کورونا وائرس

اشتیاق ملک 

ڈوڈہ///ضلع میں کسی بھی تقریب میں 25 سے زائد افراد شامل ہونے کی اجازت نہیں ہو گی۔ 45 سال سے زیادہ کے عمر کے سو فیصد لوگوں و اٹھارہ سال سے اوپر 74 فیصدی افراد کو ٹیکے لگائے گئے ہیں ۔ان باتوں کا اظہار ڈی سی ڈوڈہ وکاس شرما نے ایس ایس پی ممتاز احمد کی موجودگی میں منعقد ایک پریس کانفرنس سے مخاطب ہوتے ہوئے کیا۔ انہوں نے کہا کہ ضلع میں کورونا مثبت معاملات کی شرح کم ہو کر 0.35فیصدی رہ گئی ہے جبکہ ضلع ٹیکہ کاری کا عمل تیزی کے ساتھ جاری ہے۔ ڈی سی نے کہا کہ 45برس سے زائد عمر کے لوگوں کی ویکسی نیشن صد فیصد مکمل ہو چکی ہے اور اٹھارہ برس سے زیادہ عمر کے 74 فیصدی افراد نے ٹیکے لگوائے ہیں۔ انہوں نے کہا کہ ضلع میں کورونا کے مناسب طرز عمل پر عمل پیرا ہونے کے لئے پولیس اپنا کام بخوبی کر رہی ہے۔ اس کے علاوہ ضلع بھر میں مختلف ٹیمیں تشکیل دی گئی ہیں جو ایس اوپیز کی مکمل عمل آوری کے لئے مصرف عمل ہیں۔اْنہوں نے بتایا کہ باقی اضلاع کی طرح ضلع ڈوڈہ میں بھی رات کا کرفیو جاری ہے جبکہ مذہبی،سرکاری ، گھریلو تقریبات میں پچیس سے زائد افراد کے ایک جگہ پر اکھٹا ہونے ممنوع قرار دیا گیا ہے۔ڈپٹی کمشنر نے کہا کہ عوامی  مراکز پر تمام تر کی تقریبات منعقد کرنا کورونا ایس اوپیز کی خلاف ورزی تصور کیا جائے گا۔اْنہوں نے ضلع کے تمام چھوٹے بڑے کاروباریوں سے اپیل کی ہے کہ وہ سرکار کی طرف سے جاری کردہ ہدایات پر عمل کریں اور رضاکارانہ طور کورونا کے خلاف لڑنے میں انتظامیہ کو تعاون دیں۔ انہوں نے انتباہ کیا کہ اگر کوئی بھی ہدایات کی خلاف ورزی کرتا ہے تو اْس کے خلاف سختی سے نپٹا جائے گا۔اس موقع پر ایڈیشنل ایس پی بھدرواہ عبد القیوم، ایس پی آپریشن راج کمار، ڈی آئی او محمد اشرف وانی بھی موجود تھے۔

 

اشتیاق ملک

ڈوڈہ //ڈوڈہ ضلع میںکورونا وائرس کے 5 نئے مثبت معاملات سامنے آئے ہیں اور 10 مریض صحتیاب ہوئے ہیں۔ اطلاعات کے مطابق منگل کے روز ڈوڈہ، بھدرواہ، ٹھاٹھری ،گندوہ و عسر میں ہوئی کوؤڈ جانچ کے دوران پانچ افراد کی ٹیسٹ رپورٹ مثبت آئی ہے جنہیں ہوم قرنطینہ میں رکھا گیا ہے اور دس مریض صحتیاب ہوئے ہیںاور اس طرح سے ضلع میں فعال کیسوں کی تعداد سمٹ کر 95 رہ گئی ہے اور شفایاب ہوئے مریضوں کی مجموعی تعداد 7347 پہنچ گئی ہے وہیں ضلع میں کوؤڈ 19 سے اب تک 130 اموات ہوئیں ہیں اور 282595 افراد کو ٹیکے لگائے گئے ہیں۔

 

 

