وینکیا نے کلام ڈیجیٹل لائبریری کا افتتاح کیا

نئی دہلی//نائب صدرجمہوریہ ہند ایم وینکیا نائیڈو نے ملک میں یکساں ترقی کو یقینی بنانے کے لئے شہری اور دیہی تفریق کو ختم کرنے پر زور دیتے ہوئے کہا کہ دیہی ہندوستان کی ترقی کے لئے زیادہ توجہ دینے کی ضرورت ہے ۔ وہ آج یہاں حکمرانی میں اختراعات کے لئے کلام ایوارڈ 2019 دینے کے موقع پراختراعات اور حکمرانی کے موضوع پر ڈاکٹر اے پی جے عبدالکلام سربراہ کانفرنس سے خطاب کررہے تھے ۔ مسٹر نائیڈو نے کہا کہ سماجی حیثیت کو اہمیت دئے بغیر ہر ایک کو وسائل ، حفظان صحت اور تعلیم تک یکساں رسائی فراہم کرنے سے ملک میں تفریق ختم کرنے میں مدد ملے گی۔ انہوں نے نوجوان نسل پر تحقیق کے لئے زور دیا اور کہا کہ وہ نئے نظریات اور اختراعات پیش کرکے ملک کی ترقی میں تعاون دیں۔ حکمرانی کو حقیقی ترقی کے لئے کلید اور کارکردگی کو کسوٹی قرار دیتے ہوئے مسٹر نائیڈو نے کہا کہ نظریات کو حقیقت میں بدلنے کی ضرورت ہے ۔ انہوں نے کہا کہ ڈاکٹر اے پی جے عبدالکلام کا نام آتے ہی ہندوستان کا وہ ویژن سامنے آجاتا ہے جو پوری طرح ترقی کی راہ پر گامزن ہو، جس میں دانشوری کو پوری طرح استعمال کیا جاتا ہو اور جو اقوام عالم میں اپنا جائز مقام حاصل کرنے کے لئے اپنی ثقافت اور روحانی سرمایہ کا استعمال کرسکتا ہو۔ اس موقع پر نائب صدرجمہوریہ نے 75 نئی کلام ڈیجیٹل لائبریریوں کا بھی آغاز کیا جن کا مقصد اسکولوں میں ڈیجیٹل طریقے سے مفت تعلیم اور انہیں بچوں کے لئے رسد گاہوں کے طور پر استعمال کرنا شامل ہے ۔ اس موقع پر مدھیہ پردیش کے سابق وزیراعلیٰ شیو راج سنگھ چوہان، ڈی جی ڈی آئی اے اینڈ ڈی سی آئی ڈی ایس انٹلیجنس ، وزارت دفاع ، گوا کے آرٹ اور کلچر کے وزیر لیفٹیننٹ جنرل امر جیت سنگھ بیدی ، گجرات کے چیف سکریٹری جناب گووند گوڑے ، ڈاکٹر جگدیپ نارائن سنگھ اور دیگر اہم شخصیات موجود تھیں۔یو این آئی