۔2022 ءتک کسانوں کی آمدن دوگناہوجائے گی:ڈاکٹرنرمل سنگھ

جموں/ نائب وزیر اعلیٰ ڈاکٹر نرمل سنگھ نے کہا ہے کہ وزیر اعظم کی طرف سے شروع کئے گئے فلاحی اقدامات کی بدولت زرعی پیداوار کودوام حاصل ہورہاہے اور سال 2022ءتک کسانوں کی آمد ن یقینی طور دوگنا ہو جائے گی۔نائب وزیر اعلیٰ نے ان باتوں کا اظہار کھور میں ایک کسان میلے کا افتتاح کرنے کے بعد کیا۔ کسان میلے کا انعقاد کسان ترقیاتی مشاورتی بورڈ نے دیگرمختلف محکموں کے اشتراک سے کیا تھا۔میلے کے دوران مختلف محکموں نے سٹا ل قائم کئے تھے جن میں زرعی ٹیکنالوجی کی عکاسی کی گئی تھی ۔وائس چیئرمین جے اینڈکے سٹیٹ مشاوری بورڈ برائے بہبودی کسان دلجیت سنگھ چب ، ممبر پارلیمنٹ جگل کشور ، ایم ایل اے ڈاکٹر کرشن لال بھگت ، ایم ایل سی وکر م رندھا وا، مختلف محکموں کے افسران اور کافی تعداد میں کسانوں نے بھی میلے میں شرکت کی۔نائب وزیراعلیٰ نے اس موقعہ پر کہا کہ اس طرح کا میلوں کا مقصد یہ ہے کہ کاشتکاروں کو زرعی ٹیکنالوجی اور اعلیٰ پیداو ار دینے والے بیجوںسے متعارف کیا جائے تاکہ وہ فصلوں کی پیداوار اور پیداوار یت میں اضافہ کر کے اپنی آمدن بڑھا سکے۔انہو ں نے کہا کہ ان ہی میلوں کے ذریعے سے سرکار کی سکیمیں کسانوں تک پہنچ پاتی ہےں۔نائب وزیراعلیٰ نے فلاحی سکیموں کا تفصیل سے ذکرکرتے ہوئے کسانوں پر زور دیا کہ وہ وزیر اعظم فصل بیمہ یوجنا سے استفادہ کریں تاکہ وہ نقصان سے بچ سکیں۔ڈاکٹر سنگھ نے افسروں پر زور دیا کہ وہ سکیموں کی بنیادی سطح پر عمل آوری کو یقینی بنائیں تاکہ سال 2022ءتک کسانوں کی آمدن دوگنا کرنے کے وزیر اعظم کے خواب کو شرمند ہ تعمیر کیا جاسکے ۔اس موقعہ پر ممبر پارلیمنٹ جگل کشور شرما ، وائس چیئرمین جے کے سٹیٹ مشاورتی بورڈ برائے کسان دلجیت سنگھ چب ، ایم ایل اے ڈاکٹر کرشن لال اور ایم ایل سی وکرم رندھا وا نے بھی خطاب کیا اور اس طرح کے میلوں کی اہمیت کو اُجاگر کیا۔ انہوںنے کہاکہ اس طرح کے میلوں کا انعقاد دیگر علاقوں میں بھی کیا جانا چاہئے تاکہ کسان بنیادی سطح پر مستفید ہوسکیں۔اس سے پہلے نائب وزیرا علیٰ نے مختلف سٹالوں کا معائینہ کیا اور مختلف محکموں کی کارکردگی میں کافی دلچسپی کا اظہار کیا۔ نائب وزیر اعلیٰ نے کھورمیونسپل کمیٹی میں بلدیاتی سہولیات کو بڑھاوا دینے کے لئے 20 لاکھ روپے دینے کا اعلان کیا۔اس سے قبل نائب وزیراعلیٰ نے جوریاں قصبے کے لئے 31.57لالکھ رویے کی لاگت سے تعمیرکئے گئے بجلی نظام کا بھی افتتاح کیا۔ انہوں نے علاقے میں 12.14لاکھ روپے کی لاگت سے تعمیر کئے گئے کئی دیگر بنیادی کاموں کو بھی عوام کے نام وقف کیا۔