عظمیٰ نیوز سروس
سرینگر// امرناتھ یاترا2026 کیلئے یاتریوں کی پہلی کھیپ کو جمعہ کو جموں و کشمیر کے گاندربل ضلع کے بالتل اورننون پہلگام بیس کیمپوں سے جھنڈی دکھا کر روانہ کیا گیا، جس نے سالانہ یاترا کا باقاعدہ آغاز کیا۔بالتل بیس کیمپ “بم بم بھولے” اور “ہر ہر مہادیو” کے نعروں سے گونج اٹھا جب عقیدت مند، جن میں مرد، خواتین، بزرگ یاتری اور سادھو شامل تھے، مقدس غار کی درشن کے لیے اپنے سفر پر روانہ ہوئے۔
یہ بات قابل ذکر ہے کہ 4800یاتریوں کا پہلا قافلہ پہلگام اور بالتل راستوں سے گھپا کی درشن کیلئے جمعرات کی صبح جموں سے روانہ ہوا تھا۔اسی طرح ننون پہلگام سے بھی پہلے جتھے کی گھپا تک روانگی ہوئی اور یاتری بم بم بولے کے نعرے لگارہے تھے۔اس دوران جمعہ کو یاتریوں کا دوسرا قافلہ جموں سے جڑواں راستوں سے درشن کیلئے روانہ ہوا جس میں 3800سے زیادہ یاتری تھے۔امر ناتھ گھپا کی درشن ملک کے اہم ترین مذہبی واقعات میں سے ایک ہے۔ حکام نے بالتل اور پہلگام روٹوں کے ساتھ وسیع انتظامات کیے ہیں، جس میں متعدد محکموں نے یاتریوں کی حفاظت اور سہولت کو یقینی بنانے کے لیے تعاون کیا ہے۔
یاتریوں کیلئے ضروری ہدایات جاری
عظمیٰ نیوز سروس
سرینگر//عدالت عظمیٰ کی ہدایات کے مطابق یاترا کے راستے پر روزانہ سفر کرنے والے یاتریوں کی زیادہ سے زیادہ تعداد مقرر کی گئی ہے۔ یاتریوں کی حفاظت اور یاترا کے پُرامن و منظم اِنعقاد کو یقینی بنانے کے لئے اس یومیہ حد پر عمل کرنا لازمی ہے۔یاتریوں کی سہولیت کے پیش نظر یاترا شروع ہونے سے کافی پہلے ملک بھر میں مختلف بینک شاخوں اور آن لائن ذرائع کے ذریعے پیشگی رجسٹریشن کی سہولیت فراہم کی گئی تھی۔ بیشتر یاتری اِس سہولیت سے فائدہ اُٹھاتے ہوئے پہلے ہی اَپنی رجسٹریشن مکمل کر چکے ہیں۔ لہٰذا تتکال (موقعہ پر) رجسٹریشن کے لئے دستیاب نشستیں اِنتہائی محدود ہیں۔ تمام یاتریوں سے درخواست ہے کہ وہ پیشگی رجسٹریشن مکمل کرنے کے بعد ہی جموں و کشمیر کا سفر کریں۔ رجسٹریشن کے جموں و کشمیر پہنچنے والے ہزاروں یاتریوں کو ’تتکال‘ سہولیت کے تحت جگہ دینا ممکن نہیں ہے۔ ایسے یاتریوں سے گزارش ہے کہ وہ اَپنی باری کا اِنتظار کریں اور صرف اِنتظامیہ کی طرف سے مقرر کردہ تاریخ پر ہی سفر کریں۔ کئی رجسٹرڈ یاتری اَپنی مقررہ سفری تاریخ سے پہلے ہی جموں و کشمیر پہنچ رہے ہیں۔ واضح کیا جاتا ہے کہ کسی بھی یاتری کو اس کی رجسٹرڈ تاریخ سے قبل یاترا کی اِجازت نہیں دِی جائے گی ، وہ اَپنی باری کا انتظار کریں۔ ہر یاتری کو شری امرناتھ جی یاترا کرنے کا موقعہ ملے گا ،تاہم یہ صرف مقررہ طریقۂ کار اور دستیاب گنجائش کے مطابق ہی ممکن ہوگا۔
وزیر داخلہ کی عقیدت مندوں کیلئے نیک خواہشات
عظمیٰ نیوز سروس
نئی دہلی// مرکزی وزیر داخلہ امت شاہ نے جمعہ کو سالانہ یاترا کے آغاز پر عقیدت مندوں کو مبارکباد پیش کرتے ہوئے کہا کہ یاترا سناتن ثقافت، صبر، تحمل اور ناقابل تسخیر جذبے کے تئیں اٹل عقیدت کی عکاسی کرتی ہے۔X پر ایک پوسٹ میں، شاہ نے سالانہ یاترا کرنے والے یاتریوں کے لیے ایک محفوظ سفر کی خواہش کی۔شاہ نے کہا”امرناتھ جی یاترا سناتن ثقافت کے تئیں اٹل عقیدت، ثابت قدمی، تحمل اور ناقابل شکست جذبے کی ایک مقدس علامت ہے جو کبھی شکست کو قبول نہیں کرتی، آج اس مقدس سفر کے مبارک آغاز کا دن ہے، بابا برفانی کے درشن اور پوجا کے لیے جانے والے تمام عقیدت مندوں کے لیے میری نیک خواہشات،” ۔یاترا کے لیے مرکز کے انتظامات پر روشنی ڈالتے ہوئے مرکزی وزیر داخلہ نے کہا کہ حکومت نے عقیدت مندوں کے لیے وسیع حفاظتی انتظامات کیے ہیں۔انہوں نے کہا”مودی حکومت نے پورے راستے پر مضبوط انتظامات کیے ہیں، جس میں ایک کثیر سطحی سیکورٹی گرڈ، QR کوڈ پر مبنی رجسٹریشن، اور عقیدت مندوں کی رہائش، صحت کی دیکھ بھال کی خدمات، اور ڈیزاسٹر مینجمنٹ کے لیے سہولیات کو مضبوط بنایا گیا ہے، اس بات کو یقینی بناتے ہوئے کہ ہر یاتری کا سفر محفوظ، ہموار اور خوشگوار رہے۔” ۔
