بائیو میٹرک نظام کا غیر مجاز استعمال پرنسپل ڈگری کالج قاضی گنڈ منسلک

 عارف بلوچ

اننت ناگ//حکومت نے پرنسپل گورنمنٹ ڈگری کالج قاضی گنڈ کو بائیو میٹرک نظام کا غیر مجاز استعمال کرنے اور مختلف مقامات سے آن لائن حاضری لگانے پر منسلک کردیا ہے۔جمعرات کوجاری ایک حکم کے مطابق پرنسپل گورنمنٹ ڈگری کالج قاضی گنڈ مجاہد احمد کو بائیو میٹرک آلے کا غیر مجاز استعمال کرنے پر منسلک کیا گیا ہے۔محکمہ کو ایک شکایت موصول ہوئی تھی کہ پرنسپل گھر سے آن لائن حاضری لگا رہا ہے اور کالج میںبذات خود موجود نہیں ہوتا،جس کے بعد اکتوبر، نومبر،دسمبر 2022 اور جنوری 2023 کے مہینے کے لئے AEBAS پر بائیو میٹرک حاضری کا جائزہ لینے سے پتہ چلا کہ وہ قاضی گنڈ میں گھر کے علاوہ مختلف مقامات سے بائیو میٹرک حاضری لگا رہا تھا۔حکم نامہ کے مطابق پرنسپل کو ہدایت دی گئی تھی کہ وہ بائیو میٹرک کا غیر مجاز استعمال کرنے کے لئے اپنے موقف کی وضاحت ایک ہفتے کے اندر کریں لیکن وہ ایسا کرنے میں ناکام رہے۔حکم نامہ کے مطابق مذکورہ حقائق کو مدنظر رکھتے ہوئے پرنسپل کو اگلے احکامات تک جے اینڈ کے ایمپلائر کنڈکٹ رولز 1971 کے سیکشن 3(1)کی خلاف ورزی کرنے پر ڈائریکٹر کالجز جموں کے دفتر کے ساتھ منسلک کیا گیا ہے۔حکم نامہ کے مطابق پرنسپل گورنمنٹ ڈگری کالج کولگام ، قاضی گنڈکے گورنمنٹ ڈگری کالج کا اضافی چارج سنبھالیں گے۔