مزید خبریں

سرینگر//عید میلادالنبیؐ کی اختتامی تقریب کے سلسلے میں آثار شریف شہری کلاش پورہ میںجمعتہ المبارک 15ربیع الاول بمطابق 22اکتوبر ایک تقریب کا انعقاد ہو رہا ہے۔ نمازِ جمعہ سے قبل مولانا ریاض احمد ہمدانی خطاب کریں گے۔نمازِ جمعہ کے بعد موئے مقدس اور بقعہ عالیہ میں موجود دیگرتبرکات کی نشاندہی بقعہ عالیہ کے نشاندہ مولوی منظور احمد کرائیں گے۔

 

 

 فیاض بخاری

 بارہمولہ//فتح گڈھ بارہمولہ میں ایک میلاد کانفرنس کا انعقاد ہوا جس میں مقامی لوگوں کے علاوہ ضلع کے مختلف اطراف سے آئے ہوئے  لوگوں نے شرکت کی ۔میلاد کے سلسلے میں شب خونی کے علاوہ نعت خوانی اور درود وازکار کی محفلیں آراستہ ہوئیں ۔اس موقع پر مولانا سید مظفر احمد نے آنحضوؐکی سیرت طیبہ پر روشنی ڈالی ۔تقریب کا اہتمام پیر نذیر احمد وانی کی سرپرستی میں ہوئی جس میں کئی علماء کے علاوہ دیگر لوگوں نے بھی شرکت کی ۔آخر پر پیر نذیر احمد نے نے علماء اور لوگوں کا شکریہ ادا کیا جنہوں نے اس میلادُکانفرنس میں شرکت کی ۔ 

 

 

 

سرینگر//آنگ مٹی پورہ اننت ناگ میں قائم گورنمنٹ مڈل سکول تین کمروں پر مشتمل ہے اور 85 بچے یہاں زیر تعلیم ہیں۔مقامی لوگوں نے محکمہ تعلیم کے خلاف برہمی کااظہار کرتے ہوئے کہا کہ دور دراز علاقوں میں قائم سکولوں کو نظر انداز کیا گیا ہے۔مقامی لوگوں کا کہنا ہے کہ دور دراز علاقوں میں قائم سرکاری سکول سرکار اور متعلقہ محکمہ کی نظروں سے اْجھل ہیں ۔لوگوں کا کہنا ہے کہ اُن کے بچوں کو تعلیم حاصل کرنے کا شوق ہے لیکن انہیں سہولیات میسر نہیں ہیں جس کی وجہ سے دور درازعلاقوں کے بچے معیاری تعلیم سے محروم رہتے ہیں۔ اس گائوںمیں 2004 میں پرائمری سکول قائم کیاگیا تھاجس کو 2014 میں اپ گریڈ کرکے مڈل سکول بنایا گیا لیکن پرائمری سکول کیلئے جو اْس وقت عمارت تھی اسی عمارت کے تین کمروں میں مڈل سکول بھی چلایا جارہا ہے۔ آنگ مٹی پورہ چونکہ ایک وسیع آبادی پر مشتمل ہے جس کی وجہ سے سکول میں بچوں کا رول بھی کافی ہے۔ سکول میں 85سے زائد بچے زیر تعلیم ہیں لیکن سکولی عمارت صرف تین کمروں پر مشتمل ہے جن میں سے ایک دفتری کام کاج کیلئے استعمال ہوتا ہے۔ ان دو کمروں میں 85 بچے جب ایک ساتھ جمع ہوتے ہیں توپڑھنے اور پڑھانے کا عمل مکمل طور متاثر ہوتا ہے۔( سی این آئی)

 

 

سرینگر//مولانا آزاد نیشنل اردو یونیورسٹی آن لائن داخلوں کی خاطر ایسے امیدواروں کے لیے اپنا پورٹل کھول رہی ہے جو مختلف کورسز میں داخلہ کی تازہ درخواست جمع کرنا چاہتے ہیں یا ایسے امیدوار جنہوں نے پہلے درخواست جمع کی تھی لیکن انہیں داخلہ نہیں ملا۔موصولہ بیان کے مطابق پروفیسر صدیقی محمد محمود، رجسٹرار انچارج کی جانب سے جاری کردہ اعلامیہ کے مطابق آن لائن درخواست داخل کرنے کی آخری تاریخ 22 اکتوبر 2021مقرر کی گئی ہے اور منتخب امیدواروں کی فہرست 24 اکتوبر کو جاری کی جائے گی۔ اسناد کی تصدیق 28 اکتوبر کو ہوگی جبکہ فیس کی ادائیگی کی تاریخ 28 اور 29 اکتوبر مقرر کی گئی ہے۔

 

سرینگر //مشن ڈائریکٹر جموں و کشمیر رورل لائیو لی ہُڈ مشن ( جے کے آر ایل ایم ) ڈاکٹر سید سحرش اصغر نے ضلع اننت ناگ میں دیہی روزی مشن کے تحت حاصل کردہ بلاک وار پیش رفت کا جائیزہ لیا ۔ میٹنگ میں کشمیر کے ایڈیشنل مشن ڈائریکٹر ریاض احمد بیگ ، اسٹیٹ پروجیکٹ منیجرز آر ایل ایم ، ڈسٹرکٹ پروگرام منیجرز ، بلاک  پروگرام منیجرز م بلاک کوارڈی نیٹر وں، ضلع اننت ناگ کے ایم آئی ایس اسسٹنٹس اور مشن کے دیگر عہدیداروں نے ذاتی طور پر اور ویڈیو کانفرنسنگ کے ذریعے شرکت کی ۔ اس موقع پر ڈاکٹر سحرش اصغر نے عہدیداروں پر زور دیا کہ وہ موجودہ ایس ایچ جی کے ممبروں کو جمع کریں اور رجسٹر کریں جو کہ فنکار ہیں  روائتی صنعتوں کی تخلیق نو کیلئے فنڈ کی اسکیم کے تحتکیونکہ یہ کامن سہولت سینٹرز ( سی ایف سی ) ، خام مال بینک بنا کر کاریگروں کو سہولت فراہم کرے گا اور مہارت اور ڈیزائین کی ترقی کی تربیت فراہم کرے گا ۔ ڈاکٹر سحرش نے مزید کہا کہ مختلف محکموں کے ساتھ مل کر سیلف ہیلپ گروپ ( ایس ایچ جی ) کے ممبروں کو فارم سیکٹر اور نان فارم سیکٹر دونوں میں اپنی روزی روٹی قائم کرنا ہو گی ۔ چونکہ ضلع میں ڈیری کے بہت زیادہ امکانات ہیں اس لئے بی پی ایم کو ہدایت دی گئی تھی کہ وہ کسان پرڈیوسر تنظیموں ( ایف پی او ) کے تحت ایس ایچ جی کے ممبروں کو اندراج کریں اور آگے بڑھنے کیلئے گروپ کی سرگرمیاں شروع کریں اور اپنے کاروبار کو ایک اعلیٰ سطح تک لے جائیں ۔ مشن ڈائریکٹر نے عہدیداروں کو ہدایت دی کہ وہ ایس ایچ جی کے اراکین کو کسٹم بائیرنگ سینٹرز ( سی ایچ سی ) کے انتظام پر ریونیو منیجمنٹ ، آلات کے انتظام وغیرہ کے حوالے سے توجہ دیں تا کہ سی ایچ سی میں موجود سامان خریدا جائے تا کہ خواتین کسانوں کی مشکلات کو کم کیا جا سکے ۔ اس کے ساتھ ساتھ محنت کا کام تیز کریں ۔ انہوں نے مزید کہا کہ اس کے علاوہ سی ایچ سی میں موجود سامان علاقے کی مقامی ٹپو گرافی کے مطابق ہونا چاہئیے تا کہ سی ایچ سیز کے اثرات کو زیادہ سے زیادہ بنایا جا سکے ۔ اجلاس کو بلاکوں کی پیش رفت کے بارے میں آگاہ کرتے ہوئے عہدیداروں نے اندازہ لگایا کہ 35936 دیہی خواتین کو 4338 ایس ایچ جی میں شامل کیا گیا ہے اور مشن سے سرمایہ کاری کے طور پر ایس ایچ جی کو 29.03 کروڑ روپے فراہم کئے گئے ہیں ۔ 

