محمد تسکین
بانہال//منگل کی صبح سے دن کے قریب دس بجے تک بانہال ، رام بن اور ادھم پور کے سیکٹر میں ہلکی بارشیں ہوئی جس کی وجہ سے موسم خوش گوار ہوگیا ہے اور لوگوں نے کسی حد تک گرمی کی شدت سے راحت محسوس کی ہے۔ بارشوں کے باوجود جموں سرینگر قومی شاہراہ پر ٹریفک کی نقل و حرکت بغیر کسی خلل کے جاری رہی اور اعلی الصبح جموں کے بھگوتی نگر کے بیس کیمپ سے شری امرناتھ یاترا میں شامل گاڑیوں کو نکالنے کے بعد نگروٹہ جموں سے صبح سات بجے سے مسافر بردار گاڑیوں کو وادی کشمیر کی طرف آنے کی اجازت دی گئی جبکہ یاترا کے بانہال۔ قاضی گنڈ ٹنل پار کرنے کے بعد دن کے ساڑھے گیارہ بجے سے وادی کشمیر سے مسافر ٹریفک کو جموں کی طرف جانے کی اجازت دی گئی۔ رام بن۔ بانہال سیکٹر میں ہلکی اور موسلادھار بارشوں کا سلسلہ چند گھنٹوں تک جاری رہا تاہم اس سے شاہراہ کے ٹریفک میں کوئی خلل نہیں آیا البتہ بارشوں سے موسم خوش گوار رہا اور اس کا اثر منگل شام تک جاری تھا۔ ٹریفک پولیس حکام نے بتایا کہ بارشوں کے باوجود شاہراہ پر ٹریفک جاری ہے اور شری امرناتھ یاترا کے ٹریفک کو نکالنے کے بعد دو طرفہ مسافر ٹریفک کو چلنے کی اجازت تھی۔ انہوں نے کہا کہ منگل کے روز بھگوتی نگر جموں سے بالتل کے راستے 34 گاڑیوں میں 770 یاتریوں نے جبکہ پہلگام کے راستے 57 چھوٹی بڑی گاڑیوں میں 1714 یاتریوں پوتر گپھا کی طرف اپنا سفر کیا۔ انہوں نے کہا کہ منگل شام تک ٹریفک کی نقل و حرکت جاری تھی اور دوپہر بعڈ سے یکطرفہ ٹریفک میں ٹرکوں کو وادی کشمیر کے قاضیگنڈ سے جموں کیطرف جانے کی اجازت دی گئی اور شاہراہ پر ٹریفک کی روانی کا سلسلہ شام تک جاری تھا۔
