نیویارک// روس نے اقوام متحدہ کی سلامتی کونسل میں یوکرین کے خلاف جنگ روکنے کی قرار داد ویٹو کردی۔
غیرملکی خبر رساں ایجنسی کے مطابق قرار داد میں یوکرین کے خلاف روسی ’جارحیت‘ کی مذمت کی گئی تھی اور فوجوں کے فوری انخلاء کا مطالبہ کیا گیا تھا۔
سلامتی کونسل کے 15 میں سے 11 اراکین نے قرارداد کے حق میں ووٹ دیا تھا تاہم چین، ہندوستان اور متحدہ عرب امارات نے ووٹنگ میں حصہ نہیں لیا تھا۔
اجلاس کے بعد اقوام متحدہ کے سکریٹری جنرل انٹونیوگوٹریس نے کہا کہ روسی فوجیوں کو بیرکس میں واپس جاناچاہیے، امن کو ایک اور موقع دیا جاناچاہئیے، ہمیں ہمت نہیں ہارنی چاہیئے۔
دوسری جانب یوکرین کے صدر نے کہا کہ یوروپ ماسکو پر پابندیاں عائد کرنے کیلئے زیادہ تیزی اور طاقت کا مظاہرہ کرے۔
انہوں نے یوروپ سے مطالبہ کرتے ہوئے کہا کہ یوروپ کے پاس روس کی جارحیت روکنے کیلئے کافی طاقت موجود ہے اس کا استعمال کیا جائے۔