 

 

سرینگر// ضلع سطح کی منظوری کمیٹی (ڈی ایل ایس سی) کا اجلاس ضلع ترقیاتی کمشنر سرینگر محمد اعجاز اسد کی صدارت میں منعقد ہوا۔اس موقع پر ڈپٹی کمشنر نے سرینگر ضلع کی اہل غیر شادی شدہ لڑکیوں کے حق میں شادی معاونت اسکیم کے تحت 16 مقدمات کی منظوری دی جن میں 7.63 لاکھ روپے شامل ہیں۔اس موقع پر خطاب کرتے ہوئے انہوں نے کہا کہ غریب لڑکیوں کیلئے شادی کی امدادی اسکیم ایک سماجی امدادی اسکیم ہے جو ان غیر شادی شدہ اہل لڑکیوں کیلئے ہے جو غربت کی لکیر سے نیچے زندگی گزار رہی ہیں جو شاید مالی تنگی کی وجہ سے خود کو شادی کی پوزیشن میں نہیں پائیں گی۔ ڈی سی نے متعلقہ افسران سے کہا کہ وہ ضلع کے غریب طبقے تک پہنچنے کی اپنی کوشش کو وسیع کریں تاکہ وہ اس اسکیم سے فائدہ اٹھائیں۔ انہوں نے مزید کہا کہ اس اسکیم کے تحت حکومت ان غریب خاندانوں کی مدد کر رہی ہے جو اپنی بیٹیوں کی شادی کے متحمل نہیں ہو سکتے۔ڈسٹرکٹ سوشل ویلفیئر افسر سرینگر محمد اشرف آخون نے اس اسکیم کے بارے میں تفصیلات دیتے ہوئے کہا کہ اس اسکیم کے تحت شادی کے لیے غریب خاندانوں سے تعلق رکھنے والی غیر شادی شدہ لڑکیوں کے حق میں 25000 روپے کی مالی امداد اور 5 گرام سونے کی قیمت فراہم کی جا رہی ہے۔انہوں نے بتایا کہ اس سکیم کے تحت اب تک ضلع سرینگر کے غریب خاندانوں سے تعلق رکھنے والی ایک ہزار اٹھارہ سے زائد لڑکیوں کی مالی مدد کی گئی ہے اور ان کے حق میں 4.22 کروڑ روپے سے زائد کی رقم منظور اور تقسیم کی جا چکی ہے۔میٹنگ میں چیف پلاننگ آفیسر سرینگر محمد یاسین لون ، ایس ڈی ایم ویسٹ سرینگر ، ڈی پی او ، آئی سی ڈی ایس سرینگر اور ڈسٹرکٹ سوشل ویلفیئر آفیسر سرینگر نے شرکت کی۔

 

سرینگر // جوائنٹ ڈائریکٹر محکمہ زراعت ڈاکٹر سید وسیم احمد شاہ نے سرینگر کے کچن گارڈن لال منڈی کا دورہ کیا۔دورے کے دوران انہوں نے کچن گارڈن کے مختلف (بلاکس) کا معائنہ کیا اور مختلف سبزیوں کی فصلوں کے بیجوں کی پیداوار کے علاوہ وہاں جاری نئی سرگرمیوں کا جائزہ لیا ۔انہوں نے متعلقہ افسران/عہدیداروں کے ساتھ بات چیت بھی کی اور پائیدار زراعت کی معیشت میں معیاری بیج کی اہمیت کا اعادہ کیا۔انہوںنے متعلقہ افسران سے کہا کہ وہ کچن گارڈن کے ساتھ دستیاب زمین کے زیادہ سے زیادہ استعمال کو یقینی بنائیں۔ انہوں نے افسران سے کہا کہ وہ بیج کی پیداوار کے مختلف جہتوں کو تلاش کریں اور کچن گارڈن کو محکمہ کے لیے آمدنی پیدا کرنے کا مرکز بنائیں۔ انہوں نے متعلقہ عملے کی کاوشوں کو بھی سراہا ۔جے ڈی کے ساتھ ڈپٹی ڈائریکٹر ایگریکلچر سینٹر کشمیر ، ظفر حکیم اور محکمہ کے کچھ سینئر افسران بھی تھے۔

 

 

سرینگر// انجمن فروغ اردو جموں و کشمیر ، پرائیویٹ اسکول ایسوسی ایشن جموں و کشمیر اورعائشہ علی اکادمی کنی پورہ کولگام کے باہمی اشتراک سے کولگام میں’ ارود اساتذہ کی صلاحیت سازی‘کے عنوان سے دو روزہ تربیتی ورکشاپ کا افتتاح عائشہ علی اکادمی  کنی پورہ کولگام میں عمل میں لایا گیا۔ورکشاپ کی افتتاحی نشست میں میر علی محمد شیدا(سرپرست اعلیٰ انجمن فروغ اردو جموں و کشمیر)، ڈاکٹر الطاف انجم (صدر )، غلام نبی شاکر(جنرل سیکریٹری ، پرائیوٹ اسکول ایسوسی ایشن جموں و کشمیر)، محمد یعقوب بٹ(پرنسپل تعلیمی آفیسر، ضلع کولگام)، محمد اشرف راتھر(ضلعی تعلیمی آفیسر ، ضلع کولگام)،ڈاکٹر صبیہ پڈر(ناظمہ ، عائشہ علی اکادمی)اور ڈاکٹر محی الدین زور(نائب صدرانجمن ، ضلع بڈگام) ، ڈاکٹر محمد حسین زرگر(نگراں ورکشاپ ، و نائب صدر ، ضلع کولگام)کے علاوہ کئی سارے ماہرین اردو زبان و ادب ، ریسرچ اسکالروں اور ضلع کولگام کے تعلیمی زونوں سے وابستہ تمام اردو اساتذہ نے شرکت کی ۔ ڈاکٹر صبیہ پڈر نے شرکا کا استقبال کیا ۔الطاف انجم نے انجمن اور اس ورکشاپ کے اغراض و مقاصد بیان کئے۔انہوں نے اردو زبان و ادب کی تعلیمی و تدریسی عمل میں سنجیدگی کے مظاہرے کو اردو زبان و ادب کی بقاء کے لیے ازحد ضروری قرار دیا۔ غلام بنی شاکر نے تاثراتی کلمات کا اظہار کرکے اردو زبان و ادب کی وسعت اور پھیلاؤ کو اردو دان طبقے کے لیے حوصلہ بخش قدم قرار دیا ۔انہوں نے انجمن کے پروگرام کو سراہتے ہوئے پرائیویٹ اسکول ایسوسی ایشن کی طرف سے بھر پور تعاون فراہم کرنے کا یقین ددلایا۔ شاکر نے اردو زبان کو انفرادی و اجتماعی تشخص کی بنیادی علامت قرار دے کر اس زبان کو صحیح طور پربولنے اور سیکھنے پر زور دیا ۔انہوں نے اساتذہ سے بچوں کو صحیح تلفظ اور املا وغیرہ کی درستگی سے واقف کرانے کی تلقین بھی کی۔نشست کے آخر میں میر علی محمد شیدا نے صدارتی خطبہ پیش کیا۔انہوں نے جہاں انجمن ، پرائیویٹ اسکول ایسوسی ایشن اور عائشہ علی اکادمی کو سراہا وہیں ورکشاپ میں شامل دوسرے شرکاء کو بھی اس طرح کے پروگراموں میں شرکت کرنے کی تلقین کی ۔موجودہ دور میں اردو زبان و ادب کی صورتحال ، اردو اساتذہ کی ذمہ داریاں اور اس زبان کی طرف سماج کو مائل کرنے کے طریقہ کار وغیرہ جیسے اہم اور غور طلب مسائل کے حوالے سے شیدا نے توجہ مبذول کرائی۔ورکشاپ کی پہلی تکنیکی نشست میں اردو زبان کے ماہرین نے مختلف موضوعات کے تحت اپنے خیالات کا اظہار کرکے شرکاء کو اردو زبان کی تعلیم و تدریس کے اہم اور لازمی نکات سے متعلق واقفیت بہم پہنچائی۔ محمد حسین زرگر نے ’’اردو حروف کی بنیادی شناخت:چند معروضات‘‘ کے حوالے سے قابلِ ستائش لکچر پیش کیا ۔انہوں نے اردو کے حروف تہجی، ان کا تلفظ، ان کی آواز اور شناخت کے دوسرے طریقے وغیرہ جیسے پہلوؤں کو انتہائی مدلل انداز میں پیش کیا۔ میر ساجد رمضان (لکچرر اردو ، ڈائٹ اننت ناگ)نے ’’اردواساتذہ کی پیشہ ورانہ خوبیاں:نئی قومی تعلیمی پالسی کے تناظر میں ‘‘ کے موضوع سے متعلق گفتگو کی ۔ 

