۔7ویں محرم کے موقعہ پرمختلف مقامات پر جلوس عزاء بر آمد،مرثیہ و نوحہ خوانی

سرینگر// اتحاد المسلمین اور انجمن شرعی شیعیان کی جانب سے وادی کے متعدد مقامات پر 7ویں محرم پر جلوس عزاء نکالے گئے۔ اتحادکے صدر مولانا مسرور عباس انصاری کی قیادت میں اندرونی کاٹھی دروازہ سرینگر سے مرکزی جلوس بر آمد ہوا جس میںسینکڑوںعقیدتمندوں نے شرکت کرتے ہوئے امام عالی مقام اور آپ کے اصحاب کو خراج عقیدت پیش کیا۔عزاداروں نے مرثیہ اور نوحہ خوانی کرتے ہوئے پرامن طور پر عزاداری کے مراسم انجام دئے۔ جلوس عزا سے خطاب کرتے ہوئے مولانا مسرور عباس نے فلسفہ شہادت امام عالی مقام پر مفصل روشنی ڈالی اور کہا کہ فلسطین ،یمن ،شام لبنان اور ایران کے مزاحمت کی کامیابی کا راز عزاداری میں ہی مضمر ہے۔مولانا مسرور نے کہا کہ محرم الحرام کے تمام روایتی جلوس عزا شان و شوکت کے ساتھ برآمد ہوں گے۔ادھرانجمن شرعی شیعیان کی طرف سے جاری بیان میں کہا گیا ہے کہ کئی مقامات پرعزاداروں کے جلوس نکالے گئے اور علم شریف اور تعزیہ کے جلوس بھی برآمد ہوئے۔ابن میں چاڑورہ، ماگام، بڈگام اندرون کاٹھی درواز حسن آباد سرینگر، شالیمار، کرالہ پورہ جڈی بل ، جے کے پی سی سی اگروباغ سرینگر، حاجن کے مختلف علاقوں ، بارہمولہ، پٹن اور پلوامہ شامل ہیں۔ علم شریف کا سب سے بڑا جلوس حسب عمل قدیم اندرون کاٹھی دروازہ رعناواری سرینگر سے برآمد ہوکر قدیمی امام باڑہ حسن آباد میں اختتام پذیر ہوا جس میں آغا سید مجتبی عباس نے بھی شرکت کی۔