معروف کشمیری لیپرو سکوپک سرجن

سرینگر// وادی کشمیر کے معروف لیپرو سکوپک اور بیریا ٹرک سرجن پروفیسر ڈاکٹر مشتاق چالکو کو یوم جمہوریہ کے موقع پر قومی پیٹنٹ ایوارڈ سے سرفراز کیا گیا۔انہیں مرکزی حکومت کی طرف سے یہ ایوارڈ ‘چالکو ریٹریکٹر ان منی لیپ کو لیسیسٹیکٹومی’ کے اعزاز میں دیا گیا جبکہ جموں و کشمیر حکومت نے بھی ‘لیپرو سکوپی اینڈ مینمل ایکسس سرجری’ میں نئی اختراعات متعارف کرنے کے اعزاز میں انہیں ‘سرٹیفیکیٹ آف اونر’ سے سرفراز کیا ہے ۔موصوف ڈاکٹر نے حاصل کرنے پر کہا کہ یہ میری مسلسل محنت اور انتھک کاوشوں کا نتیجہ ہے کہ مجھے اس ایوارڈ سے نوازا گیا۔انہوں نے کہا کہ میں نے آٹھ سال قبل یہ بیج بویا تھا جس نے آج پھل دیا ہے اور اس سے نئی نسل فیضیاب ہوگی۔ ڈاکٹر مشتاق چالکو کو لیپرو سکوپی اینڈ منیمل ایکسس سرجری میں مہارت حاصل ہے اور وہ گورنمنٹ میڈٰکل کالج سرینگر میں پروفیسر کی حیثیت سے اپنے فرائض انجام دے رہے ہیں۔موصوف کو جراحی کی دنیا میں ‘چالکو تکنیک’ متعارف کرنے کے اعزاز میں ایک ریاستی ایوارڈ سے بھی نوازا گیا ہے اور وہ ملک کی زائد از پانچ انجمنوں کے ساتھ وابستہ ہیں۔انہوں نے قریب 34 مقالوں کا جائزہ لیا اور ان کی 64 سائنسی اشاعتیں شائع ہوئی ہیں نیز انہوں نے زائد از ایک سو کانفرنسوں میں شرکت کی ہے ۔ڈاکٹر مشتاق چالکو ایک سنجیدہ محقق ہونے کے علاوہ بہت ہی اچھے شاعر اور مقرر بھی ہیں۔