صوبائی کمشنر نے عید میلاد انتظامات کا جائزہ لیا

 سرینگر//صوبائی کمشنر کشمیر پی کے پولے نے آئندہ عید میلاد کے سلسلے میںانتظامات کا جائزہ لیا ۔ اننت ناگ ، شوپیاں ، بڈگام اور بانڈی پورہ اضلاع کے ڈپٹی کمشنروں نے ویڈیو کانفرنسنگ کے ذریعے اجلاس میں حصہ لیا جبکہ ڈپٹی کمشنر سرینگر ، مختلف محکموں کے چیف انجینئروں ، ایس ایس پی ٹریفک ، ایس پی حضرت بل ، جے ڈی انفارمیشن اور وقف بورڈ ، محکمہ صحت ، ایس ایم سی کے افسران نے شرکت کی۔ میٹنگ کی صدارت کرتے ہوئے انہوں نے اسٹیک ہولڈروں پر زور دیا کہ وہ کووڈ ایس او پیز کی تعمیل کو یقینی بنائیں ، خاص طور پر عقیدتمندوں کے ماسک پہننے اور جسمانی فاصلے کو برقرار رکھنے کو یقینی بنائیں۔ انہوں نے کہا کہ کووڈ ابھی ختم نہیں ہوا ہے اسلئے لوگوں کو ہدایات پر عمل کرنے کی ضرورت ہے۔ انہوں نے افسران سے کہا کہ وہ چوکس رہیں اور بار بار اعلانات کرکے لوگوں کو کووڈ پروٹوکول کی یاد دلائیں۔اجلاس سے خطاب کرتے ہوئے صوبائی کمشنر نے آنے والے مبارک موقع پر لوگوں کی سہولت کے لیے تمام ضروری انتظامات کرنے پر زور دیا۔ انہوں نے پی ڈی ڈی کے عہدیداروں کو ہدایت دی کہ پوری مدت کے دوران تمام اجتماعی مقامات کو بلاتعطل بجلی کی فراہمی کو یقینی بنائیں۔ انہوں نے ان علاقوں اور اس کے آس پاس اسٹریٹ لائٹس کی بحالی کی بھی ہدایت کی۔صوبائی کمشنر نے پینے کے صاف پانی کی فراہمی ، راشن کی مناسب فراہمی ، صحت کی سہولیات ، آگ بجھانے کے انتظامات ، پارکنگ کی سہولیات اور حضرت بل اور دیگر تمام مساجد اور زیارتگاہوں پر صفائی کرنے والوں کی بڑی تعداد میں آمد متوقع ہے۔انہوں نے اسٹیٹ روڈ ٹرانسپورٹ کارپوریشن (ایس آر ٹی سی) کے عہدیداروں کو ہدایت دی کہ وہ حضرت بل کی طرف جانے والے تمام راستوں پر عقیدتمندوں کی آمدورفت کیلئے گاڑیاں دستیاب کریں۔ انہوں نے کشمیر یونیورسٹی اور این آئی ٹی میں پارکنگ کی سہولیات دستیاب کرنے کی ہدایت کی۔ اس کے علاوہ ، انہوں نے آر ٹی او سرینگر کو ہدایت دی کہ وہ عقیدتمندوں کے لیے راستے متعین کریں ۔