عظمیٰ نیوز سروس
جموں// جموں و کشمیر پولیس نے ایک پبلک نوٹس جاری کیا ہے جس میں شادی کی تقریب میں شرکت کرنے والے لوگوں سے معلومات، ویڈیو ریکارڈنگ اور تصاویر طلب کی ہیں جہاں نیشنل کانفرنس صدر فاروق عبداللہ پر قاتلانہ حملہ کیا گیا تھا۔پولیس نے گریٹر کیلاش علاقے میں شادی کی تقریب میں عبداللہ پر فائرنگ کے حالیہ واقعہ کی تحقیقات کے لیے ایک خصوصی تحقیقاتی ٹیم (SIT) تشکیل دی ہے۔رینج ہیڈ کوارٹر جموں سانبہ کٹھوعہ کی طرف سے جاری نوٹس کے مطابق، ڈی آئی جی شیو کمار شرما نے تقریب میں موجود تمام مہمانوں، ارکان اسمبلی، یا کسی کے پاس بھی ڈیجیٹل ثبوت یا واقعہ سے متعلق معلومات رکھنے والوں سے اپیل کی کہ وہ اسے تحقیقاتی ایجنسی کے ساتھ شیئر کریں۔انہوں نے کہا کہ اس مقصد کے لیے فراہم کردہ رابطہ نمبر 9419150173، 9419131379، اور 9419186210 شامل ہیں۔ڈی آئی جی نے بتایا کہ یہ واقعہ 11 مارچ کو جموں کے گریٹر کیلاش کے رائل پارک میں ایک شادی کے دوران پیش آیا۔
پولیس اسٹیشن گنگیال نے معاملے کے سلسلے میں ایف آئی آر درج کی ہے، اور معاملے کی جانچ کے لیے ایک خصوصی تحقیقاتی ٹیم (ایس آئی ٹی)تشکیل دی گئی ہے۔انہوں نے اس بات پر زور دیا کہ عوامی تعاون اہم ثبوت اکٹھا کرنے اور شفاف تحقیقات کو یقینی بنانے میں SIT کی نمایاں مدد کرے گا۔جموں زون کے انسپکٹر جنرل آف پولیس (آئی جی پی)بھیم سین ٹوٹی نے اتوار کو اس معاملے کی “سنجیدگی اور حساسیت” کو دیکھتے ہوئے ڈپٹی انسپکٹر جنرل آف پولیس، جموں سانبہ کٹھوعہ رینج کی نگرانی میں ایس آئی ٹی کے قیام کا حکم دیا۔اس واقعہ میں 63 سالہ ملزم جس کی شناخت کمل سنگھ کے نام سے ہوئی ہے، کو موقع پر ہی گرفتار کر لیا گیا۔ اس کے قبضے سے واردات میں استعمال ہونے والا ریوالور برآمد ہوا۔
