سمت بھارگو
راجوری//جموں و کشمیر پولیس کے ڈائریکٹر جنرل دلباغ سنگھ کے ساتھ ساتھ نیشنل انویسٹی گیشن ایجنسی (این آئی اے) کی ایک اعلیٰ سطحی ٹیم نے پونچھ ضلع میں مینڈھر سب ڈویژن کے بھاٹہ دھوڑیاں جنگلات میں فوجی گاڑی پر حملے کی جگہ کا دورہ کیا۔ڈی آئی جی رینک کے افسر کی سربراہی میں این آئی اے کی ٹیم نے فوج کی گاڑی پر حملے کی جگہ کا دورہ کیا اور جائے وقوع کا معائنہ کیا اور مجموعی حالات کا بھی جائزہ لیا۔دوسری طرف پولیس کے ڈائریکٹر جنرل دلباغ سنگھ نے بھی حملے کی جگہ کا دورہ کیا جب ان کے ساتھ اے ڈی جی جموں زون مکیش سنگھ، ڈی آئی جی راجوری پونچھ رینج، ڈاکٹر حسیب مغل، ایس ایس پی پونچھ روہت باسکوترا اور دیگر سینئر افسران تھے۔
ڈی جی پی بعد میں راجوری پہنچے جہاں انہوں نے سیکورٹی فورس کے افسران کے ساتھ میٹنگ کے سلسلے کی صدارت کی اور مجموعی سیکورٹی صورتحال اور خطے میں شروع کی گئی جارحانہ انسداد دہشت گردی کارروائیوں کا جائزہ لیا۔
