ڈوڈہ//بٹوت کشتواڑ قومی شاہراہ پر پل ڈوڈہ کے قریب ایک ٹاٹا سومو کو پیش آئے ایک المناک حادثہ میں تین افراد کے دریا برد ہونے کی اطلاعات ہیں۔تفصیلات فراہم کرتے ہوئے ایس ایس پی ڈوڈہ محمد شبیر نے کشمیر عظمیٰ کو بتایا کہ چرالا سے ڈوڈہ کی طرف جا رہی ایک ٹاٹا سوموزیرِ نمبر JK06/5074پل ڈوڈہ سے گیارہ کلومیٹر کی دوری پر واقع گڑسو کے مقام پر ڈرائیور کے قابو سے باہر ہو گئی اور شاہراہ سے لڑھک کر سیدھے دریائے چناب میں جا گری اور اُس میں سوار ڈرائیور اور گاڑی کے مالک سمیت تین افراد غرقاب ہو گئے۔ڈرائیور کی شناخت روی کمار ولدِ روشن لال ساکنہ چرالا اور گاڑی کے مالک کی اشتیاق احمد ولدِ منظور احمد ساکنہ چرالا جو پیشے کے لحاظ سے ایک اسکول ٹیچر تھے،کے بطور ہوئی ہے جب کہ تیسرے شخص کو تا حال شناخت نہیں کیا جا سکا ہے۔ حادثے کی خبر سُنتے ہی پولیس،فوج،چناب بچائو کاری ٹیم کے رضا کار اور لوگوں کی بھاری تعداد جائے حادثہ پر پہنچی اور غرقاب ہونے والوں کی تلاش شروع کر دی مگر شام دیر گئے تک کوئی کامیابی نہیں مل سکی۔یہ حادثہ شام کے پونے چھ بجے کے قریب پیش آیا اور چھ بجے تک ریسکیو آپریشن شروع کر دیا گیا تھا مگر دریا کے تیز بہائو میں کے سامنے سب بے بس نظر آ رہے تھے۔بتایا جاتا ہے کہ گاڑی میں چار افراد سوار تھے جن میں سے ایک سوئی گواڑی کے مقام پر اُتر گیا تھا۔ضلع ترقیاتی کمشنر ڈوڈہ بھوپندر کمار اور ایس ایس پی ڈوڈہ محمد شبیر نے جائے حادثہ پر پہنچ کر بچائو کاروائی کی براہِ راست نگرانی کی۔ایس ایس پی نے کہا کہ اندھیرا چھا جانے کے ساتھ ہی ریسکیو آپریشن صبح تک کے لئے روک دیا گیا ہے اور صبح سات بجے غرقاب ہونے والوں کی تلاش دوبارہ شروع کی جائے گی۔
بٹوت کشتواڑ شاہراہ پر حادثہ ، 2افراد لقمۂ اجل
