کولگام//جنوبی کشمیر کے واری پورہ دمحال کولگام میںفورسز نے جاں بحق ہوئے جنگجو کے گھر پرشبانہ چھاپے کے دوران اس کے 2 بھائیوں کو گرفتارکر کے رہائشی مکان کی توڑ پھوڑ کی اور مکینوںکا زدکوب کیا۔واقعہ کے خلاف مقامی لوگوں نے احتجاج کر کے گورنر سے انصاف کی اپیل کی ہے۔واری پورہ دمحال کولگام علاقے میںفورسز نے جمعہ کی شب10بجے سابق جنگجو عامر احمدتاترے ولد محمد رمضان تانترے کے گھر چھاپہ مارکر گھر موجود ان کے2بھائیوں اعجاز احمد اورمدثر احمد تانترے کواپنے ساتھ لیا۔ افراد خانہ نے میڈیا کو بتایا کہ فورسز نے گھر میں داخل ہونے کے ساتھ ہی مکان کی توڑ پھوڑ کرنے کے علاوہ مکینوں کی زبردست مارپیٹ کی۔اہلکاروں نے گھریلو سامان تہس نہس کیا اور بستر وغیرہ جلا ڈالا۔افراد خانہ نے بتایا کہ فورسز نے اندھا دھند شلنگ کی اور کچھ گولیاں ہوا میں فائر کئے ۔ گرفتار نوجوانوں کے والد نے بتایا کہ ہمارا بیٹا جنگجو تھا جو گزشتہ سال جاں بحق ہوا ہ۔ اب فورسز ہمیں غیر ضروری تنگ کرتے ہیں جس کے نتیجے میں ہم علاقے سے ترک سکونت کرنے پر مجبور ہوئے ہیں ۔سابق جنگجو کی بہن نے بتایا عامر صرف18سال عمر کاتھا جب اسے فورسز نے اسی طرح تنگ طلب کرکے سکول جانے سے روکا تھا اور ایک دن وہ تنگ آنے کے بعد جنگجوئوں کے صف میں شامل ہوا جو کچھ ماہ تک سرگرم رہنے کے بعد جاں بحق ہوا ۔ انہوں نے کہا کہ اگر ہم نے اس حوالے سے تمام سیاسی پارٹیوں کے لیڈران سے بھی بات کی تاہم کسی نے ہماری ایک نہ سنی ہے اور نا ہی کسی نے مدد کی۔ افراد خانہ کا کہنا تھا فورسز اہلکاروں نے90کی طرز پر گھر میں موجود بسترے کو جلانے کے علاوہ تمام غذائی اجناس کو ناقابل استعمال بنا دیا ۔اس دوران مقامی بستی بشمول گرفتار شدہ نوجوانوں کے رشتہ داروں نے واقعے کے خلاف احتجاج کر کے گور نر انتظامیہ سے فوری مداخلت کی اپیل کرتے ہوئے ان کے بے قصور بچوں کی رہائی کا فوری مطالبہ کیا۔
کولگام میں جاں بحق جنگجو کے مکان کی توڑپھوڑ ،2بھائی گرفتار
