جے کے بینک ملازمین کیلئے حصص کی خریداری اسکیم شروع | 150کروڑ روپے کے ایکویٹی شیئر اشیو 3ستمبر تک دستیاب

سری نگر//جموںوکشمیر بینک کے چیئرمین اور ایم ڈی آر کے چبھر نے ایگزیکٹیو صدور ارون گنڈوترا اور سنیل گپتا ، پریذیڈنٹ اینڈ سپیشل سیکرٹری کی موجودگی میں بینک کی ایمپلائی سٹاک پرچیز سکیم ( اِی ایس پی ایس۔2021ء)کاآغاز کیا۔ سی ایم ڈی کرنجیت سنگھ، صدور ، نائب صدور اور بینک کے دیگر سینئر اَفسران ، بینک کے تمام زونل سربراہان اور متعلقہ زونوں میں تعینات عملے کے ساتھ بذریعہ ویڈیو کانفرنسنگ افتتاحی تقریب میں حصہ لیا۔اِس موقعہ پر اَپنے خصوصی پیغام میں سی ایم ڈی نے کہا کہ ملازمین کو بینک کا مالکان بنانا ہے۔سی ایم ڈی نے کہا ،’’ سکیم کا مقصد اِس اِدارے میں ملازمین کی براہِ راست ملکیت کو فروغ دینا ہے تاکہ ان کی بنائی ہوئی قدر بھی ان کے ساتھ شیئر کی جاسکے ۔ یہ ملازمین کو سٹاک کی شکل میں ملکیت کے ساتھ بااِختیار بنائے گا اور ساتھ ہی ان کے مستقبل کو محفوظ بنانے کے لئے سرمایہ کاری کا موقعہ بھی فراہم کرے گا۔‘‘سکیم کے مطابق بینک نے 150 کروڑ روپے تک کے ایکویٹی حصص کے لئے اشیو کھول دیا ہے ۔ ایشو 3 ستمبر 2021ء کو بند ہو جائے گا ۔اَپنے عملے  کو صارف دوست بنانے کے لئے بینک نے عمل کو بہتر کیا ہے اور سکیم ( اِی ایس پی ایس ) کے تحت سٹاک کی خریداری کے لئے’ پیپل سسٹم‘ ، بینک کی موجودہ ایچ آر درخواست فارم کے ساتھ ضم کیا گیا ہے ۔ اُنہوں نے کہا کہ مجھے پورا یقین ہے آپ سب ، اپنے بینک کے لئے اس سکیم کو ایک بڑی کامیابی بنانے کے لئے پورے دل سے حصہ لیں گے۔اِس موقعہ پر سٹاف ممبران بہت پُرجوش تھے اور ای ایس پی ایس کے معاملے پر اپنے اطمینان کا اظہار کیا۔ انہیں سرمایہ کاری کا ایسا موقعہ فراہم کرنے اور ادارے میں ان کی ملکیت کے احساس کو مزید فروغ دینے پر بینک کی قیادت کا شکریہ ادا کرتے ہوئے عملے کے اراکین نے اُمید ظاہر کی کہ ملازمین کی جانب سے سٹاک کی بڑی تعداد میں خریداری مارکیٹ پر مثبت اثر ڈالے گی۔