پنچکولہ(ہریانہ) //مرکزی جانچ بیورو (سی بی آئی) کی خصوصی عدالت نے یہاں تقریباً 15برس پرانے سرخیوں میں رہنے والے سادھوی عصمت دری معاملے میں سرسا میں واقع ڈیرہ سچا سودا کے سربراہ گرمیت رام رحیم سنگھ کو قصوروار قرار دیا ہے ۔ عدالت اس معاملے میں سزا کا اعلان 28 اگست کو کرے گی۔ رام رحیم کو سادھوی عصمت دری معاملے میں قصوروار ٹھہرائے جانے کے فیصلے کے بعد ڈیرہ حامی تشدد پر اتر گئے اور انہوں نے ہریانہ، پنجاب، دہلی اور اتر پردیش میںجم کر توڑ پھوڑ اور آتشزنی کی ۔ پر تشدد واقعات میں رات گئے تک 31لوگوں کی موت ہوگئی تھی اور بڑی تعداد میں لوگ زخمی ہوگئے تھے ۔ ان میں صرف پنچکولہ میں29لوگ مارے گئے جبکہ250سے زائد زخمی ہوئے۔حالات پر قابو پانے کیلئے ہریانہ میں فوج کی چھ ٹکڑیاں تعینات کی گئی ہیںجبکہ مرکز نے فوری طور پر سی آر پی ایف کی 123کمپنیاں روانہ کردی ہیں۔ ہریانہ اور پنجاب کے کئی علاقوں میں حالات بے قابو ہوتے دیکھ کر کرفیو لگا دیا گیا ہے ۔ہریانہ کے پنچکولہ اور سرسا اور پنجاب کے پٹیالہ، بٹھنڈہ، مانسا، ملوٹ اور فیروز پور شہروں میں تشدد بھڑکنے کے بعد کرفیو لگا دیا گیا ہے ۔ہریانہ سے متصل دہلی اور غازی آباد میں بھی بابا حامیوں نے تشدد برپا کیا۔ آنند وہار ریلوے اسٹیشن پر ریوا ایکسپریس کو دو خالی ڈبوں کو آگ کے حوالے کردیا گیا۔ کئی بسوں کو بھی آگ لگانے کی اطلاع ہے ۔شمالی ریلوے کے ترجمان نیرج شرما نے بتایا کہ آنند وہار ریلوے اسٹیشن پر ریوا ایکسپریس کے دو خالی ڈبوں کو آگ لگادی گئی۔ انہوں نے بتایا کہ دارالحکومت کے سبھی ریلوے اسٹیشنوں پر سیکورٹی انتظامات سخت کردئے گئے ہیں ۔جہاں گیر پوری کے بابو جگ جیون رام اسپتال کے قریب ایک بس میں آگ لگانے کی اطلاع ہے ۔دارالحکومت سے ملحق اترپردیش کے ضلع غازی آباد میں بھی دو لوگوں نے ایک بس کو ندر آتش کردیا۔ ۔شمال مشرقی دہلی کے نند نگری علاقہ میں منڈولی فلائی اوور کے پاس بھی آگ زنی کی اطلاع ہے ۔اس دوران جموں سے ٹرین سروس بند کردی گئی تھی جبکہ پنجاب اور ہریانہ میں کے کئی شہروں میں ریل سروس بند کردی گئی تھی اور گاڑیاں بھی نہیں چل رہی تھیں۔واضح رہے کہ عدالت کا فیصلہ سنانے کے وقت ڈیرہ سربراہ ہاتھ جوڑے کٹہرے میں کھڑے تھے ۔ ان کی نظریں نیچے تھیں۔ فیصلہ سنائے جانے کے بعد پولیس نے ڈیرہ سربراہ کو حراست میں لے لیا اور فوراً عدالت کے احاطے سے نکل گئی۔ڈیرہ سربراہ کو انبالہ سنٹرل جیل لے جایا گیا ہے ، جہاں انہیں رکھنے کی پوری تیاریاں کی جا چکی ہیں۔ پوری جیل کو چھاونی میں تبدیل کردیا گیا ہے ۔ڈیرہ سربراہ عدالت میں پیش ہونے کیلئے صبح تقریباً سوا نو بجے سرسا سے سڑک کے راستے پنچکولہ کیلئے روانہ ہوئے ۔ تقریباً دو بجے وہ عدالت کے احاطہ میں پہنچے ۔ عدالت کے احاطہ کی سیڑھیاں چڑھتے ہوئے ان کے چہرے پر ہوائیاں اڑ رہی تھیں حالانکہ اس کے ساتھ چل رہے ان کے معاون انہیں حوصلہ دے رہے تھے ۔جسٹس جگدیش سنگھ نے بعد دوپہر تقریباً اڈھائی بجے عدالتی کارروائی شروع کی اور تقریباً دو بج کر 50 منٹ تک اپنا فیصلہ پڑھ لیا۔عدالت کا فیصلہ آنے کے بعد پنچکولہ میں ڈیرہ عقیدتمند بھڑک گئے اور انہوں نے وہاں لگائی گئی رکاوٹوں کو توڑ دیا اور کوریج کیلئے موجود کئی نیوز چینلوں کی او بی وین پر حملے اور پتھراؤ کرکے انہیں نذر آتش کیا۔ کالکا اور منسا دیوی نے سڑکوں پر موجود ڈیرہ عقیدت مند بھی پرتشدد ہوگئے اور دو گاڑیوں کو آگ لگا دی۔ پولیس نے ہجوم کو منتشر کرنے کیلئے کئی جگہوں پر آنسو گیس کے گولے چھوڑے لیکن اس کا ان پر اثر نہیں ہوا۔پنجاب کے مکتسر میں ڈیرہ حامیوں نے ملوٹ ریلوے اسٹیشن کو آگ لگانے کی کوشش کی۔ ریاست کے دیگر علاقوں میں ان کی پولیس کے ساتھ جھڑپیں ہونے کی اطلاع ہے ۔ہریانہ کے سرسا شہر میں فوج بھی پہنچ چکی ہے اور وہاں سناٹا پھیل گیا ہے ۔ سرسا میں کل رات سے ہی اگلے حکم تک کرفیو نافذ کردی گئی ہے ۔ سرسا میں ہی گرمیت رام رحیم کا ڈیرہ سچا سودا ہے ۔
رام رحیم سنگھ کیخلاف فیصلے پر تشدد بھڑک اُٹھا، ہریانہ اور پنجاب میں31ہلاک
