ٹرمپ نے پومپیو کا شمالی کوریا کا دورہ منسوخ کیا

واشنگٹن//امریکی صدر ڈونلڈ ٹرمپ نے وزیر خارجہ مائیک پومپیو کا شمالی کوریا کا دورہ منسوخ کر دیا ہے اور پہلی بار عوامی طور پر اعتراف کیا ہے کہ شمالی کوریا کو نیوکلیائی ہتھیاروں سے پاک کرنے کی ان کی کوشش پر پوری طرح سے عمل نہیں ہوا ہے ۔امریکی صدر نے جمعہ کو ایک ٹویٹ میں کہا کہ جزیرہ نما کوریا کو جوہری ہتھیاروں سے پاک کرنے کی سمت میں کافی پیش رفت نہیں ہوئی ہے ۔. انہوں نے اس کے لئے جزوی طور پر چین کو قصوروار ٹھہراتے ہوئے کہا کہ وزیر خارجہ پومپیو کی قیادت میں شمالی کوریا کے ساتھ بات چیت اب چین کے ساتھ تجارتی تعلقات بہتر بنانے کے بعد ہی کی جائے گی۔ انہوں نے کہا کہ چین نے امریکہ کے ساتھ تجارتی کشیدگی کی وجہ سے شمالی کوریا پر کافی دباؤ نہیں بنایا۔مسٹر ٹرمپ نے کہا، "میں نے وزیر خارجہ مائیک پومپیو کو اس وقت شمالی کوریا نہ جانے کو کہا ہے کیونکہ مجھے لگتا ہے کہ جزیرہ نما کوریا کے جوہری ہتھیار ختم کرنے کی سمت میں کافی پیش رفت نہیں ہوئی ہے ۔"واضح رہے کہ مسٹر پومپیو کو شمالی کوریا کے لئے مقرر خصوصی ایلچی اسٹیفن بیگن کے ساتھ اگلے ہفتے شمالی کوریا جانا تھا۔ یہ امریکی وزیر خارجہ کا شمالی کوریا کا چوتھا دورہ ہوتا۔اگرچہ شمالی کوریا کے رہنما کم جونگ-اُن سے ان کی ملاقات نہیں ہونی تھی۔