 

 

 سرینگر//مقامی خبر رساں ایجنسی ’سی این آئی‘ کے ساتھ وابستہ جہانگیر خان کے والد کے انتقال پرنیوز ایجنسی کی جملہ ٹیم نے دکھ اور افسوس کااظہار کیا ہے ۔ اس سلسلے میں ایجنسی کے چیف ایڈیٹر بلال بزاز کی صدارت میں ایک تعزیتی میٹنگ منعقد ہوئی جس میں مرحوم کے حق میں دعائے مغفرت کی گئی ۔موصوف پی ایچ ای ایمپلائز ایسوسی ایشن کے جنرل سیکریٹری بھی رہ چکے ہیں۔

 

 

 

بڈگام //جموں و کشمیر  انتظامیہ کی جانب سے شروع کیے گئے عوامی آؤٹ ریچ پروگرام کے اقدام کو جاری رکھتے ہوئے ڈسٹرکٹ ڈیولپمنٹ کمشنر بڈگام شہباز احمد مرزا نے تحصیل چاڈورہ کا دورہ کیا تاکہ عوام کے مسائل ، مطالبات اور شکایات کا موقع پر جائزہ لیا جا سکے۔ ٹاؤن ہال چاڈورہ میں کیپیکس بجٹ کے تحت سب ڈویڑن کے تین شناخت شدہ مستحقین کے درمیان ایک ٹریکٹر اور دو موٹرائزڈ وینڈنگ کارٹس کے لیے چابیاں اور منظوری کے خطوط حوالے کیے۔ اسکیم کے اصولوں کے مطابق ہر ایک کو 50000 روپئے فراہم کیے گئے۔پروگرام میں سرپنچ ، پنچ ، پی آر آئی ورکر اور ٹریڈرز یونین سمیت کئی وفود جمع ہوئے تھے۔ڈی سی نے شکایات اور مطالبات کا جائزہ لیا ، بشمول ایس ڈی ایچ چاڈورہ میں مقامی عملے کی تعیناتی ، سڑک پر حفاظتی بند ، بلاک چاڈورہ میں کھیل کے میدانوں کی تعمیر ، اس کے علاوہ بنیادی سہولیات سے متعلق کئی دیگر مطالبات خاص طور پر پینے کے پانی کی فراہمی میں بہتری ، بجلی کی فراہمی اور مرمت /سڑکوں کی میکڈامائزیشن بھی اس کے نوٹس میں لائی گئی۔اس موقع پر خطاب کرتے ہوئے ڈی سی نے اجتماع کو یقین دلایا کہ ان کے حقیقی مطالبات کو ترجیحی بنیادوں پر لیا جائے گا اور حقیقی مطالبات کو جلد از جلد پورا کرنے کے لیے تمام کوششیں شروع کی جائیں گی۔انہوں نے جاؤنوروں کی پرورش اور این آر ایل ایم ڈیپارٹمنٹ پر زور دیا کہ وہ سب ڈویڑن میں عوامی فلاح و بہبود کے لیے دستیاب سکیموں اور فوائد سے متعلق آگاہی پروگرام کرے۔مزید یہ کہ ڈی سی نے تمام سٹیک ہولڈرز پر زور دیا کہ وہ معاشرے سے منشیات کی لت کے خاتمے کے لیے آگے آئیں۔ 

 

 

 

گاندربل//حکومت جموںوکشمیر کی طرف سے شروع کئے گئے ہفتہ وار بلاک دیوس اقدام کے ایک حصے کے طور پر ضلع ترقیاتی کمشنر گاندربل کرتیکا جیوتسنا نے منی سیکرٹریٹ کے کانفرنس ہال میں بلاک وکورا کے پی آر آئی نمائندوں کے ساتھ اِستفساری پروگرام منعقد کیا۔اِستفساری پروگرام کے دوران بی ڈی سی چیئرپرسن وکورا ، بلاک وکورا کے سرپنچوں اور پنچوں نے ضلع ترقیاتی کمشنر گاندربل کو آمدنی ، پانی کی فراہمی او ربجلی کی بہتری ، ناکارہ بور ویلوں کی مرمت ،سڑکوں کی بہتری ، واکورا گائوں میں سب سینٹر سے متعلق مختلف بنیادی مسائل اور عوامی اہمیت کے حامل دیگر مطالبات سے آگاہ کیا۔ضلع ترقیاتی کمشنر نے پی آرآئی کے پیش کردہ تمام مسائل و مطالبات بغور سنا اور متعلقہ اَفسران کو ہدایت دی کہ وہ اَپنے محکموں سے متعلقہ مسائل و شکایات کی ایک فہرست تیار کریں اور ایک ہفتے کے اندر اَپنے دائرہ اختیار میں ان کا ازالہ کریں۔ڈپٹی کمشنر نے مطالبات او راُٹھائے گئے مسائل کا جواب دیتے ہوئے اے سی ڈی کو ہدایت دی کہ وہ بین الصوبائی میٹنگیں منعقدکریں اور ان کاموں کی ایک جامع فہرست تیار کی جائے جن کو ترجیحی بنیادوں پر لیا جائے گا۔دریں اثنا ، ضلع ترقیاتی کمشنر نے بلاک وکورا میں جاری کاموں کی صورتحال کے بارے میں بھی معلومات حاصل کی اور بی ڈی او کو ہدایت دی کہ وہ باقاعدہ فیلڈ دوروں سے ان کاموں کی نگرانی کو یقینی بنائیں اور پی آر آئی پر زور دیا کہ وہ اَپنی پنچایتوں میں جاری کاموں کی نگرانی میں اَپنا فعال کردار ادا کریں۔اِستفساری پروگرام کے دوران موجودہ اَفسران میں اے ڈی ڈی سی پیر مظفر احمد ، اے ڈی سی فاروق احمد بابا ، اے سی ڈی ، اے سی پی ، ڈی وائی ایس پی ، ، مختلف وِنگوں کے اِنجینئران ، سی ایم او ، سی ای او ، تحصیلدار وکورا ، بی ڈی اور اور دیگر متعلقین شامل تھے۔

 

 

