اتراکھنڈ انو یٹمنٹ کانفرنس کا اہتمام

دہرہ دون//وزیراعظم نریندر مودی نے ملک کی صحت مند ترقی کے لئے ریاستوں کے درمیان صنعتی مقابلہ آرائی کو اہم قرار دیتے ہوئے کہا کہ اس سے نہ صرف 'میک ان انڈیا' کا خواب شرمندہ تعبیر ہوگا بلکہ تیزی سے بڑھتی ہوئی معیشت دنیا کے سامنے اور مضبوطی کے ساتھ نکھر کر سامنے آئے گی۔مسٹر مودی نے اتراکھنڈ کی راجدھانی دہرہ دون میں اتوار کو ریاست کی پہلی اتراکھنڈ انویسمنٹ کانفرنس کو خطاب کرتے ہوئے کہا کہ 'میک ان انڈیا' صرف ہندوستان کے لئے ہی نہیں بلکہ پوری دنیا کے لئے ہے ۔ ملک میں سرمایہ کاری کے لئے سب سے شاندار ماحول تیار کیا گیا ہے اوراس کی وجہ سے ہندوستان ہر شعبہ میں دنیا کا منوفیکچرنگ ہب بن سکتا ہے ۔ ملک میں موبائل بنانے والی دنیا کی سب سے بڑی فیکٹری قائم کی گئی ہے ۔انہوںنے کہا کہ ہندوستان دنیا کے سرمایہ کاروں کے لئے توجہ کا مرکزبن رہا ہے اوراس کی وجہ یہاں کاروبار میں آسانی پیدا کرنے کے لئے اٹھائے گئے اقدامات ہیں۔ تجارت کو آسان بنانے کی وجہ سے ہندوستانی حکومت کو پوری دنیا میں پہچان ملی ہے اور اسی کا نتیجہ ہے کہ ہندوستان کی رینکنگ میں 42 پوائنٹ کی بہتری آئی ہے ۔وزیراعظم نے کہا کہ حکومت نے تجارت کو آسان بنانے کے لئے جواقدامات کئے ہیں ان میں 1400 سے زیادہ پرانے قوانین کو ختم کیا گیا ہے ۔ ٹیکس کے زمرے میں بڑے پیمانے پر اصلاحات کی گئیں ہیں اور گڈس اینڈ سروسز ٹیکس (جی ایس ٹی) کی شکل میں ملک میں ایک طرح کے ٹیکس کے نظام کو نافذ کیا گیا ہے ۔ اس طرح کے انقلابی اقدامات آزادی کے بعد پہلی بار شروع کئے گئے ہیں جس سے نہ صرف ٹیکس سسٹم سہل ہوگیا ہے بلکہ ٹیکس میں اضافے میں یہ معاون ثابت ہورہا ہے ۔مسٹر مودی نے کہا کہ اتراکھنڈ کی ترقی پٹری پر تیزی سے آگے دوڑ رہی ہے ۔ ریاست میں ترقی کی رفتار کو دیکھتے ہوئے انہوںنے صنعت کاروں سے اتراکھنڈ میں بڑے پیمانے پر سرمایہ کاری کی دعوت دی ہے اور کہا کہ یہ ملک اب تیزی سے ترقی کی جانب گامزن ریاست ہے اور یہاں سرمایہ کاری کے بہت زیادہ امکانات ہیں۔ ریاست میں سیاحت کے شعبے میں سب سے زیادہ امکانات ہیں اور اس سمت میں نئے طریقے سے سرمایہ کاری کی جاسکتی ہے ۔انہوںنے کہا کہ اتراکھنڈ حکومت کے ساتھ 'سرمایہ کاری کانفرنس' میں جاپان معاون ملک ہے ۔ انہوں نے اسے ایک اچھی صورت حال بتاتے ہوئے کہا کہ یہ اچھی بات ہے کہ ہماری ریاستوں میں دنیا کے کے چھوٹے چھوٹے ممالک کی طرح خود کو آگے بڑھنے کی اہلیت ہے ۔ اتراکھنڈ نے اپنی ان صلاحیتوں کا مظاہرہ جاپان کو معاون حکومت بناکر کیا گیا ہے ۔ انہوںنے امید ظاہر کی کہ ملک کی ہر ریاست میں صحت کی صنعت میں باہمی مقابلہ آرائی میں تیزی آئے گی اور ہمارے نیو انڈیا اور میک ان انڈیا کا خواب شرمندہ تعبیر ہوسکے گا۔مسٹر مودی نے اتراکھنڈ کو روحانی ماحولیات کے شعبے کے لئے مثالی ریاست قرار دیا اور کہا کہ یہاں کی آب وہوا اور فضا اتراکھنڈ کی طاقت ہے اور اس کا بھرپور استعمال کئے جانے کی ضرورت ہے ۔ اسی طرح کے حالات کو دھیان میں رکھتے ہوئے یہاں چار دھاموں کو منسلک کرنے کے لئے ہر موسم میں ان دھاموں تک پہنچنے والی سڑکوں کی تعمیر کی جارہی ہے ۔