ابتدائی طبی امداد اور منشیات سے چھٹکارا

سرینگر//جموں و کشمیر کے کالجوں اور ہائر سیکنڈری اسکولوں میں این ایس ایس افسران کیلئے ایک ہفتہ طویل پروگرام کشمیر یونیورسٹی میں اختتام پذیر ہوا۔یہ پہلی بار ہوا ہے کہ یونیورسٹی کے نیشنل سروس اسکیم (NSS) کے دفتر نے اعلیٰ ثانوی اسکولوں کے اساتذہ کو ابتدائی طبی امداد اور منشیات سے چھٹکارا پانے سمیت کلیدی شعبوں میں تربیت کے لیے شامل کیا ہے۔ دفتر اس طرح کے پروگراموں کو حقیقی معنوں میں زمینی سطح پر بہتر نتائج کے لیے لے جانے کا ارادہ رکھتا ہے۔یونیورسٹی کے رجسٹرار ڈاکٹر نثار اے میر، جو اختتامی سیشن کے مہمان خصوصی تھے، نے این ایس ایس کے وسیع ڈومینز میں اسٹیک ہولڈرز کی استعداد کار بڑھانے کے لیے اس طرح کی تقریبات کے انعقاد میں کشمیر یونیورسٹی کے اہم کردار پر روشنی ڈالی۔ انہوں نے کشمیر یونیورسٹی کے NSS کوآرڈی نیٹر ڈاکٹر مصور احمد اور ان کی ٹیم کو کالج اور اسکول کے اساتذہ کے لیے اس طرح کی تقریبات کا انعقاد کرنے پر مبارکباد دی۔ سپرنٹنڈنٹ پولیس حضرت بل ارشاد احمد جو اس موقع پر مہمان خصوصی تھے، نے اساتذہ کی سماجی ذمہ داریوں کے بارے میں بات کی۔ انہوں نے کہا کہ محکمہ پولیس منشیات کی اسمگلنگ پر سخت نظر رکھے ہوئے ہے اور لوگوں کو چوکس رہنے اور منشیات کی لعنت کو ختم کرنے میں قانون نافذ کرنے والے اداروں کی مدد کرنے کی ضرورت ہے۔اس پروگرام میں جموں و کشمیر کے مختلف اضلاع کے کالجوں اور ہائیر سیکنڈری اسکولوں کے 30 شرکاء نے شرکت کی، جن میں ڈوڈہ، کشتواڑ، رام بن، پونچھ اور سرینگر شامل ہیں۔تقریب تقسیم اسناد کے اختتام پر ڈاکٹر مصور نے پروگرام کی جھلکیاں پیش کیں، جس میں ابتدائی طبی امداد اور بنیادی زندگی کی معاونت، ڈیزاسٹر رسپانس، منشیات سے نجات اور مشاورت، سوشل میڈیا کا ذمہ دارانہ استعمال اور ماہرین کے سیشن شامل تھے۔