عاصف بٹ

کشتواڑ//ضلع کشتواڑ میں کورونا وائرس کی دوسری لہر کے دوران 2028 مثبت معاملات درج کئے گئے جن میں 1954 مریض اس وبائی بیماری سے صحتیاب ہوچکے ہیں ۔ان باتوں کا اظہار ضلع ترقیاتی کمشنر کشتواڑ اشوک کمار شرما نے ہفتہ وار کورونا پریس بریفنگ کے دوران کیا ۔انھوں نے بتایا کہ ہسپتال کے اندر کوئی بھی کورونا مریض داخل نہیں ہے جبکہ محض 58 افراد کا علاج گھروں میں جاری ہے۔ انھوں نے بتایا کہ گزشتہ ہفتہ کے دوران 6340 ٹیسٹ کئے گئے جن میں 33 مثبت معاملے پائے گئے جو خو ش قسمتی کی بات ہے اور شرح میں بھی کمی درج کی گئی۔ انھوں کہا کہ ایس او پی کی خلاف وری کرنے والوں کے خلاف جرمانہ وایف آئی آر درج کی جائے گی۔ انھوں نے بتایا کہ 18سے 44 کے زمرے والے افراد کیلئے ٹیکہ کاری مہم کو ہر بلاک میں چلایاجارہا ہے اور لوگ اس میں حصہ لے رہے ہیں۔انھوں نے عوام سے اپیل کہ وہ گھر سے نکلتے وقت ماسک کا استعمال کریں اورایس او پی پر عمل کریں۔ کالجوں و یونیورسٹی سے متعلق انھوں نے بتایا کہ وہاں ٹیکہ کاری کی خصوصی مہم چلائی جائے گی اور اُنہی اساتذہ و طلبہ کو آنے کی اجازت ہوگی جنھوں نے ٹیکہ لگایا ہوگا۔

 

 

