ڈی سی رام بن کا ناشری میں کوویڈ سیمپلنگ سنٹر کا معائنہ

رام بن//ڈپٹی کمشنر رام بن مسرت اسلام نے نمونے لینے کے عمل میں پیشرفت کا معائنہ کرنے کے لئے بٹوت کے ناشری میں کوویڈ سمپلنگ سنٹر کا دورہ کیا۔انفیکشن کی دوسری لہر کے پیش نظر رام بن ضلع میں کوویڈ کے نمونے لینے کا عمل تیز کردیا گیا ہے اور ممکنہ معاملات کا پتہ لگانے کے لئے مسافروں ، ڈرائیوروں اور کنڈیکٹرز کی بھرپور جانچ کی جارہی ہے۔ضلعی انتظامیہ نے انٹر ڈسٹرکٹ اور انٹرا ڈسٹرکٹ مسافروں کی بے ترتیب جانچ کے لئے جواہر ٹنل ، ریلوے سٹیشن بانہال اور چنانی ناشری سرنگ کے شمالی پورٹل میں کوویڈ ٹیسٹنگ کی سہولیات قائم کی ہیں۔مرکز کا معائنہ کرتے ہوئے ڈی سی نے ہیلتھ افسران کو ہدایت کی کہ وہ مثبت معاملے کی نشاندہی کرنے کے لئے آر ٹی پی سی آر اور ریپڈ اینٹی جن ٹیسٹ کے نمونے اکٹھا کرنے میں تمام تر احتیاط برتیں جو ضلع میں کوویڈ 19 انفیکشن کے پھیلاؤ کو روکنے میں مددگار ثابت ہوگی۔