2022 سے اب تک یو اے پی اے کے تحت 23 افراد کو ’دہشت گرد‘ نامزد کیا گیا: وزارتِ داخلہ

سری نگر// مرکزی وزارت داخلہ نے منگل کو کہا کہ 2022 سے اب تک غیر قانونی سرگرمیاں (روک تھام) ایکٹ (یو اے پی اے) کے تحت 23 افراد کو دہشت گرد نامزد کیا گیا ہے۔
مرکزی وزیر مملکت برائے داخلہ نتیانند رائے نے لوک سبھا میں ایک جواب میں کہا کہ یو اے پی اے 1967 کے تحت 23 افراد کو دہشت گرد نامزد کیا گیا ہے اور ان کے نام ایکٹ کے فورتھ شیڈول میں شامل کیے گئے ہیں۔
23 نامزد ’دہشت گردوں‘ میں سے تین کا تعلق جیش محمد تنظیم سے، پانچ کا لشکر طبیہ سے اور چھ کا حزب المجاہدین تنظیم سے ہے۔
لشکر طیبہ کے دہشت گردوں میں حافظ طلحہ ، شیخ سجاد عرف سجاد گل، حبیب اللہ ملک، محمد امین خبیب اور ارباز احمد میر شامل ہیں۔
جیش محمد سے وابستہ افراد میں محی الدین اورنگزیب عالمگیر، عاشق حسین نینگرو اور علی کاشف جان شامل ہیں۔
حزب المجاہدین سے وابستہ افراد میں امتیاز احمد کنڈو، شوکت احمد شیخ، باسط احمد ریشی، بشیر احمد پیر عرف امتیاز عالم، ارشاد احمد عرف ادریس اور آصف مقبول ڈارڈاکٹر شامل ہیں۔
دیگر تنظیموں سے تعلق رکھنے والوں میں العمر المجاہدین/جے کے ایل ایف کے مشتاق احمد زرگر عرف لترام، البدر کے ارجمند گلزار ڈار، تحریک المجاہدین کے نفیق نائی عرف سلطان، حرکت الجہاد کے ظفر اقبال عرف سلیم شامل ہیں۔
اسلامی، جے کے آئی ایف کے بلال احمد بیگ بابر، طارق المجاہدین کے شیخ جمیل الرحمٰن، القاعدہ کے اعجاز احمد آہنگر، خالصتان ٹائیگر فورس کے ارشدیپ سنگھ گل عرف عرش دلا اور بابر خالصہ انٹرنیشنل کے ہرویندر سنگھ سندھو شامل ہیں۔