سرینگر // محکمہ اطلاعات کے کلچرل یونٹ (ڈی آئی پی آر) نے ذہنی امراض کے ہسپتال سرینگر اور اینجلس کلچرل اکیڈمی کے اشتراک سے منشیات کے استعمال سے متعلق ایک پروگرام کا اہتمام ذہنی امراض کے ہسپتال کاٹھی دروازہ میں کیا ۔اس موقع پر فنکاروں کی جانب سے ایک سٹریٹ پلے کا انعقاد بھی کیا گیا تاکہ لوگوں میں منشیات کے استعمال سے انسانوں کی صحت پرپڑھنے والے خطرناک نتائج کے بارے میں آگاہی پیدا کی جا سکے۔ فنکاروں نے اس دوران عام لوگوں ، خاص طور پر نوجوانوں ، طلباء مریضوں اور حاضرین کو مشورہ دیا کہ وہ منشیات کے استعمال کے حوالے سے ہر جگہ چوکس رہیں۔ بعد ازاں شرکاء میں ماسک بھی تقسیم کیے گئے۔پروگرام کے دوران ، شرکاء کو منشیات کے منفی اثرات کے بارے میں آگاہ کیا گیا۔ مدعوں مہمانوں نے نوجوانوں پر زور دیا کہ وہ ذہنی اور جسمانی صحت دونوں کے لیے کھیلوں سے متعلق سرگرمیوں میں حصہ لیں ۔انہوں نے منشیات کی لت میں مبتلا افراد پر زور دیا کہ وہ وہ خوشحال زندگی گزارنے کے لیے منشیات کے استعمال کو ترک کریں ۔

 

کولگام// ضلع انتظامیہ کولگام نے ضلع کے 3 بلاکوںپر مشتمل میگا بلاک دیوس کا اہتمام کیا جس میں دیوسر ، کولگام اور ڈی ایچ پورہ شامل ہیں۔اس موقع پر افسران اور اہلکاروں نے تینوں مقامات پر لوگوں کے مسائل ، شکایات اور بروقت ازالے کے مطالبات سنے۔دریں اثنا ، عوامی شکایات اور مطالبات کا پہلے سے جائزہ لینے کے لیے ، ڈپٹی کمشنر کولگام ڈاکٹر بلال محی الدین بٹ ٹاؤن ہال کولگام میں دستیاب رہے ، جہاں انہوں نے شکایات اور لوگوں کے مسائل کو دور کرنے کے لیے سنا۔ریڈونی ، زردی پورہ ، سرندو ، قائم بچرو ، چیلان اور دیگر ملحقہ علاقوں کے لوگوں نے ڈی سی کو پینے کے پانی کی سپلائی بڑھانے ، ریڈونی میں آبپاشی کنال کو صاف کرنے اور زردی پورہ ایچ ٹی پاور لائن کو بڑھانے کے علاوہ کئی دیگر مطالبات کے حق میں آگاہ کیا۔ڈی سی کی طرف سے مختلف مسائل اور شکایات کے فوری ازالے کے لیے موقع پر ہدایات جاری کی گئیں ، اس کے علاوہ کئی مسائل کا موقع پر ہی ازالہ بھی کیا گیا۔ڈی سی نے عوام کو آگاہ کیا کہ تمام گھرانوں کو جل جیون مشن کے تحت احاطہ کیا جائے گا اور ایک مقررہ وقت کے اندر نل کا پانی فراہم کیا جائے گا۔انہوں نے باغبانی کے افسران اور عہدیداروں کو یہ ہدایت دی کہ وہ لوگوں کی تکنیکی مدد کے لیے تمام اسٹیشنوں پر دستیاب رہیں اور خراب باغ کی پیش گوئی کے پیش نظر کیے جانے والے اقدامات کے بارے میں ان کی رہنمائی کریں۔

 

 

سرینگر//مراز ادبی سنگم کے الیکشن کمشنر کی نوٹیفکیشن کے مطابق 24اکتوبر 2021کو مراز ادبی سنگم کے صدر اور جنرل سیکریٹری عہدوں کیلئے انتخابات کو عمل میں لایا جانا تھاتاہم صدارتی عہدے کیلئے علی شیدا اور ڈاکٹر محمد شفیع ایاز نے کاغذات نامزدگی جمع کئے تھے اور جنرل سیکریٹری عہدے کیلئے اظہار مبشر کے خلاف کسی نے بھی کاغذات نامزدگی جمع نہیں کئے تھے۔ 19 اکتوبر کو نام واپس لینے کے آخری دن ڈاکٹر محمد شفیع ایاز نے کاغذات نامزدگی واپس نکالنے کے بعد الیکشن کمیشن نے بلا مقابلہ علی شیدا کو مراز ادبی سنگم کا صدر اور اظہار مبشر کو جنرل سیکریٹری کامیاب قرار دیا۔ الیکشن کمشنر مراز ادبی سنگم کلیم بشیر کے بیان کے مطابق حلف برداری کی رسم بہت جلد انجام دی جائے گی۔علی شیدا کا شمار جموں کشمیر کے ممتاز اور معتبر شعرا میں کیا جاتا ہے۔ علی شیدا کی اب تک اردو اور کشمیری زبانوں میں آٹھ شعری مجموعے شائع ہوچکے ہیں اور کئی تصانیف زیر طباعت ہیں۔اظہار مبشر 2009 سے 2017 تک مراز ادبی سنگم کے جنرل سیکریٹری رہے ہیں ۔اُن کااب تک ایک شعری مجموعہ شائع ہوا ہے اور دوسرے شعری مجموعہ کے علاوہ ایک افسانوی مجموعہ زیر طباعت ہے۔ 

 

 

 

سرینگر// نیشنل کانفرنس کے صدر ڈاکٹر فاروق عبداللہ نے سابق ممبر پارلیمنٹ خواجہ غلام قادر بٹ کی برسی پر مرحوم کو خراج عقیدت ادا کرتے ہوئے کہا کہ مرحوم نے مصائب کے طویل ترین دور دیکھاتھا لیکن اپنی تنظیم اور قیادت کے ساتھ ان کی وابستگی لامثال تھی۔پارٹی کے نائب صدر عمر عبداللہ ، جنرل سکریٹری علی محمد ساگر، معاون جنرل سکریٹری ڈاکٹر مصطفی کمال، سینئر لیڈران میاں الطاف احمد اور شیخ اشفاق جبار نے بھی مرحوم کو خراج عقیدت پیش کیا۔ مرحوم کے مقبرہ پر فاتحہ خوانی انجام دی گئی۔اس دوران ڈاکٹر فاروق عبداللہ، عمر عبداللہ ، ساگر، ناصر اسلم ، روح اللہ ، علی محمد ڈار، عبدلاحد ڈار، غلام نبی بٹ،منظور احمد وانی ، ڈاکٹر محمد شفیع، پروفیسر عبدالمجید متو، محمد ابراہیم اور سیف الدین بٹ نے پارٹی کے سرگرم رکن اور بلاک صدر بڈگام نذیر احمد گوگہ کی والدہ کے انتقال پر گہرے صدمے کا اظہار کیاہے ۔انہوں نے مرحومہ کے حق میں مغفرت کی دعا کی۔دریں اثناء دریں اثناء ڈاکٹر فاروق عبداللہ نے میاں محمد امین کے انتقال پر گہرے صدمے کا اظہار کیا ہے۔ انہوں نے اس سانحہ ارتحال پر مرحوم کے جملہ سوگواران خصوصاً میرواعظ محمد عمر فاروق کے ساتھ دلی تعزیت کا اظہار کیا ہے اور مرحوم کی جنت نشینی کیلئے دعا کی۔

 

 

 

 

 

 

 

