یو این آئی
نئی دہلی/چنئی سپر کنگز (سی ایس کے ) کے مداحوں کے لیے افسوسناک خبر ہے کہ اسٹار وکٹ کیپر بلے باز مہندر سنگھ دھونی منگل کو دہلی کیپیٹلز کے خلاف ہونے والے میچ کے لیے ٹیم کے ہمراہ نئی دہلی نہیں آئے ہیں۔ سابق کپتان نے چنئی میں ہی قیام کا فیصلہ کیا ہے جہاں وہ اپنی پنڈلی کی انجری سے نجات کے لیے ری ہیبیلیٹیشن (علاج) کے عمل سے گزر رہے ہیں۔اگرچہ دھونی دہلی کے خلاف میچ کے لیے دستیاب نہیں ہیں، تاہم فرنچائز حکام نے رواں سیزن میں ان کی شرکت کے امکانات کو مسترد نہیں کیا ہے ۔ ٹیم کے ایک سینئر عہدیدار نے ‘کرک بز’ کو بتایا کہ “دھونی کو ٹورنامنٹ کے کسی نہ کسی مرحلے پر دستیاب ہونا چاہیے ۔ چنئی سپر کنگز کو رواں سیزن میں ابھی مزید پانچ لیگ میچز کھیلنے ہیں۔دہلی کے خلاف میچ کے بعد چنئی کا 10 مئی: لکھنؤ سپر جائنٹس کے خلاف ہوم میچ۔15 مئی: لکھنؤ میں رشبھ پنت کی ٹیم کے خلاف جوابی مقابلہ۔18 مئی: سن رائزرز حیدرآباد کی میزبانی۔21 مئی: گجرات ٹائٹنز کے خلاف سیزن کا آخری لیگ میچ (احمد آباد)۔واضح رہے کہ ایم ایس دھونی نے اس سیزن میں اب تک ایک بھی میچ نہیں کھیلا ہے ۔ انہوں نے اپنا آخری آئی پی ایل میچ تقریباً ایک سال قبل 25 مئی 2025 کو گجرات ٹائٹنز کے خلاف کھیلا تھا۔ شائقین بے تابی سے اپنے پسندیدہ کھلاڑی کی میدان میں واپسی کا انتظار کر رہے ہیں۔
