سرینگر//اپنی پارٹی صدر سید محمد الطاف بخاری نے اُن سیاسی جماعتوں کی نیت پر سوال اُٹھایا ہے جو 5اگست کے فیصلوں کی مخالفت کرتی ہیں جبکہ اپنی پارٹی نے جموں وکشمیرکے باشندگان کے لئے اراضی اور نوکریوں کے حقوق کا تحفظ یقینی بنایا۔ ٹاڈ کرناہ کپوارہ میںپارٹی کنونشن سے خطاب کرتے ہوئے الطاف بخاری نے کہاکہ دفعہ 370 اورA 35 کو غیر فعال کرنے کے بارے میں جموں و کشمیر کی سیاسی جماعتوں کے نعرے ضرورت سے زیادہ معلوم ہوتے ہیں کیونکہ وہ جموں وکشمیر کے لوگوں کے حقوق کی ضمانت یقینی بنانے میں ناکام رہی ہیںتاہم اپنی پارٹی اس سمت لگاتار حکومت ِ ہند کے ساتھ اِس معاملہ کو اُجاگر کر رہی ہے۔ الطاف بخاری نے ذیلی خطہ کی اقتصادی خوشحالی کی ضرورت پرزور دیتے ہوئے کہاکہ جموں وکشمیر پر دہائیوں تک حکمرانی کرنے والی روایتی سیاسی جماعتوں نے نظر انداز کیا۔ انہوں نے سوال کیا کہ’’اِ ن سیاسی جماعتوں کی طرف سے 5 اگست کے فیصلوں سے اختلاف قابل سمجھ ہے لیکن کیا کبھی اِن جماعتوں نے اپنی پارٹی کی حصولیابیوں کا اعتراف کیا جس نے جموں وکشمیر کے باشندگان کیلئے اراضی اور نوکریوں کے حقوق یقینی بنائے جنہیں چھین لیاگیاتھا، اِس کا کیا یہ مطلب ہے کہ یہ سیاسی جماعتیں، ایسی آئینی ضمانتوں کے خلاف ہیں اور دفعہ370کی منسوخی کی مخالفت اِن کی محض سیاسی مجبوری ہے‘‘۔انہوں نے کہاکہ جموں وکشمیر کے لوگ سیاسی سوج بوجھ رکھتے ہیں اور وہ سیاسی بیان بازیاں اور زمینی سطح پر کارکردگی میں فرق کرسکتے ہیں،ایسا لگتا ہے کہ ہماری جماعت کی طرف سے مختصر وقت میں عوام دوست اقدامات سے روایتی سیاسی جماعتیں ناخوش ہیں، بظاہر اِس سے اُن کے کھوکھلے پن کی پول کھل چکی ہے کیونکہ اُن کے قول وفعل میں تضاد ہے اور زمینی سطح پر کچھ کیا نہیں‘‘۔الطاف بخاری نے شمالی کشمیر بالخصوص ضلع کپواڑہ ضروری ترقیاتی سرگرمیوں کے فقدان کو بھی اُجاگر کیا جن میں بہتر رابطہ سڑک کا نہ ہونا، اشیاء ضروریہ کی سپلائی اور روزگار کے مواقع شامل ہیں۔ انہوں نے کہاکہ اپنی پارٹی کا سیاسی فلسفہ بنیادی طور لوگوں کی بہبودی اور جموں وکشمیر کے سبھی خطوں کی یکساں ترقی ہے۔ انہوں نے کہا شمالی کشمیر خاص کر اِس خطہ میں ہنگامی طور ترقیاتی اصلاح کی ضرورت ہے بدقسمتی سے لوگوں سے بہت زیادہ وعدے کئے گئے لیکن زمینی سطح پر کارکردگی صفر رہی‘‘۔ اپنی پارٹی صدر نے سادھنا ٹنل کی تعمیر کے وعدے کو بھی دہراتے ہوئے کہا ’ میں نے کرناہ کے عوام سے وعدہ کیا ہے اور اِس ٹنل کی تعمیر کیلئے مرکزی قیادت سے بارہا ہماری قیادت نے معاملہ اُٹھایا اور اب تک اِس کا ڈی پی آر تیار کر کے پیش کر دیاگیاہے، اِس ٹنل کی تعمیر سے خطہ میں معاشی ترقی ہوگی، روزگار کے نئے مواقع کھلیں گے ، سیاحتی شعبہ کو ترقی ملے گی اور قدرتی حسن سے مالا مال علاقے بھی سیاحوں کی توجہ کے مرکز بنے گے‘۔ سینئرنائب صدر غلام حسن میر، ترجمان اعلیٰ اور کپواڑہ۔بارہمولہ اضلاع کے سرپرست جاوید حسن بیگ، صوبائی صدر کشمیر محمد اشرف میر، ریاستی سیکریٹری ایس ٹی ونگ خالد بڈھانہ، صوبائی سیکریٹری جاوید مرچال، ضلع صدر کپواڑہ راجہ منظور، ضلع سیکریٹری کپواڑہ بلال عارف لون، ڈی ڈی سی ممبر ایڈوکیٹ نجمہ حمید، بی ڈی سی نوشادہ جبین، حاجی تسلیم میر اور مدثر پوسوال نے بھی کنونشن سے خطاب کیا۔
۔5اگست کے فیصلوں کے مخالفین اپنے ارادے واضح کریں
