عظمیٰ نیوز سروس
مانچسٹر// برطانوی حکام نے مانچسٹر ایئرپورٹ پر کارروائی کرتے ہوئے 10 لاکھ پاؤنڈ مالیت کی کوکین برآمد کرلی، منشیات کو ایک الیکٹرک وہیل چیئر میں مہارت سے چھپایا گیا تھا، لیکن ایئرپورٹ سیکیورٹی اسکیننگ کے دوران یہ کوشش ناکام ہوگئی۔غیر ملکی میڈیا رپورٹس کے مطابق بارباڈوس سے مانچسٹر پہنچنے والی ایک پرواز کے 56 سالہ پرتگالی مسافر کی وہیل چیئر کو اسکین کیا گیا، جس میں سے 12 کلو گرام وزنی کوکین کے 11 پیکٹس برآمد ہوئے۔ حکام نے فوری کارروائی کرتے ہوئے مذکورہ شخص کو گرفتار کرلیا اور اس کے خلاف منشیات اسمگلنگ کا مقدمہ درج کرلیا گیا۔برطانیہ کی نیشنل کرائم ایجنسی (NCA) نے کوکین کی برآمدگی کی تصدیق کرتے ہوئے ضبط شدہ الیکٹرک وہیل چیئر اور کوکین پیکٹس کی تصاویر بھی جاری کی ہیں۔ این سی اے کے مطابق، یہ گرفتاری منشیات کی اسمگلنگ کے خلاف جاری کارروائیوں کا حصہ ہے اور مزید تفتیش جاری ہے۔گرفتار پرتگالی شہری کو 6 مئی کو مانچسٹر کراؤن کورٹ میں پیش کیا جائے گا، جہاں اس کے خلاف مقدمہ چلایا جائے گا۔حکام نے مزید تفصیلات فراہم نہیں کیں، تاہم تحقیقات کا دائرہ وسیع کیے جانے کا امکان ہے۔
