نئی دہلی// ہندوستانی بحریہ کے 21 اہلکاروں میں مہلک کورونا وائرس کی تشخیص ہوئی ہے۔
بحریہ ذرائع نے ہفتہ کو بتایا کہ اس کے 20 اہلکاروں میں اس خطرناک وائرس کا انفیکشن پایا گیا ہے اور یہ تمام اہلکار ممبئی میں واقع بحریہ کے ایک رہائشی کمپلیکس آئی این ایس میں رہ رہے تھے۔ ان سب کو قرنطین کر کے ان کا علاج کیا جا رہا ہے۔
ذرائع کے مطابق ان تمام کو یہ انفیکشن ایک اور اہلکار کے رابطے میں آنے سے ہوا ہے۔ اس بحریہ کے اہلکار میں گزشتہ سات اپریل کو کورونا وائرس انفیکشن کی تصدیق ہوئی تھی۔
یہ 20 اہلکار جس کمپلیکس میں رہ رہے تھے، اسے مکمل طور الگ تھلگ کر دیا گیا ہے اور تمام احتیاطی اقدامات کئے جا رہے ہیں۔ اس رہائشی کمپلیکس کو سیل کر دیا گیا ہے۔ اس علاقے میں کورونا کے پروٹوکول کے مطابق تمام اقدامات کئے جا رہے ہیں۔
ذرائع نے واضح کیا ہے کہ ابھی بحریہ کے کسی بیڑے یا آبدوز میں سوار اہلکاروں میں اس وائرس انفیکشن کا کوئی کیس نہیں ہے۔ بحریہ میں کورونا وائرس انفیکشن کا یہ پہلا معاملہ سامنے آیا ہے۔ فوجی سربراہ جنرل منوج مکند نرونے جمعہ کے روز ہی بتایا تھا کہ فوج کے آٹھ فوجی اس وائرس سے متاثر ہیں۔
