کنی ٹینگ کالونی بجبہاڑہ میں بجلی نظام درہم برہم

 بجبہاڑہ//بجبہاڑہ اننت ناگ کے کنی ٹینگ کالونی شالگام میں بجلی کی ترسیلی لائنیں لکڑی کے عارضی کھمبوں پر لٹکی ہوئی ہیں، جو کبھی بھی کسی حادثے کا سبب بن سکتی ہیں۔مقامی لوگوں کا کہناہے کہ بجلی نظام کی اس خستہ حالی سے اب لوگ پریشان ہیں جس کی وجہ سے ان کے بچوں کی تعلیم پر بھی منفی اثرات مرتب ہو ر ہے ہیں۔ لوگوں نے کہا کہ معمولی ہوائوںسے بجلی کی ترسیلی لائنیں زمین پر گر جاتی ہیں اورپھر ہفتے بھر بجلی غائب رہتی ہے۔ علاقے میں بجلی ٹرانسفارمر کا بھی فقدان ہے، لیکن محکمہ ان سے برابر بجلی فیس وصول کر رہا ہے۔ اس ضمن میں محکمہ پی ڈی ڈی کے اسسٹنٹ ایگزیکٹوانجینئر بشیر احمد نے کہا کہ علاقہ کے تعلق سے ایک منصوبہ بنایا ہے اور جیسے ہی حکومت کی جانب سے پیسے واگزار کئے جائیں گئے، علاقہ میں کھمبے نصب کئے جائیں گے ۔