اننت ناگ//مرکزی حکومت کے عوامی رَسائی پروگرام کے تحت  مرکزی وزیر مملکت جہاز رانی ، بندر گاہیں اور آبی گزر گاہیں شانتو ٹھاکر پہلگام کے 2روزہ دورے پر پہنچے ۔مرکزی وزیر مملکت نے مختلف لائن محکموں کے سٹالوں کا معائینہ کیا اور انہیں متعلقہ محکموں کی طرف سے چلائی جانے والی فلاحی سکیموں کے بارے میں جانکاری دی گئی ۔اُنہوںنے صنعتوں ، صحت و طبی تعلیم ، آر ڈی ڈی / این آر ایل ایم ، زراعت ، دستکاری ، ہینڈلوم ، پشو پالن ، بھیڑ پالن ، ماہی پالن شعبوں کے سٹالوں کا معائینہ کیا ۔ مرکزی وزیر مملکت موصوف نے مختلف فلاحی سکیموں کے مستحقین سے بات چیت کی اور سکیموں کی عمل آوری کا جائزہ لیا۔اُنہوں نے ایس بی ایم مستحقین میں چیک، انٹگریٹیڈ ڈیری ڈیولپمنٹ سکیم کے تحت دودھ وین سبسڈی پر، جسمانی طور مخصوص اَفراد میں وہیل چیئرس اور ہیئرنگ ایڈس ، صحت سکیم کے مستفید ین میں گولڈ ن کارڈ وغیرہ تقسیم کئے ۔ اِس موقعہ پر ڈی ڈی سی چیئرمین ایم وائی گورسی ، ضلع ترقیاتی کمشنر اننت ناگ پیوش گوئیل ، آر ٹی او کشمیر ، اے ڈی سی اننت ناگ ، بی ڈی سی اور ضلعی اِنتظامیہ کے دیگر اَفسران موجود تھے۔مرکزی وزیر مملکت شانتو ٹھاکر نے ہینڈ کرافٹس اور ہینڈ لوم کے سٹالوں کا بھی معائینہ کیا او رمقامی کاریگروں سے اِستفسار کیا ۔ وزیر کو جانکاری دی گئی کہ ضلع میں 28 ہینڈی کرافٹس اور 6ہینڈ لوم ٹریننگ سینٹر کام کر رہے ہیں تاکہ کاریگروں کی صلاحیت میں اِضافہ اور ہنر میں اِضافہ کیا جاسکے اور مقامی اِنتظامیہ کاریگروں کو ہر ممکن تعاون فراہم کر رہی ہے تاکہ وہ اَپنی مصنوعات کی اعلیٰ قیمت حاصل کرسکیں۔وزیر مملکت نے اجتماع سے خطاب کرتے ہوئے کہا کہ وہ حکومت کی طرف سے چلائی جانے والی مختلف فلاحی سکیموں کے مؤثر عمل آوری سے خوش ہیں ۔ اُنہوں نے عوام تک فوائد پہنچانے میں فرنٹ لائن ورکروں کی کوششوں کو سراہا۔

 

بانڈی پورہ//مرکزی وزیر مملکت برائے سماجی انصاف سشری پریتیما بھومک نے مرکزی حکومت کے جاری عوامی رسائی پروگرام کے حصے کے طور پر بانڈی پورہ ضلع کا دورہ کیا ۔ وزیر نے کئی سرگرمیوں میں حصہ لیا ، عوامی وفود سے ملاقات کی اور مختلف ترقیاتی پروجیکٹوں کا افتتاح کیا ۔ دورے کے دوران مرکزی وزیر مملکت نے 11.18 کروڑ روپے کی لاگت سے تعمیر کئے گئے ہائیر سکینڈری سکول سنبل کے تعلیمی کمپلیکس کا باضابطہ طور پر افتتاح کیا ۔ انہوں نے بالترتیب 70 لاکھ اور 15.39 لاکھ روپے کی لاگت سے سڑکوں کے بنیادی ڈھانچے کی ترقی اور دیہی علاقوں میں کھیل کے میدانوں کی ترقی کا افتتاح کیا ۔ انہوں نے دیہی علاقوں میں 18.79 لاکھ روپے کی لاگت سے آبپاشی اور پانی کے تحفظ کی سہولیات کی ترقی کا بھی افتتاح کیا ۔ 

 

نئی دہلی//کانگریس نے مرکز پرجموں کشمیرکی صورتحال کوقابو کرنے میں ناکام ہونے کا الزام لگاتے ہوئے جموں کشمیر کاریاستی درجہ بحال کرنے اور یہاں جمہوری طورحکومت کومنتخب کرنے کا مطالبہ کیا ہے۔پارٹی نے وزیرداخلہ کی 9فوجیوں اور32شہریوں کی ہلاکت پر خاموشی پر بھی اعتراض کیا۔کانگریس ترجمان گووروولبھ نے اخباری نمائندوں کوبتایا کہ 32شہریوں کو چن چن کر قتل کرنے اور 9فوجیوں کی ہلاکت کے بعد بھی وزیرداخلہ خاموش ہیں۔اس کا مطلب ہے کہ نہ ہی حکومت ہند جس کے براہ راست کنٹرول میں جموں کشمیر ہے،حالات کو سمجھ نہیں پارہی ہے اور نہ ہی صورتحال کو قابو کرسکتی ہے۔ انہوں نے مطالبہ کیا کہ جموں کشمیرکامکمل ریاستی درجہ فوری طوربحال کیا جائے اوریہاں جمہوری عمل کے ذریعے  ملک کے آئین  کے تحت حکومت ہونی چاہیے نہ کہ آئین کو یکطرف رکھکر۔انہوں نے غیرریاستی مزدوروں کے انخلاء پر کہا کہ جن لوگوں نے جموں کشمیر کوچھوڑاہے انہیں فوری طور مالی معاونت فراہم کی جائے اور انہیں واپسی کے مقام پرروزگار فراہم کیاجائے۔ انہوں نے کہا کہ حکومت ہند نے جموں کشمیر کی ترقی سے متعلق متعدد دعوے کئے،انہوں نے پوچھا کہ ملک میں روزگار کی شرح جموں کشمیرمیں ہی کم کیوں ہے اورجب سے یہ مرکز کے باہ راست کنٹرول میں آیا ہے یہاں سیاحوںکی آمد اور سرمایہ کاری میں کمی ہوئی ہے۔ولبھ نے کہا کہ جموں کشمیرمیں لوگوں کو چن چن کر اس لئے مارا جارہا ہے کیوں کہ مرکز ریاست کاانتظام چلانے میں ناکام ہوا ہے اور اس لئے جمہوری طور حکومتوں کومنتخب نہیں کیا جاتا ہے۔کانگریس رہنمانے کہا کہ حالات ایسے مقام پر پہنچ گئے ہیں اور مرکزی وزیرداخلہ خاموش ہیں۔ولبھ نے کہا کہ یہ جموں کشمیر میں اقتصادی سرگرمیوں کے عروج کا سیزن ہے اوراس وقت ایساہورہا ہے اوروزیرداخلہ خاموش ہیں۔انہوں نے کہا کہ وہ کیوں ان ہلاکتوں پربات نہیں کرتے۔پہلی بار یہاں چن چن کرلوگوں کو ماراجاتا ہے ۔اس سے طاہر ہے کہ حکومت ہندجموں کشمیرکی زمینی صورتحال کاادراک کرنے میں مکمل طور ناکام ہوئی ہے ۔ولبھ نے کہا کہ جموں کشمیرمیں بیروزگاری کی شرح 21.6فیصد ہے جو ملک میں سب سے زیادہ ہے اوریہ بھی اس بات کاعکاس ہے کہ حکومت ہند کومکمل طور کوئی ہمدردی نہیں ہے۔ 

 

