عظمیٰ نیوز سروس
جموں//بھارتیہ جنتا پارٹی (بی جے پی) کے قومی صدر نتن نبین نے جموں و کشمیر کے ارکانِ پارلیمنٹ، ارکانِ اسمبلی، سابق ارکانِ اسمبلی، سابق قانون ساز کونسل کے اراکین، ریاستی جنرل سیکریٹریز، سابق ضلع ترقیاتی کونسل (ڈی ڈی سی) اراکین اور سابق بلاک ترقیاتی کونسل (بی ڈی سی) اراکین کے ساتھ ایک اجلاس کی صدارت کی۔ اس موقع پر بی جے پی کے قومی جنرل سیکریٹری، راجیہ سبھا رکن پارلیمنٹ اور جموں و کشمیر کے انچارج ترون چھگ، جموں و کشمیر بی جے پی صدر و راجیہ سبھا رکن ست شرما، مرکزی وزیر ڈاکٹر جتیندر سنگھ، قائد حزبِ اختلاف سنیل شرما اور سابق نائب وزیر اعلیٰ ڈاکٹر نرمل سنگھ بھی موجود تھے۔ اجلاس پارٹی ہیڈکوارٹر، ٹریکوٹہ نگر، جموں میں منعقد ہوا۔اجلاس سے خطاب کرتے ہوئے نتن نبین نے جموں و کشمیر کی موجودہ سماجی و سیاسی صورتحال اور آئندہ مہینوں کے لیے پارٹی کے تنظیمی لائحہ عمل کا جائزہ لیا۔ انہوں نے کہا کہ بی جے پی کی سب سے بڑی طاقت اس کی منظم تنظیم اور وقف کارکن ہیں، اس لیے منتخب عوامی نمائندوں اور تنظیمی کارکنوں کو ایک مربوط ٹیم کی حیثیت سے کام کرتے ہوئے پارٹی کو نچلی سطح تک مزید مضبوط بنانا چاہیے۔انہوں نے کہا کہ ہر رکنِ پارلیمنٹ، رکنِ اسمبلی اور سینئر رہنما کو پارٹی کارکنوں کے ساتھ مسلسل رابطہ رکھنا چاہیے اور اس بات کو یقینی بنانا چاہیے کہ وہ تمام تنظیمی پروگراموں میں بھرپور انداز میں شریک ہوں۔ انہوں نے کہا کہ تنظیم اور عوامی نمائندوں کے درمیان یہی ہم آہنگی ہر گاؤں، ہر وارڈ اور ہر بوتھ پر بی جے پی کو مزید مستحکم بنانے کے لیے ناگزیر ہے۔ انہوں نے تمام رہنماؤں پر زور دیا کہ وہ عوام سے رابطہ مزید مضبوط کریں، ہر وقت لوگوں کے لیے دستیاب رہیں اور وزیر اعظم نریندر مودی کی قیادت والی حکومت کی پالیسیوں اور کامیابیوں کو مؤثر انداز میں عوام تک پہنچائیں۔انہوں نے خصوصی طور پر “من کی بات” پروگرام پر زور دیتے ہوئے ہدایت دی کہ جموں و کشمیر کے ہر ایک بوتھ پر اس پروگرام کا انعقاد زیادہ سے زیادہ عوامی شرکت کے ساتھ کیا جائے۔ انہوں نے کہا کہ من کی بات کے ذریعے وزیر اعظم مسلسل ایسے عام شہریوں کی غیر معمولی کامیابیوں کو اجاگر کرتے رہے ہیں جنہوں نے سماجی اصلاحات کی مختلف تحریکوں کو فروغ دیا اور لاکھوں لوگوں کو قوم کی تعمیر میں اپنا کردار ادا کرنے کی ترغیب دی۔بی جے پی کے قومی صدر اور دیگر سینئر رہنماؤں نے ضلع ادھم پور کے تحت ایم ایل اے مانکوٹیا کی جانب سے زیادہ سے زیادہ بوتھوں پر کامیابی کے ساتھ من کی بات پروگرام منعقد کرنے کی کوششوں کو سراہا اور دیگر رہنماؤں سے بھی اپیل کی کہ وہ آنے والے مہینوں میں اپنی کوششوں میں مزید تیزی لائیں۔اس موقع پر ست شرما نے کہا کہ قومی صدر کی جانب سے دی گئی رہنمائی جموں و کشمیر بھر میں پارٹی کارکنوں میں نیا جوش و خروش پیدا کرے گی۔ انہوں نے کہا کہ جموں و کشمیر بی جے پی ہمیشہ نظم و ضبط اور لگن کے ساتھ کام کرتی آئی ہے اور ہر کارکن پارٹی کے پروگراموں کو نچلی سطح تک پہنچانے کے لیے پرعزم ہے۔ انہوں نے یقین دلایا کہ تمام منتخب عوامی نمائندے تنظیمی ڈھانچے کے ساتھ مکمل ہم آہنگی میں کام کریں گے تاکہ ہر مہم، ہر اجلاس اور ہر عوامی رابطہ پروگرام کو بوتھ سطح تک مؤثر انداز میں پہنچایا جا سکے۔
