شہر میں قائم سی ایس سی سنٹروں کا اچانک معائنہ

سرینگر//ڈپٹی کمشنر سرینگر محمد اعجاز اسد کی ہدایت پر ضلع انتظامیہ کے سینئر افسران کی ایک ٹیم نے ایڈیشنل ضلع ترقیاتی کمشنر  گلزار احمد کی سربراہی میں جمعرات کومختلف کامن سروس سینٹروں (سی ایس سی) کا اچانک معائنہ کیا۔ شہر کے مختلف علاقوں میں عوامی ترسیل کے نظام کے حوالے سے ان کے کام کاج کی نگرانی کیلئے ٹیم نے شہید گنج، لالچوک گھنٹہ گھر، ڈل گیٹ، خانیار اور شہر کے دیگر علاقوں میں مختلف CSC مراکز کا معائنہ کیا۔سی ایس سی مراکز کا معائنہ کرتے ہوئے اے ڈی ڈی سی نے گولڈن کارڈ جاری کرنے اور ای شرام پورٹل پر غیر منظم کارکنوں کے رجسٹریشن کے عمل کا جائزہ لیا۔اس موقع پر اے ڈی ڈی سی نے ضلعی کوآرڈی نیٹروں سے کہا کہ وہ رجسٹریشن کے عمل کو بہتر بنائیں اور مقررہ مدت میں ہدف کو پورا کریں تاکہ تمام مستفیدین اس سکیم کے تحت آئیں۔انہوں نے کہا کہ جو بھی اپنے مراکز کی تعمیل نہیں کرے گا اس کا اندراج ختم کر دیا جائے گا اور یہاں تک کہ سیل کر دیا جائے گا۔