عظمیٰ نیوز سروس
سری نگر//جموں و کشمیر میں جاری شدید گرمی کے پیش نظر محکمہ تعلیم نے سکولوں کے لئے گائیڈ لائنز جاری کی ہیں۔ گائیڈ لائنز میں کہا گیا ہے کہ بچے گرمی سے زیادہ متاثر ہوتے ہیں اور انہیں بڑوں سے کم پسینہ آتا ہے ۔گائیڈ لائنز میں سکول سربراہان سے کہا گیا ہے کہ وہ بچوں کے تحفظ کے لئے چند نکات پر عملدر آمد کو یقینی بنائیں۔ان نکات میں سکولوں میں بچوں کے لئے پانی پینے کے لئے متواتر وقفے رکھنا، بچوں کو 11 سے صبح سے 4 بجے تک براہ راست سورج سے دور رکھنا، بیرونی سرگرمیوں کو محدود کرنا، اس بات کو یقینی بنانا کہ کھیل کا میدان یا سکول فرنیچر زیادہ گرم نہیں ہے اور کلاس روموں میں درجہ حرارت کو مانیٹر کرنا شامل ہے ۔سکول سربراہان سے کہا گیا ہے کہ بچوں کو پیاس محسوس نہ ہونے کے باوجود بھی پانی پینے کی تاکید کریں۔سکول سربراہان کو چھوٹے بچوں، جسمانی طور معذور بچوں اور مریض بچوں کا خاص خیال رکھنے کی ہدایت دی گئی ہے نیز ان سے کہا گیا ہے کہ وہ گرمی کی بیماری کی علامات پر بھی باریک بینی سے نگاہ رکھیں۔