سرینگر// سرینگر ضلع میں صحت سہولیات کو مستحکم بنانے کیلئے ڈپٹی کمشنر سرینگر نے چیف میڈیکل آفیسرسرینگرکو ایک جدیدایمبولنس حوالے کی۔یہ ایمبولنس نیشنل ہائی وے انفراسٹرکچرل ڈیولپمنٹ کارپوریشن لمیٹڈ نے حادثات کے موقعہ پر مریضوں کو لانے لیجانے کیلئے کارپوریٹ سماجی ذمہ داری کے تحت وقف کی ہے۔اس موقعہ پر ڈپٹی کمشنر نے کہا کہ یہ ایمبولنس مریضوں کو بروقت اسپتال پہنچانے میں کافی مدد گارثابت ہوگی۔اسی طرح ایک اور تقریب پر ایڈیشنل کمشنر کشمیر قاضی سرور نے بدھ کو ہائی وے انفراسٹرکچرل ڈیولپمنٹ کارپوریشن لمیٹڈکے ایگزیکیٹوڈائریکٹر گرجیت سنگھ کی موجودگی میں سیاحوں کے استقبالیہ مرکز سرینگرمیں دو جدید ایمبولنس گاڑیوں کوہری جھنڈی دکھا کر روانہ کیا۔ ہائی وے انفراسٹرکچرل ڈیولپمنٹ کارپوریشن لمیٹڈنے یہ گاڑیاں ضلع بارہ مولہ اورسرینگرمیں کارپوریٹ سماجی ذمہ داری کے تحت فراہم کی ہیں ۔یہ گاڑیاں سرینگراور بارہ مولہ اضلاع میں چلے گی ۔اسی طرح کی ایک اور ایمبولنس اس سال جنوری میں گاندربل ضلع کو فراہم کی گئی تھی جبکہ بارہ مولہ اوراننت ناگ اضلاع کو اپریل 2021میں ایسی ہی دوایمبولنس گاڑیاں پہلے ہی دی جاچکی ہیں۔ 

 

سرینگر//نیشنل کانفرنس نے موٹر سائیکل سواروں کیخلاف بے تحاشہ کریک ڈائون کی شدید الفاظ میں مذمت کرتے ہوئے کہا ہے کہ جس طرح سے تمام کاغذات اور لوازمات مکمل ہونے کے باوجود بھی سینکڑوں موٹر سائیکلوں کو ضبط کیا جارہا ہے وہ کشمیر میں لاقانونیت اور جوابدہی کے فقدان کی عکاسی کرتا ہے۔ پارٹی کی معاون ترجمان عفراء جان نے ایک بیان میں کہا کہ گذشتہ چند دنوں سے موٹر سائیکل سواروں کو روک کو موٹر سائیکل ضبط کئے جارہے ہیں اور جن لوگوں کے کاغذات اور دیگر لوازامات بھی مکمل ہوتے ہیں اُنہیں بھی بخشا نہیں جارہا ہے۔ نوجوانوں کو تنگ طلب کرنے کے اس نئے سلسلے پر زبردست تشویش کا اظہار کرتے ہوئے این سی ترجمان نے کہا کہ گذشتہ 3دن سے سینکڑوں کی تعداد میں نوجوان اور اُن کے والدین پولیس تھانوں کے باہر انتظار میں کھڑے رہتے ہیں ۔ انہوں نے کہا کہ موجودہ دور میں جب نوجوانوں میں مایوسی اور احساسِ بے گانگی کو دور کرنے کیلئے جامع منصوبے کی ضرورت ہے حکومت ایسے اقدامات میں مصروف ہیں جس سے نوجوانوں میں بداعتماد بڑھتی جارہی ہے اور نئی نسل مزید پشت بہ دیوار ہورہی ہے۔ این سی ترجمان نے کہا کہ حد تو یہ ہے کہ اب سیکورٹی کے نام پر معصوم بچوں کی بھی جامہ تلاشیاں لی جارہی ہے جو ایک انتہائی تشویشناک اور افسوسناک بات ہے۔

 

سرینگر//حریت کانفرنس(ع) کے چیئرمین میرواعظ مولوی محمدعمرفاروق کو ایک بار پھر دنیا کی بااثر500مسلم شخصیات میں شامل کیاگیا ہے۔میرواعظ کورائل اسلامک اسٹریٹجک اسٹیڈیز سینٹر، اردن نے مسلسل آٹھویں بارمسلم دنیا کی 500 با اثر شخصیات میں شامل کیا۔ رائل اسلامک اسٹریٹجک سینٹر، اردن کی جانب سے کہا گیا ہے کہ میرواعظ بھارت اور پاکستان دونوں ملکوں کے مابین بات چیت کی وکالت کررہے ہیں تاکہ دیرینہ مسئلہ کشمیر کو کشمیری عوام کی خواہشات اورامنگوں کے مطابق دائمی طورحل کیاجاسکے۔ایک بیان کیمطابق رائل اسلامک اسٹریٹجک سینٹر،اردن خاص طور سے میرواعظ کی نظر بندی اورگرفتاری کاذکر کرتے ہوئے کہا کہ حکام کی جانب سے موصوف کو اگست2019سے غیرقانونی طوراپنے گھر میں نظربندرکھاگیا ہے۔رائل اسلامک اسٹریٹجک سینٹر،اردن ایک آزاد تحقیقی ادارہ ہے جورائل آل البیت برائے اسلامک تھاٹ سے وابستہ ہے اورایک بین الاقوامی اسلامی غیرسرکاری ادارہ ہے،جس کی صدردفتر اردن کے دارلحکومت عمان میں ہے۔اس فہرست میں پہلے نمبرپرامیونولوجسٹ Ugur Sahin CEO of BionTech for developing Covid vaccine with Pfizer، کا نام ہے،اورانہیں ’مین آف دی ائر‘قراردیاگیا ہے جبکہ تنزانیہ کی موجودہ صدرسمیہ سلوہوحسن کو ’وومن آف دی ائر‘قراردیاگیا ہے۔دیگر شخصیات میں سعودی عرب کے شاہ سلمان،ایران کے آیت اللہ خامنی ،پاکستان کے وزیراعظم عمران خان اوراردن کے شاہ عبداللہ شامل ہیں۔اس دوران میرواعظ کے مسلم دنیا کی بااثر شخصیات کی  فہرست میں مسلسل انتخاب پر دنیا بھر کی اہم شخصیات کے مبارکبادی اور تہنیت کا سلسلہ جاری ہے۔

 

سرینگر//جب تک جموں وکشمیر کے لوگوں کے دلوں کی بات کو سمجھنے کی کوشش نہیں کی جائے گی تب تک یہاں امن قائم نہیں ہوسکتا ہے، جو لوگ اس بات میں یقین رکھتے ہیں کہ دھونس و دبائو سے یہاں حالات ٹھیک ہوںگے وہ بہت بڑی غلط فہمی میں مبتلا ہیں۔ ان باتوں کا اظہار نیشنل کانفرنس کے صدرڈاکٹر فاروق عبداللہ نے بانہال اور رام بن میں دو الگ الگ پارٹی کنونشنوں سے خطاب کرتے ہوئے کیا۔ایک بیان کے مطابق  ڈاکٹر فاروق عبداللہ نے کہا ، ’’یہ لوگ (مرکزی حکومت) کہتے تھے دفعہ370اور 35اے کی منسوخی کے بعد کشمیر میں امن ہی امن ہوگا۔ اگر ایسا ہے تو موجودہ حالات کیوں برپا ہوئے؟ آئے روز عام لوگوں کی ہلاکتیں کیوں ہورہی ہیں؟ یہ کیسے ہورہا ہے؟ یہاں تو سب کچھ ٹھیک ہونے والا تھا؟اگر یہ سمجھتے ہیں کہ دھونس و دبائو سے حالات ٹھیک ہوںگے تو یہ بہت بڑی غلط فہمی میں مبتلا ہیں، یہاں اُسی صورت میں امن قائم ہوسکتا ہے جب یہاں کے لوگوں کے دلوں کی بات کو سمجھا جائے گا‘‘۔جموں وکشمیر میں جاری مظالم پر زبردست برہمی کا اظہار کرتے ہوئے نیشنل کانفرنس صدرنے کہا کہ آنجہانی اٹل بہاری واجپائی نے کشمیر آکر جمہویت، انسانیت اور کشمیریت سے حل نکالنے کا اعلان کیا تھا۔ جو لوگ آج مرکز میں حکومت کررہے ہیں وہ تو اُنہی کے ساتھی ہیں اور اِن کی جماعت کے بانیوں میں تھے ۔کہاں ہے وہ جمہوریت، کہاں گئی وہ انسانیت اور کشمیریت؟انہوں نے کہا کہ یہ لوگ سمجھتے ہیں کہ دبانے سے ہم لوگ دب جائیں گے لیکن یہ ان کی غلط فہمی ہے، موت کا دن متعین ہے ، ہم ڈرنے والے نہیں ہیں۔ ہندوستان اور پاکستان کے درمیان اچھے تعلقات کی خواہش کا اظہار کرتے ہوئے ڈاکٹر فاروق عبداللہ نے کہا کہ اللہ کرے دونوں ملکوں کو عقل آجائے اور دونوں امن و امان میں رہ کر ترقی کریں۔ انہوں نے کہا کہ دونوں ملکوں کے درمیان رنجشوں اور تلخیوں کو آر پار عام لوگوں کو بھگتنا پڑتا ہے۔ انہوں نے دعا کی کہ اللہ تعالیٰ ہمیں موجودہ مشکلات سے نجات دیں ۔ ڈاکٹر فاروق عبداللہ نے پارٹی عہدیداروں اور کارکنوں پر زور دیا کہ وہ پارٹی کو مضبوط سے مضبوط بنائیں اور آزمائشوں کا ڈٹ کر مقابلہ کریں۔ 