سید امجد شاہ

جموں//لوگوں سے کووڈ کے مناسب رویے پر عمل کرنے کی اپیل کرتے ہوئے ضلع مجسٹریٹ جموں انشل گرگ نے کہا کہ ضلع جموں میں پچھلے 45 دنوں میں مثبتیت کی شرح2 فیصد سے کم رہی ہے۔ڈپٹی کمشنر جموں نے میڈیا سے بات کرتے ہوئے کہا کہ ریاستی ایگزیکٹو کمیٹی کے رہنما خطوط پر عمل کرنے پر لوگوں کی تعریف کرتے ہوئے کہا کہ ہماری مثبت شرح 2 فیصد سے کم ہے۔انہوں نے کہا کہ ان کے پاس 'کوویکسین اور کوویشیلڈ' کا کافی ذخیرہ ہے،لوگوں کو خود کو ویکسی نیشن کے لیے آگے آنا چاہیے۔کووڈ لہر کے دوران ضلع انتظامیہ جموں نے بھی احتیاط سے تیار کردہ حکمت عملی پر عمل کیا ہے۔ انہوں نے کہا کہ یکم جون 2021 سے اب تک جب کیسز میں کمی آئی پانچ لاکھ ، تئیس ہزار اور پانچ سو پینتالیس ٹیسٹ کیے گئے ہیں۔انکا کہناتھا"ہمارے پاس 50 ٹیمیں کام کر رہی ہیں ، صحت کی دیکھ بھال کے اداروں کے علاوہ جہاں ٹیسٹ مسلسل جاری ہے۔ روزانہ کی بنیاد پر ہم 5500 سے 6000 مسافروں کی جانچ کر رہے ہیں جو سڑک ، ریل اور ہوائی راستے سے جے اینڈ کے آرہے ہیں۔ مسافروں کو مکمل طور پر ویکسین کے لیے ٹیسٹ کیا جا رہا ہے‘‘۔انہوں نے مزید کہا کہ ہماری ٹیمیں پرہجوم جگہوں جیسے بازاروں میں مسلسل ٹیسٹ کرتی ہیں۔ جموں کی ویکسی نیشن 45 پلس تھی جس کا ہم نے احاطہ کیا ہے اور 18 سال سے زیادہ عمر کے افراد میں ویکسی نیشن جاری ہے۔ اب تک ، سات لاکھ اور پچھتر ہزار بالغ افراد نے اپنی پہلی خوراک لی ہے۔ اندازے کے مطابق یہ تقریبا 67 67 فیصد لوگ ہیں جن کو ویکسین دی گئی ہے۔ انہوں نے لوگوں سے کہا کہ وہ دوسری ویکسی نیشن کے لیے اپنا اندراج کروائیں۔کووڈ کے مناسب رویے کو نافذ کرنے کے لیے انہوں نے کہا کہ پولیس اور ریونیو پر مشتمل سات سب ڈویژنل لیول ٹاسک فورسز تشکیل دی ہیں۔ ایسی 25 نشستوں پر ، ہم پرہجوم جگہوں پر جانے کے بعد خلاف ورزیوں کو چیک کرتے ہیں اور اسی کے مطابق تعزیراتی کارروائی بھی کی جا رہی ہے۔ڈی سی جموں نے مزید کہا کہ بچوں کو ویکسین نہیں دی جاتی اور وہ ایک کمزور طبقہ ہیں اور ہمیں بچوں پر خصوصی توجہ رکھنی ہے اسی لیے انہوں نے اجتماع کی طرف خصوصی توجہ دی ہے۔انہوں نے کہا کہ انہوں نے چہرے کے ماسک پہننے اور 25 سے اوپر جمع ہونے کے حوالے سے خلاف ورزیوں کو نوٹ کیا ہے اور اپیل کی ہے کہ عوام کووڈ مناسب رویے پر عمل کریں۔اس موقعہ پرایس ایس پی جموں چندن کوہلی نے کہا "ہم نے کووڈ دوسری لہر کے دوران کووڈ مناسب رویے کی خلاف ورزی کرنے پر 450 ایف آئی آر درج کی ہیں اور 500 افراد کو گرفتار کیا ہے"۔انہوں نے کہا کہ ماسک نہ پہننے یا مناسب فاصلہ برقرار نہ رکھنے پر 20ہزارافراد کا چالان کیا گیا۔ انہوں نے مزید کہا کہ انہیں پچھلے چھ ماہ میں 90 لاکھ روپے کا جرمانہ وصول ہواہے۔

 

رام بن//ضلع رام بن میں کووڈ پروٹوکول کو نافذ کرنے کے لیے نافذ کرنے کی مہم کو جاری رکھتے ہوئے انفورسمنٹ ٹیموں نے چہرے کے ماسک نہ پہننے اور جسمانی فاصلہ برقرار نہ رکھنے پر گھومنے پر متعدد خلاف ورزی کرنے والوں پر جرمانہ عائد کیا۔نافذ کرنے والی ٹیموں نے اپنے متعلقہ دائرہ کار میں معائنہ کے دوران 25ہزار700 روپے جرمانہ وصول کیا۔انفورسمنٹ افسران نے لوگوں پر زور دیا کہ وہ چہرے کے ماسک پہنیں اور جسمانی فاصلہ برقرار رکھیں اس کے علاوہ اپنے قریبی سی وی سی پر کوویڈ ویکسی نیشن کی خوراکیں لیں۔ڈسٹرکٹ امیونائزیشن آفیسر رام بن ڈاکٹر سریش نے بتایا کہ ضلع رام بن میں آج 1305 افراد کو پہلی اور دوسری کوویڈ ویکسین کی خوراک دی گئی۔چیف میڈیکل آفیسر رام بن ڈاکٹر محمد فرید بھٹ کی طرف سے جاری کردہ روزانہ بلیٹن کے مطابق محکمہ صحت نے 1401 نمونے جمع کیے ہیں جن میں 361 ،RT-PCR اور 1040، RAT نمونے شامل ہیں جبکہ اس کے علاوہ 1305 افراد کو کوویڈ ویکسین ضلع کے مخصوص ویکسی نیشن مراکز میں دی گئی ہے۔