رائے بریلی//مغربی بنگال کے مالدا ٹاؤن سے دلی جنکشن جانے والی 14003 نیو فرخا ایکسپریس ٹرین کے انجن اور 9 کوچ آج صبح اترپردیش میں رائے بریلی کے نزدیک ہرچند پور اسٹیشن پر پٹری سے اتر گئے جس کے سبب کم از کم چھ افراد کی موت جبکہ 21 دیگر زخمی ہوگئے ہیں جن میں سے 6 کی حالت نازک ہے ۔ موصولہ اطاعات کے مطابق فرخا ایکسپریس اترپردیش کی راجدھانی لکھنٔو سے 65 کلومیٹر دور ہرچند پور اسٹیشن کے آؤٹر پر غلط ٹریک پر چلے جانے کی وجہ سے صبح تقریباً چھ بجکر 5 منٹ پر حادثے کا شکار ہوگئی۔ اس دوران اس کے انجن اور 9 ڈبے پٹری سے اتر گئے جس میں کم از کم چھ مسافروں کی موت اور 21 دیگر زخمی ہوگئے ۔ زخمیوں میں سے 6 کی حالت نازک ہے ۔ اطلاع ملتے ہی ریلوے بورڈ کے چیئرمین اشونی لوہانی، شمالی ریلوے کے جنرل مینیجر وشویشور چوبے اور دیگر افسران جائے حادثہ کے لئے روانہ ہوگئے ہیں۔وزیراعظم نریندر مودی نے اس ریل حادثے میں مارے جانے والے لوگوں کے کنبے سے دکھ کا اظہار کیا اور زخمیوں کی جلد صحت یابی کی تمنا کی ہے ۔ انہوں نے کہا کہ ریاستی حکومت، ریلوے اور این ڈی آر ایف کی ٹیمیں ہر ممکن امداد فراہم کرا رہے ہیں۔ ریلوے کے وزیر پیوش گوئل نے اس واقع کی ریلوے سکیورٹی کمشنر (شمال) سے جانچ کرانے اور حادثے میں مارے جانے والے لوگوں کے اہل خانہ کو پانچ پانچ لاکھ روپے اور شدید طور پر زخمیوں کو ایک ایک لاکھ روپے نیز معمولی طور پر زخمیوں کو 50 ہزار روپے کی امدادی رقم کا اعلان کیا ہے جبکہ اترپردیش کے وزیراعلی یوگی آدتیہ ناتھ نے مہلوکین کے کنبے کو دو، دو لاکھ روپے اور زخمیوں کو 50، 50 ہزار روپے دینے کا اعلان کیا ہے ۔ مسٹر گوئل نے اپنے ٹوئٹ میں کہا کہ ''رائے بریلی میں پیش آنے والے ریل حادثے میں مارے جانے والے اور زخمی ہونے والے کے کنبوں کے ساتھ گہری تعزیت ظاہر کرتا ہوں۔ میں راحت کاموں کے لئے ریلوے افسران سے مسلسل رابطے میں ہوں''۔ ذرائع کے مطابق حادثے کی شکار ٹرین سے مسافروں کو اتار لیا گیا ہے اور تقریباً 300 مسافروں کو چھ بسوں میں سوار کرکے لکھنٔو روانہ کردیا گیا ہے جہاں سے ایک خصوصی ٹرین کے ذریعہ انہیں ان کی منزل تک بھیجا جائے گا۔ زخمیوں کا علاج ضلع رائے بریلی اسپتال، ہرچند پور اسپتال اور دیگر اسپتالوں میں کیا جارہا ہے ۔ شمالی اور شمال وسطی ریلوے نے لکھنٔو، کانپور اور پنڈت دین دیال اپادھیائے جنکشن سے راحت اور بچاؤں گاڑیاں بھیجی گئی ہیں اس کے علاوہ بوگیوں کو کٹر سے کاٹ کر مسافروں کو نکالا گیا۔ حادثے کے سبب اس لائن پر اب تک تقریباً 13 گاڑیوں کی آمد و رفت متاثر ہوئی ہے ۔ ہرچند پور کے مقامی لوگوں اور ہرچند پور اسٹیشن کے ملازمین نے راحت اور بچاؤ کے کام میں قابل قدر تعاون دیا۔ رائے بریلی ٹرین حادثے کو سنجیدگی سے لیتے ہوئے پولیس کے ڈائریکٹر جنرل او پی سنگھ نے این ڈی آر ایف کی دو ٹیمیں جائے وقوع کے لئے روانہ کردی گئی ہی۔ لکھنٔو اور وارانسی سے دو این ڈی آر ایف کی ٹیمیں حادثے کے مقام پر روانہ ہوچکی ہیں۔ متاثرین کی جانکاری کے لئے پانچ اسٹیشنوں پر ہیلپ لائن قام کی گئی ہے ۔ وارانسی ۔ 0542-2503814, 62-733 (ریلوے )لکھنٔو۔25-606 (ریلوے ) ,9794830975, 9794830973 پرتاپ گڑھ۔05342-220492 رائے بریلی۔0535-2213154 یو این آئی
فرخا ایکسپریس کے5 ڈبے پٹری سے اترے 6 کی موت
