طلاب کو جنگ زدہ ملک سے ایئر فورس طیاروں سے واپس لانے کا فیصلہ
نئی دہلی// یوکرین پر روسی فوجی کارروائی کے دوران ہندوستان کیلئے ایک افسوسناک پیشرفت میں کرناٹک کے ایک طالب علم نوین کی ہلاکت ہوئی ہے۔ وزارت خارجہ ترجمان ارندم باگچی نے ٹویٹ کرکے کہا’’بڑے افسوس کے ساتھ ہم اس بات کی تصدیق کرتے ہیں کہ خارکیف شہر میںمنگل کی صبح فائرنگ میں ایک ہندوستانی طالب علم کی موت ہوگئی۔وزارت متوفی کے سوگوار خاندان کے ساتھ رابطے میں ہے ‘‘۔ باگچی نے کہا،‘‘ہم طالب علم کے خاندان کے تئیں گہری تعزیت کا اظہار کرتے ہیں‘‘۔واضح رہے کہ یوکرین میں ہندوستان کے قریب 18 ہزار طلبہ ہیں ،جنہیں واپس لانے کیلئے حکومت ‘آپریشن گنگا’ چلا رہی ہے ۔وہاں پھنسے ہندوستانی شہریوں کو مغربی یوکرین سے متصل رومانیہ ،ہنگری،پولینڈ جیسے ملکوں میں داخل ہونے کو کہا گیا ہے ،جہاں سے ہندوستانی افسر ان انکی واپسی کے سفر کا انتظام کررہے ہیں ۔ باگچی نے کہا ہے کہ خارجہ سکریٹری ہرش وردھن شرنگلا نے روس اور یوکرین کے سفیروں سے بات کرکے ہندوستانیوں کو وہاں سے صحیح سلامت نکالنے میں مدد کرنے کی اپیل کی ہے ۔ہندوستان نے اب تک 9,000 سے زیادہ شہریوں کو جنگ زدہ یوکرین سے نکالا ہے ۔منگل کی صبح خارکیف میں ایک طالب علم کی فائرنگ میں ہوئی موت کے بعد ہندوستانی طلباء کے محفوظ انخلاء میں خارکیف اور ارد گرد کے شہروں میں جنگ کی صورتحال ایک بڑی رکاوٹ بنی ہوئی ہے ۔ ادھر یوکرین میں پھنسے ہندوستانی طلباء کو واپس لانے کے کام کو تیز کرنے کیلئے حکومت نے فضائیہ کے ٹرانسپورٹ طیاروں کو شامل کرنے کی ہدایت دی ہے ۔ فضائیہ کے طیارے یوکرین میں انسانی امدادی سامان لے جانے کے لیے بھی استعمال ہوں گے ۔ یہ طیارے ہندوستان سے امدادی سامان لے کر جائیں گے اور واپسی کے دوران ہندوستانی طلباء کو وہاں سے واپس لائیں گے ۔ فضائیہ منگل سے ہی اس کے لیے اپنے بڑے کارگو طیاروں سی-17 کا استعمال کرے گی۔ ان طیاروں کو آپریشن میں شامل کرنے کا سب سے بڑا فائدہ یہ ہوگا کہ طلباء کی ایک بڑی تعداد کو بیک وقت واپس لایا جا سکے گا۔ یہ کام کم وقت میں مکمل ہوگا۔یوکرین میں ہندوستانی سفارت خانے نے منگل کو تمام ہندوستانی شہریوں اور طلبہ سے کہا کہ وہ جلد از جلد دارالحکومت کیف چھوڑ دیں۔ہندوستانی سفارت خانے نے اپنے آفیشل ٹویٹر اکاؤنٹ میں لکھا،‘یوکرین کے دارالحکومت کیف میں رہنے والے ہندوستانیوں کو فوری طور پر نکل جانے کا مشورہ دیا جاتا ہے ۔ انہیں یہاں سے ٹرین یا ٹرانسپورٹ کے دوسرے ذرائع سے جانے کی صلاح دی گئی ہے‘۔تاہم ہندوستانی طلباء اور دیگر غیر ملکیوں کو کیف میں ٹرینوں میں سوار ہونے کی اجازت نہیں دی جارہی ہے۔انش پنڈتا نامی طالب علم نے ویڈیو میں بتایا کہ ہندوستانی طالب علم ہندوستانی سفارت خانے کے مشورے پر ریلوے اسٹیشن آئے تھے ۔انہوں نے بتایا کہ "گارڈز ہندوستانیوں یا غیر ملکی شہریوں کو اجازت نہیں دے رہے ہیں۔
درماندہ کشمیری و طلاب
اہل خانہ کیلئے ہیلپ لائن قائم
نیوز ڈیسک
سرینگر//صوبائی اِنتظامیہ کشمیر نے کشمیر کے اُن باشندوں اور طلاب کیلئے ایک ہیلپ لائن قائم کی ، جو یوکرین میں درماندہ ہیں۔حکومت کی طرف سے کسی بھی مدد کی صورت میں متعلقہ افراد اور ان کے اہل خانہ 0194-2457312 اور0194-2473135 فون نمبرات پر رابطہ قائم کرسکتے ہیں۔
