سرینگر //جموں و کشمیر میں 4دنوں کے بعد ایک مرتبہ پھر جمعہ کو کورونا وائرس سے2 افراد فوت ہوگئے۔ اس طرح جموں و کشمیر میں متوفین کی مجموعی تعداد 4440تک پہنچ گئی ہے۔ اس سے قبل یکم نومبر کو جموں و کشمیر میں کورونا وائرس سے 2افراد فوت ہوگئے تھے جبکہ 31اکتوبر کو وائرس سے 4افراد فوت ہوئے تھے۔ اس دوران پچھلے 24 گھنٹوں کے دوران کورونا وائرس کی تشخیص کیلئے 39ہزار 187افراد ٹیسٹ کئے گئے جن میں 2مسافروں سمیت مزید 109افراد کی رپورٹیں مثبت آئی ہیں۔ جموں و کشمیر میں متاثرین کی مجموعی تعداد 3لاکھ 32ہزار 760 پہنچ گئی ہے۔ جموں و کشمیر میں پچھلے 24گھنٹوں کے دوران مثبت قرار دئے گئے 109افراد میں جموں میں 11جبکہ کشمیر میں 98افراد کی رپورٹیں مثبت آئی ہیں۔ مثبت قرار دئے گئے 98افراد میں ایک بیرون ریاستوں سے سفر کرکے واپس لوٹا جبکہ دیگر 97افراد مقامی سطح پر رابطے میں آنے کی وجہ سے متاثر ہوئے ہیں۔ کشمیر میں مثبت قرار دئے گئے 98افراد میں سرینگر میں 64، بارہمولہ میں 12، بڈگام میں 8،کپوارہ میں 7،بانڈی پورہ میں 2، گاندربل میں 3جبکہ پلوامہ، اننت ناگ اور شوپیان میں کسی کی رپورٹ مثبت نہیں آئی ہے۔ کشمیر میں متاثرین کی مجموعی تعداد 2لاکھ 8ہزار 356تک پہنچ گئی ہے۔ اس دوران کشمیر میں 4دنوں کے بعد کورونا وائرس سے ایک اور شخص فوت ہوگیا ہے۔ وادی میں متوفین کی تعداد بڑھ کر 2263ہوگئی ہے۔ جموں صوبے کے 7اضلاع جن میں ڈوڈہ، کٹھوعہ، کشتواڑ،پونچھ، رام بن ، ریاسی میں کسی کی رپورٹ مثبت نہیںآئی ہے جبکہ دیگر3اضلاع میں 11افراد کی رپورٹیں مثبت قرار دی گئی ہے۔ مثبت قرار دئے گئے 11افراد میں ایک بیرون ریاستوں سے سفر کرکے واپس لوٹا جبکہ دیگر 10افراد مقامی سطح پر رابطے میں آنے کی وجہ سے متاثر ہوئے ہیں۔ جموں میں متاثر ہونے والے 11افراد میں جموں میں 9، ادھمپور میں 1جبکہ راجوری میں 1متاثر ہوا ہے۔ جموں میں متاثرین کی مجموعی تعداد 1لاکھ 24ہزار 404افراد تک پہنچ گئی ہے۔ جموں صوبے میں 8دنوں کے بعد جمعہ کو ایک شخص کورونا وائرس سے فوت ہوگیا ہے۔ جموں صوبے میں متوفین کی مجموعی تعداد2177ہوگئی ہے۔
۔4دن بعد پھر 2کورونا اموات
