آبادی ملک کی ترقی میں رخنہ: سبی رامی ریڈی

نئی دہلی// راجیہ سبھا میں آج اراکین نے ملک میں بڑھتی آبادی پر تشویش ظاہر کرتے ہوئے کہا کہ اس سے خوشحالی اور ترقی میں رخنہ پڑرہا ہے ۔کانگریس کے ٹی سبی رامی ریڈی نے پیر کو ایوان میں وقفہ صفر کے دوران آبادی کا معاملہ اٹھاتے ہوئے کہاکہ ملک کی آبادی ابھی 137کروڑ ہے اور 2027میں یہ چین کو پیچھے چھوڑتے ہوئے 140کروڑ ہوجائے گی۔ انہوں نے کہاکہ اگر ملک کی آبادی اسی حساب سے بڑھتی رہی تو 2059میں ہماری آبادی 165کروڑ تک پہنچ جائے گی۔اسے آبادی دھماکہ قرار دیتے ہوئے مسٹر ریڈی نے کہا کہ یہ مسئلہ آہستہ آہستہ ایسی خطرناک شکل اختیار کررہا ہے کہ اس کی وجہ سے ملک کی خوشحالی اور ترقی بری طرح متاثر ہورہی ہے ۔ بے روزگاری اور نقص غذائیت میں مسلسل اضافہ ہورہا ہے ۔ آبادی میں اضافہ کو کنٹرول کئے بغیر ملک کا تیزی سے ترقی کرنا ممکن نہیں ہے ۔ کئی اراکین نے ان کی بات سے اتفاق کرتے ہوئے حمایت ظاہر کی۔چیرمین ایم ونکیا نائیڈونے بھی کہا کہ یہ سنگین معاملہ ہے اور ایوان بالا میں اس طرح کے اہم امور پر بحث ہونی چاہئے ۔بھارتیہ جنتا پارٹی کے ڈاکٹر وکاس مہاتمے نے دہلی میں حالیہ دنوں میں سیپٹک ٹینک کی صفائی کرتے ہوئے سات لوگوں کی جان جانے کا معاملہ اٹھاتے ہوئے ٹینک کی صفائی آلات سے کرائے جانے کی مانگ کی۔ انہوں نے کہا کہ بغیرآلات کے ٹینک کی صفائی کرانا ضابطوں کے خلاف ہے ۔ یہ غیرانسانی تو ہے ہی اس سے صفائی ملازمین کی جان کو بھی خطرہ رہتا ہے ۔ انہوں نے کہاکہ جب اس طرح کے معاملات کی ایف آئی آ ر درج کی جاتی ہے تو اس میں موت کی وجہ سے حادثہ لکھی جاتی ہے جس سے متاثرہ افراد کو کم معاوضہ ملتا ہے ۔بی جے پی کے ہی شویت ملک نے کہاکہ چیک باونس ہونے کے بڑھتے واقعات کے پیش نظر یہ انتظام کیا جانا چاہئے کہ معاملہ درج ہوتے ہی قصوروار کو عدالت میں باونس چیک کی رقم جمع کرانے کے لئے کہا جائے ۔ انہوں نے کہا کہ ملک میں مختلف عدالتوں میں چیک باونس ہونے کے تقریباََ 20لاکھ معاملات زیرالتوا ہیں۔ اسے منظم زمرہ کا جرم قرار دیتے ہوئے انہوں نے اس میں لاکھوں بے قصور لوگوں کے پھنسے ہونے کا دعوی کیا۔کانگریس کے ریپون بورا نے پبلک سیکٹر کی کمپنیوں ایم ٹی این ایل اور بی ایس این ایل کی بدحالی کا معاملہ اٹھاتے ہوئے کہا کہ حکومت کو ان دونوں کمپنیوں کے لئے راحت پیکج دینا چاہئے ۔ انہوں نے کہا کہ یہ ادارے غلط پالیسیوں کے سبب اس حالت میں پہنچے ہیں اور اب بھی حکومت انہیں 5جی اور 4جی جیسی نئی تکنالوجی کے معاملہ میں نظرانداز کررہی ہے ۔ حکومت کے لچر رویہ کی وجہ سے ملازمین کو وقت پر تنخواہ نہیں مل پارہی ہے ۔انہی کی پارٹی کے موتی لال ووہرہ نے ملک کے دفاتر میں 40لاکھ زیرالتوا معاملات کو جلد نپٹانے کا معاملہ اٹھاتے ہوئے عدالتوں میں ججوں کی تعداد بڑھانے کی مانگ کی۔ انہوں نے کہاکہ حکومت کو ملک کے چیف جسٹس کے ذریعہ لکھے گئے خط میں دیئے گئے مشوروں پر توجہ دینی چاہئے ۔عام آدمی پارٹی کے لیڈر سنجے سنگھ نے دہلی میں گزشتہ ایک مہینہ کے دوران مجرمانہ واقعات کے بڑھنے کا معاملہ اٹھاتے ہوئے کہا کہ اس مدت میں راجدھانی کی سڑکوں پر 220راونڈ فائرنگ ہوئی۔ راجدھانی میں ایک برس میں عصمت دری کے 2043 واقعات اس بات کا ثبوت ہیں کہ یہاں امن و قانون کی صورتحال کیسی ہے ۔ انہوں نے کہا کہ امن و قانون کی صورتحال پر وزارت داخلہ کو ایک خصوصی میٹنگ بلانی چاہئے جس میں دہلی کے وزیراعلی کو بھی مدعو کیا جانا چاہئے ۔ بی جے پی کے وجے گوئل نے اس درمیان کہا کہ دہلی میں عام آدمی پارٹی کی ہی حکومت ہے ۔بھارتیہ جنتا پارٹی کے کروڑ ی لال مینا نے راجستھان کی ندیوں میں آلودگی کی وجہ سے پینے کے پانی کے متاثر ہونے کا معاملہ اٹھاتے ہوئے مرکز سے اس میں مداخلت کرنے کی مانگ کی۔ سی پی ایم کے کے راگیش نے منافع میں چل رہے ترویندرم ہوائی اڈہ کا آپریشن اڈانی گروپ کو دیئے جانے کی مخالفت کرتے ہوئے کہا کہ جب ریاستی حکومت اسے چلانا چاہتی ہے تو اسے پرائیویٹ گروپ کو کیوں دیا جارہا ہے ۔ کانگریس کے رام منی پٹیل نے ریوا سے عدالت کی منتقلی کو بے وجہ قرار دیتے ہوئے کہا کہ اس سے لوگوں کو انصاف کے لئے کافی دور جانا پڑے گا اور یہ منطقی نہیں ہے ۔بیجو جنتادل کے پرسنا آچاریہ نے اڈویشہ میں بنکروں کی حالت زار کا معاملہ اٹھاتے ہوئے کہاکہ انکے ڈیزائنوں کی کاپی کرکے مارکٹ میں مصنوعات اتاری جارہی ہیں جس سے بنکروں کو پریشانیوں کا سامنا کرنا پڑرہا ہے ۔بنکروں کو پہلے ملنے والی دس فیصد چھوٹ بھی بند ہوگئی ہے ۔ بی جے پی کے کے راگیش نے شمالی بہار کے بیگو سرائے میں ایمس کے قیام کی مانگ کی جس سے وہاں بیماریوں کے علاج کے ساتھ ساتھ تحقیقی کام بھی ہوسکے ۔کانگریس کے پی ایل پونیا نے میتھا یعنی پودینہ کی کھیتی کرنے والے کسانوں کے مسائل ایوان میں رکھتے ہوئے کہا کہ ان پر منڈی ٹیکس کے ساتھ ساتھ جی ایس ٹی بھی لگایا جاتا ہے ۔ اس کی فصل کی کم از کم سہارا قیمت بھی مقرر نہیں ہے ۔ڈی ایم کے کے تروچی شیوا نے تملناڈو کے طلبا کو میڈیکل کالجوں میں داخلہ کے لئے کرائے جانے والے نیٹ امتحان کے دائرے سے باہر کرنے کا معاملہ اٹھایا۔ یو این آئی