 

 سر ینگر / / کو لگام کا ایک شہر ی36سال کے بعدگھر لوٹ آ یا ہے جس کے باعث پورا گائوں خوشی سے جھوم اٹھا۔ سی این ایس کے مطابق عبدالرشید راتھر ولد عبدالاحدراتھر ساکن سوپٹ ٹنگہ پورہ تحصیل دیوسر 36سال کے بعد گھر واپس لوٹا۔وہ 1985میں مزدوری کے لئے شملہ ہماچل چلا گیا تھا، اس وقت اسکی عمر 24 سال کے آس پاس تھی ،اس دوران اس نے وہاں ایک ٹرک ڈرائیو کے ساتھ بطور کنڈیکٹر کام کرنا شروع کیا،ڈرائیوری سیکھنے کے بعد 1990میں وہ ممبئی چلا گیا اور وہاں ملاڑ 95 علاقے میں سمیترا عرف سبینہ نامی لڑکی کے ساتھ شادی کرکے بطور گھر داماد رہ کر اپنی ازدواجی زندگی شروع کی ،تاہم اسکی بیوی شادی کے اٹھارہ سال بعد وفات پا گئی تاہم اسکے بطن کوئی اولاد پیدا نہیں ہو ئی،اب60 سال کی عمر میں پورے36 سال کے بعد وہ اپنے آبائی گاؤں واپس لوٹا۔ گاؤں میں خوشی کی لہر دوڑنے کے ساتھ ساتھ گذشتہ دوروز سے اسکے گھر میں لوگوں کا تانتا بندھا رہا، لیکن بد قسمتی سے وہ والدین کے فوت ہونے کے باعث ان کا دیدار نہیں کرسکا۔

 

سرینگر//محکمہ سماجی بہبود کی جانب سے حالیہ میں شائع کردہ حکمنامہ کے خلاف جسمانی طور ناخیز افراد نے احتجاج کرتے ہوئے واضح کر دیا کہ ان کے مطالبات کو 10  دنوں میں پورا نہ کیا گیا تو بھوک ہڑتال شروع ہوگی ۔ جموں کشمیر ہینڈی کپیڈ ایسوی ایشن کے بینر تلے درجنوں جسمانی طور نا ا خیز افراد بدھ کو سری نگر کی کی پریس کالو نی میں نمودار ہوئے جنہوںنے محکمہ سوشل ویلفیئر اور عمومی انتظامی محکمہ کے خلاف زور دا ر احتجاج کیا اور نعر ہ بازی کی۔ میڈیا سے بات کرتے ہوئے ایسوسی ایشن کے صدر عبد الرشید بٹ نے لیفٹنٹ گورنر انتظامیہ سے بھی اپیل کی ہے کہ ہمیں ’’معذور‘‘ کہنا بند کر دیا جائے کیونکہ ان لوگوں کے ساتھ نا انصافی ہو رہی ہے ۔ انہوں نے کہا کہ حال ہی میں محکمہ سماج بہبودی کی جانب سے ایک حکمنامہ جاری کر دیا گیا جس میں جسمانی طور پر نا خیز افراد کے ساتھ نا انصافی کی گئی ۔ انہوںنے کہا کہ ہمارے ساتھ ہر جگہ ایسا ہی سلوک روا رکھا جا رہا ہے اور ہماری طرف کوئی بھی دھیان نہیں دیا جاتا ہے ۔ جس کے نتیجے میں ہم در در کی ٹھوکریں کھانے پر مجبور ہو رہے ہیں۔ عبد الرشید بٹ ے کہا کہ ہم ایک مرتبہ پھر لیفٹنٹ گورنر انتظامیہ سے اپیل کرتے ہیںکہ اس معاملے میں ذاتی مداخلت کریں بصورت دیگر ہم سڑکوں پر نکلنے کیلئے مجبور ہو جائیںگے۔

 

سرینگر//پیپلزکانفرنس کے صدرسجادغنی لو ن نے کہا ہے کہ شہری ہلاکتوں پرمیں شرمسار ہوں اور آگے کیا ہوسکتاہے اس سے مجھے خوف آتاہے۔وادی میں ہرسو خوف وہراس کا ماحول ہے اورپورے بھارت نے کشمیر سے منہ پھیرلیا ہے اور سو گیا ہے۔ایک انٹرویو میں سجاد غنی لون نے کہا میں وادی میں نشانہ بنا کر ہلاک کئے جانے کے واقعات پر شرمسار ہوں لیکن یہ بھی خوف ہے کہ آگے کیا ہوسکتا ہے۔سجاد لون نے کہاکہ مجھے محسوس ہورہا ہے کہ ’’بدترین ابھی ختم نہیں ہوا ہے‘‘۔یہ پوچھے جانے پرکہ کیا انہیں مزید شہری ہلاکتوں اورخوف کاخدشہ ہے ،انہوں نے کہا کہ وہ اس کو خارج ازامکان قرار نہیں دے سکتے اور اسی کی انہیں فکر ہے۔ کرن تھاپر کے ساتھ 35منٹ کے ایک انٹرویو میں انہوں نے کہا کہ باقی بھارت کے لوگوں نے اپنامنہ پھیرلیا ہے اورکشمیرکے لوگوں کو مایوس کیا ہے۔انہوں نے کہا،’’وہ سونے چلے گئے ہیں‘‘۔لیکن حقیقت یہی ہے کہ بھارت کے لوگوں کا دبائو ہی مودی حکومت کے رویہ کو بدلا سکتا ہے جووہ کشمیر کے ساتھ روا رکھے ہوئے ہیں ۔لیفٹینٹ گورنر انتظامیہ کے بارے میں بات کرتے ہوئے انہوں نے کہا ،’’یہ دوسرے سیارے پر ہے‘‘۔لون نے کہا کہ انتظامیہ کشمیر ی لوگوں کو سمجھتی نہیں اور بہت سے معاملوں میں باہر کے افسر اور پولیس حکام لائے گئے ہیں کو اچھے لوگ ہوسکتے ہیں لیکن وہ کشمیر کے زمینی حقائق سے نابلد ہے اوران کا کشمیری لوگوں سے رابطہ نہیں ہے ۔انہوں نے کہا کہ700یا800افراد کی اجتماعی گرفتاری کسی معاملے کاحل نہیں ہے اور اس سے لوگوں میں بیگانگی پیدا ہوتی ہے۔

