عظمیٰ نیوز سروس
سرینگر// سرینگر موسمیاتی مرکز نے 9جولائی سے جموں و کشمیر میں گرج چمک کے ساتھ بارش کی پیش گوئی کی ہے، اگلے چار دنوں کے دوران الگ تھلگ مقامات پر موسلادھار بارش بھی متوقع ہے۔ محکمہ موسمیات کی طرف سے جاری کردہ تازہ ترین پیشین گوئی کے مطابق، 9 اور 10 جولائی کو مرکزی علاقے میں بڑے پیمانے پر بارش اور گرج چمک کے ساتھ بارش کا امکان ہے، چند مقامات پر تیز بارش بھی ہوسکتی ہے۔11 اور 12 جولائی کے لیے، محکمہ موسمیات نے کئی مقامات پر بارش اور گرج چمک کے ساتھ الگ تھلگ مقامات پر موسلادھار بارش کا امکان ظاہر کیا ہے۔محکمہ نے متنبہ کیا ہے کہ متوقع بارش سے پہاڑی علاقوں میں طوفانی سیلاب، لینڈ سلائیڈنگ، مٹی کے تودے اور پتھرگرنے کے واقعات پیش آسکتے ہیں۔ اس نے یہ بھی خبردار کیا کہ نشیبی علاقوں میں شدید بارش کے دوران پانی جمع ہو سکتا ہے۔
