تاخیر کے ذمہ دار ٹھیکیداروں پر کارروائی ہوگی،ترقیاتی منصوبوں کی معیاد بند تکمیل حکومت کی ترجیح: سریندر چوہدری
سمت بھارگو
راجوری//جموں و کشمیر حکومت نے یونین ٹریٹری بھر میں جاری اہم ترقیاتی منصوبوں میں غیر معمولی تاخیر اور ناقص کارکردگی پر سخت موقف اختیار کرتے ہوئے لاپرواہی برتنے والے ٹھیکیداروں کے خلاف قانونی کارروائی کا فیصلہ کیا ہے۔ سریندر چوہدری، نائب وزیر اعلیٰ جموں و کشمیر، نے نوشہرہ کے مختلف ترقیاتی منصوبوں کا موقع پر جا کر معائنہ کیا اور جاری کاموں کی رفتار و معیار پر شدید ناراضگی کا اظہار کیا۔نائب وزیر اعلیٰ نے اپنے دورے کے دوران کئی اہم منصوبوں کا جائزہ لیا جن میں نئے تعمیر شدہ سب ڈسٹرکٹ ہسپتال کی عمارت سمیت متعدد ترقیاتی اسکیمیں شامل تھیں۔
انہوں نے متعلقہ افسران اور تعمیراتی ایجنسیوں سے منصوبوں کی موجودہ صورتحال، کام کی رفتار اور معیار کے بارے میں تفصیلی معلومات حاصل کیں۔معائنے کے دوران سریندر چوہدری نے کہا کہ مختلف منصوبوں میں کئی خامیاں اور تکنیکی نقائص طویل عرصے سے موجود ہیں، مگر ان کی اصلاح کے لئے سنجیدہ اقدامات نہیں کئے گئے۔ انہوں نے افسوس ظاہر کرتے ہوئے کہا کہ کئی منصوبے ایسے ہیں جو تقریباً تعطل کا شکار ہو چکے ہیں، جس کے باعث عوام کو شدید مشکلات کا سامنا کرنا پڑ رہا ہے جبکہ خطے کی ترقی بھی متاثر ہو رہی ہے۔انہوں نے واضح الفاظ میں کہا کہ ترقیاتی کاموں میں سست رفتاری اور غیر ذمہ دارانہ طرزِ عمل کسی بھی صورت برداشت نہیں کیا جائے گا۔ ان کے مطابق عوامی فلاح و بہبود سے جڑے منصوبوں میں تاخیر دراصل عوامی مفاد کو نقصان پہنچانے کے مترادف ہے، اس لیے حکومت اب ایسے ٹھیکیداروں کے خلاف سخت قانونی کارروائی کرے گی جو اپنی ذمہ داریاں احسن طریقے سے انجام دینے میں ناکام رہے ہیں۔نائب وزیر اعلیٰ نے کہا کہ حکومت کی اولین ترجیح یہ ہے کہ ترقیاتی منصوبے مقررہ مدت کے اندر مکمل ہوں تاکہ عوام کو بروقت سہولیات فراہم کی جا سکیں۔ انہوں نے کہا کہ سڑکوں، صحت، بجلی، پانی اور دیگر بنیادی شعبوں سے متعلق منصوبے عوام کی روزمرہ زندگی سے براہِ راست جڑے ہوئے ہیں، لہٰذا ان میں کسی قسم کی غفلت ناقابل قبول ہے۔انہوں نے متعلقہ محکموں کو سخت ہدایات جاری کرتے ہوئے کہا کہ تمام جاری منصوبوں کی مسلسل نگرانی کی جائے اور ہر مرحلے پر جوابدہی کو یقینی بنایا جائے۔
انہوں نے افسران کو ہدایت دی کہ تعمیراتی کاموں کے معیار پر خصوصی توجہ دی جائے اور جہاں کہیں بھی کوتاہی یا بے ضابطگی پائی جائے وہاں فوری کارروائی عمل میں لائی جائے۔سریندر چوہدری نے اس بات پر بھی زور دیا کہ عوامی فنڈز کا صحیح استعمال یقینی بنانا حکومت کی ذمہ داری ہے اور ترقیاتی منصوبوں میں شفافیت برقرار رکھنے کے لیے تمام متعلقہ اداروں کو متحرک کردار ادا کرنا ہوگا۔ انہوں نے کہا کہ حکومت چاہتی ہے کہ ترقیاتی عمل تیز رفتار، شفاف اور نتیجہ خیز ہو تاکہ عوام کو زمینی سطح پر اس کے مثبت اثرات محسوس ہوں۔مقامی عوام نے نائب وزیر اعلیٰ کے اس دورے اور سخت موقف کو خوش آئند قرار دیتے ہوئے امید ظاہر کی کہ حکومت کی اس کارروائی سے نہ صرف زیر التوا منصوبے مکمل ہوں گے بلکہ ترقیاتی کاموں میں معیار اور رفتار بھی بہتر ہوگی۔ عوامی حلقوں کا کہنا ہے کہ اگر حکومت واقعی سخت نگرانی اور جوابدہی کا نظام نافذ کرتی ہے تو اس سے خطے میں ترقیاتی عمل کو نئی رفتار مل سکتی ہے۔