 

 سر ینگر / /  ر وشنی ایکٹ کے تحت سرکاری زمین پر قبضہ کرنے کا الزام لگانے پر پی ڈی پی صدر محبوبہ مفتی نے جموں و کشمیر کے سابق گورنر ستیہ پال ملک کے خلاف مقدمہ درج کر نے کا اعلان کیا ہے۔ سی این ایس کے مطابق ستیہ پال ملک، جو اس وقت میگھالیہ کے گورنر ہیں، نے محبوبہ مفتی پر روشنی ایکٹ کے تحت سرکاری زمین پر قبضہ کرنے کا الزام لگا یا ہے۔محبوبہ مفتی نے ایک ٹویٹ کے ذریعے ان الزامات کو مسترد کرتے ہوئے کہا ہے کہ میرے روشنی ایکٹ سے مستفید ہونے سے متعلق ستیہ پال ملک کی باتیں سراسر غلط ہیں۔ میری قانونی ٹیم اس بیان پر ستیہ پال ملک کے خلاف مقدمہ دائر کرنے کی تیاریاں کر رہی ہے۔ انہوں نے کہا کہ موصوف گورنر کو اختیار ہے کہ وہ اپنے بیان کو واپس لے سکتے ہیں، بصورت دیگر میں ان کے خلاف قانونی چارہ جوئی کروں گی۔محبوبہ مفتی نے اپنے ٹویٹر ہینڈل پر ستیہ پال ملک کے بیان کے اس حصے کا ویڈیو بھی اپ لوڈ کیا ہے، جس میں وہ ان (محبوبہ مفتی) پر روشنی ایکٹ کے تحت زمین پر قبضہ کرنے کا الزام لگاتے ہیں۔

 

بانڈی پورہ//عازم جان//لاوے پورہ  بانڈی پورہ میں باسی وازہ وان کھانے کے بعد 40افراد بیمار ہوگئے اور انہیں قے،دست اور پیچس کی شکایت ہوگئی۔ضلع بانڈی پورہ کے لاوے پورہ گائوں میں شادی کی ایک تقریب میں وازہ وان کھانے کے بعد 40مہمانوں نے دست،قے اور پیچش کی شکایت کی اورانہیں فوری طور ضلع اسپتال بانڈی پورہ پہنچایا گیا ۔اسپتال ذرائع کے مطابق علاج کے پہلے مرحلے میں 20مریضوں کاعلاج کرکے انہیں رخصت کیاگیا جبکہ مابعد مزید 14افراد کو علاج کے بعد اسپتال سے چھٹی دی گئی۔ضلع اسپتال بانڈی پورہ کے سپرانٹنڈنٹ ڈاکٹر شیخ مشتاق احمد نے کہا کہ اب اسپتال میں صرف چھ مریض ہیں جن کا علاج ہورہا ہے۔انہوں نے کہا کہ فوری طور پرطبی ٹیم کولاوے پورہ روانہ کیاگیا ہے جو اس معاملے کی جانچ پڑتال کرے گی۔

 

بانڈی پورہ//عازم جان //ارن دردپورہ بانڈی پورہ میں ایک خاتون بجلی کی تار سے چھوجانے کی وجہ سے لقمہ اجل بن گئی۔معلوم ہوا ہے کہ ارن دردپورہ بانڈی پورہ میں تین بچوں کی ماں 27برس کی منیرہ زوجہ ریاض احمد گوجرگھرمیں کوئی کام کررہی تھیں کہ ا س دوران اس کاجسم اچانک بجلی کی تار سے چھوگیااوروہ بے ہوش ہوکر گرپڑی۔اگر چہ اُسے فوری طور اسپتال لیجایاگیا لیکن ڈاکٹروں نے اُسے وہاں مردہ قرار دیا۔ 

 

 اوڑی//  ظفر اقبال//پہلی پورہ بونیاراوڑی میں ایک کارکے سڑک سے پھسل جانے سے دو افراد زخمی ہوگئے ، جن میں سے ایک کی حالت تشویشناک ہے۔معلوم ہوا ہے کہ ایک مارووتی کارزیرنمبرJK05B-7717 سڑک پرپھسل گئی جس کے نتیجے میں پہلی پورہ بونیار کااعجازاحمد اورروہامہ رفیع آباد کامحمد آصف زخمی ہوگئے۔دونوں کوپبلک ہیلتھ سینٹر شیری لایاگیاجہاں ابتدائی مرہم پٹی کے بعد زخمیوں کو گورنمنٹ میڈیکل کالج بارہ مولہ منتقل کیاگیا۔بلاک میڈیکل آفیسر شیری ڈاکٹر رودیانا نے کشمیر عظمی کو بتایا کہ دونوں کو پی ایچ سی شیری میں ابتدائی علاج کے بعد بہتر علاج کے لیے جی ایم سی بارہمولہ منتقل کیا گیا ہے۔ میڈیکل آفیسر نے بتایا کہ زخمیوں میں سے ایک محمد آصف کو سر پر چوٹیں آئی ہیں اور اس کی حالت ابھی تک نازک معلوم ہوتی ہے۔  

 

سرینگر//جموں کشمیر سیمنٹس کے سابق نائب چیئرمین اور سابق پیپلزکانفرنس رہنما انجینئرنذیراحمد ایتو نے کہا ہے کہ جموں کشمیر کاپن بجلی پرکافی زیادہ انحصار ہے ۔ریاست کی پن بجلی پیداکرنے کی صلاحیت20000میگاواٹ ہے لیکن صرف2439میگاواٹ بجلی ہی پیدا کرپاتی ہے۔ایک بیان میں انہوں نے کہا کہ اس کے علاوہ بجلی کی زیادہ پیداوار این ایچ پی سی کے بجلی گھروں سے پیدا ہوتی ہے جو اس کا کثیرحصہ جموں کشمیر سے باہر منتقل کرتا ہے اورریاست میں اکثر  موسم سرما میںبجلی کی کٹوتی ہوتی ہے جب بجلی کی مانگ1900میگاواٹ تک بڑھ جاتی ہے ۔انجینئریتونے کہا کہ یہ کافی دردناک ہے جموں کشمیرمیں بجلی پیداکرنے کے بہترین وسائل ہونے کے باوجودیہ ملک میں بجلی کی پیداوارمیں پیچھے ہے اورلوگوں کو چوبیسوں گھنٹے بجلی مہیا نہیں ہوتی۔

 

کپوارہ//لولاب کپواڑہ منگل کی سہ پہر 20 فٹ گہرے کنویں میں گرے،کالے ریچھ کی نعش تقریبا ً18 گھنٹوں کے بعد برآمد کی گئی کیونکہ بقول مقامی لوگوںکے محکمہ وائلڈ لائف کو فوری طور پر اطلاع دینے کے باوجود متعلقہ محکمہ اس جنگلی جانورکوبچانے میں ناکام رہا۔محکمہ وائلڈلائف کے متعلقہ رینجرنے فیلڈعملہ کولاپرواہی کامرتکب قرار دیتے ہوئے بتایاکہ غلطی کرنے والے ملازمین کے خلاف کارروائی کی جائے گی۔جے کے این ایس کے مطابق منگل سہ پہر وادی لولاب کے وانی ڈورئو س گائوں کے کمار محلہ میں ایک کالا ریچھ اچانک ایک گہرے کنویں میں گرگیا۔ مقامی لوگوں نے بتایا کہ انہوں نے فوری طورپر محکمہ وائلڈ لائف کے افسران کو آگاہ کیا ، تاہم وہ موقعہ پرنہیں پہنچے۔انہوںنے کہا?