ہندستان و میکسیکو کے مابین مختلف شعبوں میں تعاون بڑھانے پر بات چیت

میکسیکوسٹی// وزیر خارجہ ایس جے شنکر نے منگل کو میکسیکو کے صدر لوپیز اوبراڈور سے ملاقات کرکے دونوں ممالک کے مابین فارماسیوٹیکلس، آئی سی ٹی اور توانائی شعبہ میں تعاون بڑھانے پر بات چیت کی۔میکسیکو کے تین روزہ دورہ پر پہنچے مسٹر جے شنکر نے ٹوئٹ کرکے یہ اطلاع دی۔ انہوں نے کہاکہ آج میرے اسٹفبال کے لئے شکریہ صدر اوبراڈور۔ میں وزیراعظم نریندر مودی کی طرف سے نیک خواہشات دیتا ہوں۔انہوں نے بتایا کہ دونوں فریقین کے مابین گورننس کی ترجیحات اور مشق پر کھلی بات چیت ہوئی۔فارماسیوٹیکلس، آئی سی ٹی اور توانائی میں عملی تعاون برھانے پر بات چیت ہوئی۔اس سے پہلے انہوں نے میکسیکو کے وزیر خارجہ مارسیلو ابراڈ کیسابون کے ساتھ وسیع بات چیت کی جس میں سیاسی تعاون، تجارت اور سرمایہ کاری، خلائی اور سائنسی صلاحیت، ثقافتی تبادلے اور سفارتخانہ سے متعلق امور کا جائزہ لیا۔ انہوں نے بتایا کہ دونوں فریقین نے گورننس کے چیلنجوں اور عالمی امور پر بھی نقطہ نظر شیئر کئے۔وزیر خارجہ نے کہاکہ دونوں ممالک کو بین الاقوامی فورموں پر زیادہ قریبی تعاون کرنا چاہئے اور کہاکہ مجھے خوشی ہے کہ میکسیکو کے ہمارے شراکت داروں نے بھی تعاون کے اس جذبہ پر زور دیا ہے۔ انہوں نے کہاکہ ہندستان اور میکسیکو کو ایک کثیر جہتی دنیا کے لئے پرعزم آزاد طاقتوں کے طورپر بین الاقوامی فورموں پر زیادہ قریبی سے تعاون کرنا چاہئے۔ہندستان اور میکسیکو کے مابین اقوام متحدہ سلامتی کونسل (یو این ایس سی) کے اصلاحات کے امور پر کچھ اختلافات رہے ہیں۔ میکسیکو یونائیٹڈ فور کنسیس (یو ایف سی) گروپ کا رکن ہے، جو یو این ایس سی میں مستقل رکنیت کی توسیع کی مخالفت کرتا ہے اور اس کی بجائے غیرمستقل رکنیت میں اضافہ پر زور دیتا ہے۔ اس وقت ہندستان اور میکسیکو دونوں ہی 2021-2022کی مدت کے لئے سلامتی کونسل کے غیرمستقل رکن ہیں۔
 جو انہیں باہمی مفادات کے شعبوں میں مل کر کام کرنے کا اچھا موقع فراہم کرسکتا ہے۔مسٹر جے شنکر نے میکسیکو سیٹی میں مہاتما گاندھی کے مجسمہ پر گلہائے عقیدت پیش کئے۔ وہ میکسیکو کی آزادی کی 200ویں سالگرہ سے متعلقہ پروگراموں میں شرکت کرنے کیلئے میکسیکو گئے ہیں، جہاں دنیا کے دیگر ممالک کے رہنما بھی پہنچ رہے ہیں۔ اس سال میکسیکو 1821میں اسپین سے آزادی ملنے کی  200ویں سالگرہ منا رہا ہے۔وزیر خارجہ کا یہ دورہ 26سے 28ستمبر تک  ہے۔ وہ میکسیکو کے وزیر خارجہ مارسیلو ایبرارڈ کیساین کی دعوت پر یہاں آئے ہیں۔ وزیر خارجہ کے طورپر یہ ان کا میکسیکو کا پہلا دورہ ہے۔مسٹر جے شنکر نے میکسیکو سٹی میں یوم آزادی کی تقریب کے دوران بنگلہ دیشی وزیر خارجہ محمد شہریار عالم سمیت دیگر ممالک کے اپنے ہم منصبوں سے بھی ملاقات کی۔خیال رہے کہ ہندستان اور میکسیکو نے اگست 2020میں دونوں ممالک کے مابین سفارتی تعلقات قائم ہونے کی 70ویں سالگرہ منائی تھی۔ میکسیکو 1950میں ہندستان کے ساتھ سفارتی تعلقات قائم کرنے والا لاطینی امریکہ کا پہلا ملک تھا۔