عظمیٰ نیوز سروس
سرینگر// ملک مخالف پروپیگنڈے اور علیحدگی پسندوں کی غلط معلومات کے خلاف ایک بڑے کریک ڈان میں، خصوصی این آئی اے عدالت، سرینگر نے ملک مخالف پروپیگنڈہ کیس میں مفرور ملزمان کے خلاف ضابطہ فوجداری کی دفعہ 82 کے تحت تین ملزمین کو اشتہاری قرار دیا ہے جن میں کپوارہ کی ایک خاتون بھی ہے۔یہ کارروائی اس وقت ہوئی جب ملزمین عدالت میں پیش نہیں ہوئے۔ ایک بیان میں، CIK کے ایک ترجمان نے کہا کہ این آئی اے ایکٹ،کے تحت نامزد خصوصی جج کی عدالت نے پولیس سٹیشن کانٹر انٹیلی جنس(کشمیر)کی ایف آئی آر نمبر 07/2020 میں ملزمین کے خلاف ضابطہ فوجداری، 1973 کی دفعہ 82 کے تحت ایک اعلامیہ جاری کیا ہے۔یہ مقدمہ آئی پی سی کی دفعہ 153-A اور 505 اور غیر قانونی سرگرمیاں(روک تھام) ایکٹ کی دفعہ 13 کے تحت سنگین جرائم سے متعلق ہے۔ ایف آئی آر قابل اعتماد انٹیلی جنس معلومات کی بنیاد پر درج کی گئی تھی جس میں وادی کشمیر کے اندر اور باہر علیحدگی پسند قوتوں کی ایما پر کام کرنے والے سماج دشمن اور ملک دشمن عناصر کی طرف سے ایک منظم سازش کا انکشاف کیا گیا تھا۔تحقیقات سے یہ بات سامنے آئی ہے کہ یہ عناصر نیوز پورٹلز، صحافیوں اور فری لانسرز کا روپ دھار رہے تھے، جبکہ حقیقت میں فیس بک، ایکس(سابقہ ٹویٹر) اور واٹس ایپ جیسے سوشل میڈیا پلیٹ فارمز کو جعلی، حوصلہ افزائی، مبالغہ آمیز، علیحدگی پسند اور سیاق و سباق سے ہٹ کر مواد بنانے، اپ لوڈ کرنے اور پھیلا رہے تھے۔ اس ڈیجیٹل غلط معلومات کی مہم کا دانستہ مقصد سڑکوں پر تشدد کو ہوا دینا، عام زندگی کو درہم برہم کرنا، عوامی املاک کو نقصان پہنچانا، امن عامہ کو خراب کرنا اور بڑے پیمانے پر بدامنی کو ہوا دینا، اس طرح ملک دشمن جذبات کو فروغ دینا اور یونین آف انڈیا کے خلاف عدم اطمینان پیدا کرنے کے مقصد سے علیحدگی پسند ایجنڈے کو آگے بڑھانا تھا۔جن افراد کو الزامات کے تحت اشتہاری قرار دیا گیا ہے ان میںمبین احمد شاہ ولد مرحوم علی محمد شاہ ڈاک والی کالونی جواہر نگر، عزیز الحسن عشائی عرف ٹونی عشائی، ولد نذیر احمد عشائی، ساکن ڈاک والی کالونی جواہر نگر اور رفعت وانی دختر غلام محمد وانی ساکن ترہگام، ضلع کپواڑہ شامل ہیں۔وارنٹ گرفتاری کے اجرا کے بعد ملزمان زیر زمین چلے گئے اور قانون کی عملداری سے بچنے کے لیے مفرور ہیں۔ خصوصی این آئی اے عدالت نے اب سیکشن 82 سی آر پی سی کے تحت ایک اعلامیہ جاری کیا ہے، جس میں ملزمان کو 31جنوری یا اس سے پہلے عدالت میں حاضر ہونے کی ہدایت کی گئی ہے۔ تعمیل کرنے میں ناکامی سیکشن 83 سی آر پی سی کے تحت سخت کارروائی بشمول جائیداد کی اٹیچمنٹ ہو گی۔بیان میں مزید کہا گیا ہے، مفرور قرار دیے جانے کے باوجود، ملزمان مبینہ طور پر اپنی مخالفانہ سرگرمیاں جاری رکھے ہوئے ہیں اور سوشل میڈیا پلیٹ فارمز پر سرگرم رہتے ہیں، جہاں وہ بڑے پیمانے پر تشدد کو بھڑکانے اور جموں و کشمیر کے مرکز کے زیر انتظام علاقے میں امن عامہ کو غیر مستحکم کرنے کے ارادے سے جھوٹے، من گھڑت اور اشتعال انگیز مواد پھیلاتے رہتے ہیں۔
