد وہ اب تیسرے نمبر پر پہنچ گئے ہیں۔سوئس ماسٹر فیڈرر اب دوسرے مقام پر موجود اسپین کے رافیل نڈال سے 920 پوائنٹس دور اور نمبر ایک کھلاڑی برطانیہ کے اینڈی مرے سے 1205 پوائنٹس دور ہیں۔مرے کے پاس باقی سیزن میں نمبر ایک جگہ بچانے کا کم ہی موقع رہے گا کیونکہ ومبلڈن کے بعد انہیں 5460 پوائنٹس کا دفاع کرنا ہے جبکہ نڈال کو 370 پوائنٹس بچانے ہیں۔فیڈرر کو باقی سیزن میں کوئی پوائنٹس نہیں بچانے ہیں۔سب سے زیادہ 302 ہفتے نمبر ایک پر رہنے کا ریکارڈ اپنے نام رکھنے والے فیڈرر آخری بار نومبر 2012 کے پہلے ہفتے میں نمبر ایک رہے تھے ۔سلچ اگر خطاب جیتتے تو وہ پہلی بار ٹاپ پانچ میں پہنچ جاتے ۔لیکن تازہ رینکنگ میں وہ چھٹے نمبر پر ہیں۔مرے کے 7750 پوائنٹس ہیں جبکہ نڈال کے 7465 پوائنٹس ہیں۔جوکووچ 6325 پوائنٹس کے ساتھ چوتھے نمبر پر برقرار ہیں۔ اسٹنسلاس واورنکا دو مقام گر کر پانچویں نمبر پر کھسک گئے ہیں۔خاتون چمپئن بنیں اسپین کی گربان مگروجا نے 10 مقام کی لمبی چھلانگ لگائی ہے اور پانچویں نمبر پر پہنچ گئی ہیں۔جمہوریہ چیک کی کیرولینا پلسکووا دو مقام کی بہتری کے ساتھ نمبر ایک بن گئی ہیں جبکہ جرمنی کی انجلک کربر دو مقام گر کر تیسرے نمبر پر پہنچ گئی ہیں۔رومانیہ کی سمونا ہالیپ کا دوسرا مقام برقرار ہے ۔فائنل میں ہاری امریکہ کی وینس ولیمز دو مقام کی بہتری کے ساتھ ٹاپ 10 میں واپس آئی ہیں اور اب وہ نویں نمبر پر ہیں۔سیمی فائنل میں ہارنے والی برطانیہ کی جوھانا کونٹا تین مقام کی بہتری کے ساتھ اب چوتھے نمبر پر آ گئی ہیں۔