نئی دہلی// فٹ بال کی دنیا نے ایڈسن آرانٹس ڈو نیسکیمینٹو عرف پیلے کے انتقال پر سوگ کا اظہار کیا ہے ، جو اب تک کے سب سے بڑے فٹبالر اور تین ورلڈ کپ جیتنے والے واحد کھلاڑی تھے ۔ان کی بیٹی کیلی ناسیمینٹو نے سوشل میڈیا پر ان کی موت کی اطلاع دی۔ پیلے کینسر سے لڑ رہے تھے ۔ انہیں 29 نومبر کو ساؤ پالو کے البرٹ آئن اسٹائن ہسپتال میں داخل کرایا گیا تھا۔دنیا میں فٹ بال کا بے تاج بادشاہ یا فٹ بال کا جادوگر بڑی آنت کے کینسر میں مبتلا تھا اور ان کے جسم کے بیشتر حصوں نے کام کرنا چھوڑ دیا تھا۔اُن کی آخری رسومات پیر اور منگل کو ادا کی جائینگی۔پیلے کے ہم وطن نیمار نے ان کو خراج عقیدت پیش کرتے ہوئے انسٹاگرام پر لکھاکہ “وہ چلے گئے لیکن ان کا جادو برقرار ہے ۔
پیلے ہمیشہ موجود رہیں گے ۔ میں کہوں گا کہ پیلے سے پہلے فٹ بال صرف ایک کھیل تھا۔ پیلے نے فٹ بال کو فن اور تفریح میں بدل دیا۔”برازیل کے عظیم فٹبالر پیلے جمعرات کو ساؤ پالو کے البرٹ آئن سٹائن ہسپتال میں کینسر کے علاج کے دوران انتقال کر گئے ۔ پیلے اور نیمار برازیل کے لیے سب سے زیادہ 77 گول اسکور کرنے والے کھلاڑی ہیں۔پرتگال کے کرسٹیانو رونالڈو نے کہا کہ پیلے کی یاد ہم سب فٹ بال شائقین میں ہمیشہ زندہ رہے گی۔مانچسٹر یونائیٹڈ اور ریال میڈرڈ کے سابق فارورڈ نے انسٹاگرام پر لکھاکہ “ابدی کنگ پیلے کو محض ‘الوداع’ اس درد کے اظہار کے لیے کبھی بھی کافی نہیں ہوگا جو اس وقت پوری فٹ بال کی دنیا محسوس کر رہی ہے ۔ اتنے لاکھوں لوگوں کے لیے ایک تحریک تم، کل، آج اور ہمیشہ۔ تم نے ہمیشہ مجھے جو پیار دکھایا ہے وہ ہر لمحے میں تھا جو ہم نے دور سے بھی شیئر کیا تھا۔”رونالڈو نے کہاکہ”انہیں کبھی فراموش نہیں کیا جائے گا اور ان کی یاد ہم سب فٹ بال شائقین کے دلوں میں ہمیشہ زندہ رہے گی۔ کنگ پیلے کی روح کو سکون ملے ۔’’ادھر برازیل کے صدر جیر بولسونارو نے تین بار کے عالمی فٹ بال چیمپئن پیلے کے اعزاز میں تین دن کے قومی سوگ کا اعلان کیا ہے ۔
