شاہ محمود قریشی دوطرفہ مذاکرات کے لئے چین پہنچے

بیجنگ// پاکستان کے وزیر خارجہ شاہ محمود قریشی پیر کے روز چین پہنچے ، جہاں وہ آج سے 20 مارچ تک ہونے والی پاکستان-چین وزرائے خارجہ کی پہلی اسٹریٹجک مذاکرات میں شرکت کریں گے ۔ پاکستان کی وزارت خارجہ کے مطابق دونوں ملکوں کے دو طرفہ تعلقات میں شامل چین-پاکستان اقتصادی کوریڈور (سی پی ای سی) اور علاقائی صورتحال اور کثیر جہتی پلیٹ فارم پر تفصیلی بحث ہوگی۔پاکستان کے وزیر کا دورہ چین ایسے وقت میں ہو رہاہے جب چین نے اقوام متحدہ کی سلامتی کونسل میں پاکستان کی شدت پسند تنظیم جیش محمد کے سرغنہ مسعود اظہر کو بین الاقوامی دہشت گرد قرار دینے کی تجویز پر دوسری باری روکاوٹ کھڑی کی ہے جسے ہندوستان نے مایوس کن قدم قرار دیا ہے ۔ سلامتی کونسل میں مسعود اظہر کو بین الاقوامی دہشت گرد قرار دینے کی تجویز فرانس، برطانیہ اور امریکہ کی جانب سے لائی گئی تھی۔ مسٹر قریشی کا سی پی ای سی پر سیاسی پارٹیوں کو خطاب کرنے کا پروگرام ہے اور وہ حکمران پاکستان تحریک انصاف (پی ٹی آئی) اور کمیونسٹ پارٹی آف چین (سی پی سی) کے درمیان ہونے والی بات چیت میں شامل ہوں گے اور چینی لیڈروں کے ساتھ دوطرفہ بات چیت کریں گے ۔یو این آئی