عظمیٰ نیوزسروس
جموں//نائب وزیر اعلیٰ سریندر کمار چودھری نے مریضوں کو فراہم کی جانے والی طبی سہولیات کا جائیزہ لینے کیلئے گورنمنٹ میڈیکل کالج اور سپر سپیشلٹی ہسپتال جموں کا وسیع دورہ کیا ۔ جی ایم سی اور سپر سپیشلٹی ہسپتال میں معائینہ کے دوران نائب وزیر اعلیٰ نے کینسر کئیر یونٹ اور کارڈیک کئیر یونٹ کا دورہ کیا وہاں دستیاب سہولیات ، انفراسٹرکچر ، آلات ، مریضوں کی دیکھ بھال کی خدمات اور صفائی ستھرائی کے معیار کا جائیزہ لیا ۔ انہوں نے مریضوں کے ساتھ بھی بات چیت کی تا کہ ان کو فراہم کی جانے والی سہولیات کے بارے میں جانکاری حاصل کی جا سکے ۔ ہسپتال انتظامیہ کے ساتھ بات کرتے ہوئے نائب وزیر اعلیٰ نے عوام کو ہسپتال میں دستیاب تمام سہولیات فراہم کرنے کی ہدایت دی انہوں نے کہا کہ وہ مریضوں اور تیمارداروں کی آسانی کیلئے تمام تشخیصی ٹیسٹیوں کی شرحوں کو آویزاں رکھیں ۔ انہوں نے افسران سے ہم آہنگی کے ساتھ کام کرنے اور اس بات کو یقینی بنانے کیلئے کہا کہ معاشرے کے تمام طبقات کو سستی ، قابل رسائی اور اعلیٰ معیار کی طبی سہولیات کی فراہمی کیلئے ہر ممکن کوشش کی جائے ۔ نائب وزیر اعلیٰ نے صحت کی دیکھ بھال کی سہولیات میں صفائی ستھرائی اور حفظانِ صحت کو برقرار رکھنے کی ضرورت پر بھی زور دیا ۔ انہوں نے زور دیا کہ صحت کے اداروں میں صاف ستھرا ماحول برقرار رکھنے کیلئے سخت اقدامات اٹھائیں ۔ جی ایم سی کے پرنسپل اور فیکلٹی ممبران ، مختلف شعبوں کے سربراہ ، میڈیکل سپرنٹینڈنٹ اور دیگر متعلقہ افسران بھی اس دورے کے دوران نائب وزیر اعلیٰ کے ہمراہ تھے ۔
