یو این آئی
نئی دہلی//مرکز نے دہلی، کیرالہ اور مہاراشٹر سمیت سات ریاستوں کو خط لکھ کر ملک میں بڑھتے ہوئے کووڈ انفیکشن پر تشویش کا اظہار کیا ہے اور انہیں آئندہ تہوار کے موسم میں محتاط رہنے کو کہا ہے ۔مرکزی وزارت صحت و خاندانی فلاح و بہبود نے ہفتہ کو یہاں کہا کہ وزارت کے سکریٹری راجیش بھوشن نے دہلی، کرناٹک، تلنگانہ، مہاراشٹرا، کیرالہ، اڈیشہ اور تمل ناڈو کے پرنسپل سکریٹریز اور ہیلتھ سکریٹریوں کو الگ الگ خط لکھے ہیں۔ مسٹر بھوشن نے ہر ریاست کے ان اضلاع کی الگ الگ تفصیلات بتائی ہیں، جہاں پچھلے ایک مہینے میں کووڈ انفیکشن میں تیزی سے اضافہ ہوا ہے ۔خطوط میں کہا گیا ہے کہ تمام ریاستوں کو آئندہ تہوار کے موسم کے پیش نظر اضافی چوکسی اختیار کرنی چاہئے اور کووڈ کے اصولوں پر سختی سے عمل کرنا چاہئے ۔ ریاستوں کو چاہیے کہ وہ متاثرہ افراد کے علاج کے لیے مناسب انتظامات کریں اور پورے طریقہ کار پر عمل کریں۔ اس کے علاوہ کووڈ ویکسینیشن پر خصوصی زور دیا جانا چاہیے ۔ ریاستوں کو چاہیے کہ وہ تمام مشتبہ افراد کے جمع کردہ نمونے اسکیننگ کے لیے بھیجیں۔مسٹر بھوشن نے کہا ہے کہ ملک میں کووڈ انفیکشن سے نمٹنے کے لیے وسائل کی کوئی کمی نہیں ہے ۔ ریاستوں کو ان کا بھرپور استعمال کرنا چاہیے ۔
