محکمہ سیاحت کاچننئی میں سمینار

 چننئی//سیاحت کی وزیر مملکت پریاسیٹھی نے ساوتھ انڈیا کے لوگو ں کو جموں وکشمیر آنے کی دعوت دیتے ہوئے کہا کہ ریاست مہمانوں اور سیاحوں کو ہر طرح کی سہولیات فراہم کرنے کے لئے تیار ہے۔انہوں نے کاروباری لوگوں ، سیر و تفریح کے سلسلے میں لوگوں کو جموں و کشمیر آنے کی دعوت دی۔ وزیر محکمہ سیاحت اور جے اینڈ کے ٹوراِزم الائنس کے اشتراک سے منعقدہ ایک سمینار اور پریس میٹ سے خطاب کر رہی تھی۔ سمینار کے دوران کئی روڑ شوز کا اہتمام کیا جارہاہے تاکہ ساوتھ انڈیا سے سیاحوں کو جموں وکشمیر آنے کے لئے راغب کیا جاسکے گا۔ جموں وکشمیر اور تال ناڈو کے درمیان سیاحتی رابطوں کو مضبوط بنانے کا خیر مقدم کرتے ہوئے پریا سیٹھی نے کہا کہ ” ایک بھارت شریشٹھ بھارت“ پروگرام کے تحت قومی سیاحت کو فروغ دیا جاسکتا ہے ۔انہوںنے کارپوریٹ ہاوسز کو جموں وکشمیر میں کنونشن اور میٹنگیں منعقد کرنے کی دعوت دی۔ اس موقعہ پر سیاحت کے سیکرٹری سرمد حفیظ نے جموں و کشمیر ٹوراِزم پروڈکٹس کے بارے میں خدو خال پیش کیا۔ انہوں نے حالیہ نیشنل کرائم ریکارڈس بیورو کا رِپورٹ جاری کرنے کا ذکرکرتے ہوئے کہا کہ سیاحوں کے خلاف جموں وکشمیر میں کسی بھی طرح کا کرائم آج تک رپورٹ نہیں ہوا ہے۔ انہوںنے کہا کہ ریاست جموں وکشمیر میں پری محل ، قلعہ ہاری پربت ، تین ہزار سال پرانے برزہ ہامہ آثارِ قدیمہ ، مبارک منڈی ، شنکر آچاریہ مندر ، نارا ئین ناگ مندر ،چرارِ شریف،مخدوم صاحب ؒ، عیشمقام ، خانقاہ معلی دیگر تاریخی و سیاحتی مقامات موجود ہیںجہاں سیاحوں کی دلچسپی کے لئے کافی خوبصورتی موجود ہے۔ سیکرٹری ٹورازم جو جموں و کشمیر ٹورازم ڈیولپمنٹ کارپوریشن کے منیجنگ ڈائریکٹر بھی ہیں نے کہاکہ انہوںنے پوری ریاست میں سیاحو ں کی سہولیت کے لئے رہائشی مقامات پر 50فیصد رعایت کا اعلان کیا۔ انہوںنے کہا کہ ہوٹیلرس اور ہوٹل ایسو سی ایشنوں نے خصوصی رعایت کا اعلان کیا ہے جو کشمیر کے لئے ہولی ڈے پیکیجز کے دوران فراہم کی جائے گی۔ ناظم سیاحت کشمیر محمود احمد شاہ ، ڈپٹی ڈائریکٹر ٹوراِزم کشمیر پیر زادہ ظہور ، جی ایم اوپریشنز دلی ہاٹ سی بی کول نے بھی اس موقعہ پر خطاب کیا۔ کمشنر ٹورازم تامل ناڈو پلنی کمار ، پریذیڈنٹ ٹریول ایجنٹس ایسو سی ایشن آف انڈی سنیل کمار اور چیئرمین سودرن چپٹر ٹی اے اے آئی شہل اس موقعہ پر موجودتھے۔