جامع تجارتی اتحاد کیلئے کوششیں | ٹریڈرس فیڈریشن کی انتخابی مہم کیلئے سرگرمیاں شروع

سرینگر//کشمیر ٹریڈرس اینڈ مینوفیکچررس فیڈریشن نے جامع تجارتی اتحاد کیلئے جاری کوششوں کو تیز کرتے ہوئے اس سلسلے میں انتخابی مہم کیلئے سرگرمیاں شروع کی ہیں ۔بدھ کو یہاں حضوری باغ سرینگر میں ٹریڈرس فیڈریشن کے قائم مقام صدر محمد رجب کوچھے نے سبھی ایگزیکٹیو ممبران اور جنرل کونسل کے کئی ممبران کے علاوہ مختلف بازار کمیٹیوں کے عہدیداران کے ساتھ میٹنگ کی جس میں سینئر لیڈر فیاض احمد بٹ ،معراج الدین خان ،عبدالرحمان صوفی ،شیخ ہلال احمد،اعجاز احمد بٹ ،محمد ایوب لاوے ،جاوید احمد خان،غلام محی الدین بٹ ،ڈاکٹر سجاداحمد اورڈاکٹر شوکت احمد ڈار نے شرکت کی ۔میٹنگ میں سینئر لیڈر فاروق احمد ڈار نے بھی خصوصی طور شرکت کی۔اس موقعے پرمحمد رجب کوچھے نے کے ٹی ایم ایف کے بنیادی آئین اور اسکے اہداف و مقاصد پر روشنی ڈالتے ہوئے کہاکہ ہمارے اسلاف نے تاجر برادری کے مسائل کو اجاگر کرنے اور انہیں حل کرانے کیلئے جدوجہد کرنے کی خاطر ایک منظم فیڈریشن کا قیام عمل میں لایا تھا جس نے دہائیوں سے تاجر وں کی فلاح و بہود کیلئے انتھک کام کیا۔انہوں نے کہاکہ وقت گذرنے کے ساتھ ساتھ کے ٹی ایم ایف تاجروں کی ایک منظم تحریک کا نام بن گیا اور عام تاجروں نے اس تنظیم کے ساتھ اپنی والہانہ وابستگی کا اظہار کیا۔کوچھے نے تمام تاجر برادری پر زور دیا کہ وہ آگے آئیں اور کے ٹی ایم ایف کے آئین کو مضبوط بنانے اور انتخابی عمل میں حصہ لینے کیلئے مہم میں شامل ہوجائیں۔انہوں نے حالیہ ایام میں بعض ٹریڈ انجمنوں اور لیڈران کی طرف سے انتخابات کے اعلان کا بھی خیر مقدم کیا اور اپیل کی کہ سبھی مل کرکے ٹی ایم ایف کے ہمہ گیر انتخابات کو یقینی بنانے کیلئے اپنا رول ادا کریں۔فیاض احمد بٹ نے تمام تاجر برادری سے اپیل کی کہ وہ آگے آئیں اور فیڈریشن کے ہیڈ آفس واقع کوچھے بلڈنگ حضوری باغ میں تشریف لاکر اپنی آراء و تجاویز سے نوازیں۔ میٹنگ میں موجود کشمیر ٹریدرس یونائیٹڈ فورم کے چیئرمین فاروق احمد ڈار نے اتحاد و اتفاق کی ضرورت پر زور دیا کہ تاجروں کی نمائندگی کرنے اور ان کے مسائل حل کرنے کیلئے سبھی کو ایک اور متحد ہونا پڑے گا۔انہوں نے شہر خاص کے تاجر لیڈران کے علاوہ سینئر ٹریڈ لیڈرالحاج محمد صادق بقال اوردیگر لیڈران کی طرف سے اتحاد و اتفاق کیلئے آگے آنے پر ان کا شکریہ ادا کیا ۔