عظمیٰ نیوز سروس
سرینگر// وزیر اعظم نریندر مودی نے ہفتہ کے روز جموں و کشمیر کرکٹ ٹیم کو اپنا پہلا رانجی ٹرافی ٹائٹل جیتنے پر مبارکباد دیتے ہوئے اس کامیابی کو مرکز کے زیر انتظام علاقے کے لئے ایک قابل فخر اور تاریخی لمحہ قرار دیا۔ایکس پر ایک پوسٹ میں، وزیر اعظم نے ٹیم کے شاندار حوصلہ، نظم و ضبط اور جذبے کی تعریف کی جو ان کی پہلی رانجی ٹرافی جیتنے کا باعث بنی۔انہوں نے کہا کہ یہ فتح جموں و کشمیر میں کھیلوں کے بڑھتے ہوئے ٹیلنٹ اور جوش کی عکاسی کرتی ہے اور اسے یہاں کے لوگوں کے لیے ایک قابل فخر لمحہ قرار دیا ہے۔ پی ایم مودی نے امید ظاہر کی کہ یہ تاریخی کارنامہ پورے خطے کے نوجوان کھلاڑیوں کو بڑے خواب دیکھنے اور کھیلوں کو فعال طور پر آگے بڑھانے کی ترغیب دے گا۔
