یو این آئی
نئی دہلی//سپریم کورٹ نے 2002 کے گجرات فسادات کے دوران بلقیس بانو کی اجتماعی عصمت دری اور ان کے خاندان کے سات افراد کے قتل کے معاملے میں عمر قید کی سزا پانے والے 11 مجرموں کو 2022 میں قبل از وقت رہائی کے گجرات حکومت کے فیصلے کو غیر قانونی قرار دیتے ہوئے پیر کو منسوخ کر دیا۔عدالت عظمیٰ نے ملزمان کو دو ہفتوں میں سرنڈر کرنے کا حکم دیا ہے ۔جسٹس بی وی ناگرتنا اور جسٹس اجل بھویان کی بنچ نے اپنے فیصلے میں کہا کہ اس معاملے میں سزا معافی کے معاملے پر فیصلہ لینا گجرات حکومت کے دائرہ اختیار میں نہیں آتا، اس لیے معافی کے فیصلے کو منسوخ کیا جاتا ہے ۔بنچ نے کہا کہ اس کیس کی سماعت مہاراشٹر کی عدالت میں ہوئی تھی، اس لیے معافی کا فیصلہ لینا وہاں کی حکومت کے دائرہ اختیار میں آتا ہے ۔گجرات حکومت کی 1992 کی معافی کی پالیسی کے تحت، باکا بھائی ووہانیہ، جسونت نائی، گووند نائی، شیلیش بھٹ، رادھیشیام شاہ، وپن چندر جوشی، کیشر بھائی ووہانیا، پردیپ موڈھواڈیا، راجو بھائی سونی، متیش بھٹ اور رمیش چندنا کو 15 اگست 2022 کو گودھرا سب جیل سے رہا کردیا گیاتھا۔ رہائی کے فیصلے کو عدالت میں چیلنج کیا گیا تھا۔ عدالت عظمیٰ نے بلقیس کی درخواست اور دیگر کی درخواستوں پر سماعت مکمل ہونے کے بعد 12 اکتوبر 2023 کو اپنا فیصلہ محفوظ کر لیا تھا۔سپریم کورٹ نے سماعت کے دوران کہا تھا کہ جرم ‘خوفناک’ ہے لیکن وہ ‘جذبات سے متاثر’ نہیں ہوگی اور صرف قانون کی بنیاد پر کیس کا فیصلہ کرے گی۔عدالت نے تب یہ بھی کہا تھا کہ گجرات حکومت اس معاملے میں اپنے دائرہ اختیار کا استعمال کرے گی کیونکہ وہاں جرم ہوا تھا۔بلقیس نے نومبر 2022 میں عدالت سے رجوع کیا۔ اپنی درخواست میں انہوں نے دلیل دی تھی کہ یہ ‘سب سے بھیانک جرائم میں سے ایک’ تھا۔ ایک خاص کمیونٹی کے خلاف نفرت کی وجہ سے انتہائی غیر انسانی تشدد اور ظلم تھا۔
ملک میں بارشوںکا امکان
نئی دہلی/ یو این آئی/ وسطی اور شمال مغربی ہندوستان کے مختلف مقامات پر اگلے 24 گھنٹوں کے دوران طوفان اور ژالہ باری کے ساتھ بارش کے امکانات ہیں۔ہندوستان کے محکمہ موسمیات (آئی ایم ڈی) نے پیر کو کہا کہ اگلے 24 گھنٹوں کے دوران شمالی ہندوستان کے کئی حصوں میں گھنی دھند اور سردی کی لہر میں اضافہ ہونے کا امکان ہے ۔ ہلکی سے معتدل بارش اگلے تین دنوں کے دوران تمل ناڈو اور کیرالہ میں اگلے 24 گھنٹوں کے دوران الگ تھلگ مقامات پر ہونے کی امید ہے ۔ملک کے شمالی علاقوں میں آئندہ پانچ روز کے دوران کم سے کم درجہ حرارت میں کسی خاص تبدیلی کا کوئی امکان نہیں۔
