عظمیٰ نیوزسروس
کھوڑ(اکھنور)//لائن آف کنٹرول کے اس پار سے شدید توپ خانے کی گولہ باری سے تباہ، جموں ضلع کے کھور-پرگوال سیکٹر میں بستیوں کے کئی سرحدی باشندے اپنے گھر، مویشی اور ذریعہ معاش کو کھونے کے بعد حکومت سے مدد کی التجا کر رہے ہیں۔ گھروں کو نقصان پہنچانے اور مویشیوں کے ضائع ہونے کے بعد، وہ اب حکومت سے فوری طور پر پناہ گاہ فراہم کرنے کا مطالبہ کر رہے ہیں ۔ ہزاروں افراد لائن آف کنٹرول اور بین الاقوامی سرحدی علاقوں سے بھاگ کر حکومت کے زیر انتظام ریلیف کیمپوں میں پناہ لینے کے لیے آئے ہیں۔ایک سرحدی گاؤں کی رہنے والی کملا دیوی اپنے بھائی کے ساتھ گھر لوٹی تو اسے دیکھا کہ اس کا گھر تباہ حال اور ان کے مویشی مردہ پڑے ہیں۔اُس نے روتے ہوئے کہا “اب ہم کہاں رہیں گے؟ ہم ان جانوروں پر منحصر تھے، اب وہ مر چکے ہیں اور ہمارا گھر تباہ ہو گیا ہے۔ہم جنگ کا مطالبہ کرتے ہیں۔ میرے شوہر کے کہنے کے باوجود میں زبردستی گھر واپس آئی۔ اب یہاں کوئی کام نہیں ہے۔ براہ کرم ہمیں رہنے کے لیے جگہ دیں۔ ہم بے گھر ہیں‘‘۔نقل مکانی کے صدمے کا ذکر کرتے ہوئے کملا نے کہا’’سرحد پر کشیدگی کی وجہ سے، ہم نے بھاگ کر اپنے والد کے گھر پناہ لی، جنگ بندی کا اعلان 10مئی کو ہوا، میرے شوہر گھر پر تھے لیکن شام کو چلے گئے، اس رات جنگ بندی کے باوجود پاکستان نے ہمارے گاؤں پر شدید گولہ باری کی، دو گولے ہمارے گھر پر گرے، جس سے تین افراد ہلاک ہو گئے‘‘۔ بار بار ہونے والی گولہ باری اور برسوں سے جنگ بندی معاہدے کی ناکامی پر دیہاتیوں میں غصہ بڑھ رہا ہے۔ سابق پنچایت رکن جوگندر لال، جس کی حمایت دیگر گاؤں والوں نے کی، نے پورے پیمانے پر جنگ کا مطالبہ کیا۔انہوں نے کہا کہ جب پاکستان اس کا احترام نہیں کرتا تو جنگ بندی کا کیا فائدہ؟ ہم پاکستان کو سبق سکھانے کے لیے جنگ چاہتے ہیں۔ ہم کسی بھی حکومتی پالیسی کے یرغمال نہیں بن سکتے جو ہمیں غیر یقینی کی کیفیت میں ڈالے۔دیپک کمار، جس کے کان پر معمولی چوٹ آئی اور اس کے گھر کو نقصان پہنچا، اسی طرح کے جذبات کی بازگشت سنائی کہ کس طرح توپ خانے کے گولوں نے اس کے پڑوسی کرن سنگھ کے گھر کو تباہ کر دیا، جس سے خوف کی نفسیات پیدا ہوئی۔انہوں نے کہا’’یہ پاکستان کی طرف سے چھیڑی جانے والی جنگ کی طرح تھا۔ اگر وہ مستقبل میں دہشت گردانہ حملے کرتے ہیں، تو ہمیں مناسب جواب دینا چاہیے۔ لیکن یہ (ترکی بہ ترکی) پالیسی صرف سرحدی باشندوں کو مزید تکلیف پہنچاتی ہے۔ اس کا واحد حل پاکستان کے ساتھ جنگ ہے‘‘۔گھروں کو کھونے کے درد کا اظہار کرتے ہوئے، انہوں نے کہا’’ہم اپنے سروں پر چھت چاہتے ہیں، ہم وزیر اعظم نریندر مودی سے اپیل کرتے ہیں کہ وہ پناہ گاہوں کو یقینی بنائیں۔ اب ہم میں سے اکثر رشتہ داروں کے ساتھ رہ رہے ہیں۔ حالیہ تنازعے کے نشانات دیہاتوں میں نقش ہیں — تباہ شدہ گھر، ٹوٹی پھوٹی دیواریں، ٹوٹی ہوئی کھڑکیاں، خون کے دھبے اور مردہ مویشی تباہی کی عکاسی کرتے ہیں‘‘۔لال نے وزیر اعظم مودی کی قیادت میں فوجی کارروائی کے لیے اپنی حمایت کا اعادہ کیا۔انکاکہناتھا’’ہم فوج اور وزیر اعظم مودی کے ساتھ ہیں۔ ہم ایک مکمل جنگ چاہتے ہیں، ایک بار اور ہمیشہ کے لیے۔ ہم 1947 سے چل رہے ہیں، پھر 1965، 1971اور 1999میں۔ ہم کب تک پاکستانی گولہ باری کا شکار رہیں گے؟ صرف جنگ ہی ہمیں امن دے گی‘‘۔اگرچہ لوگ آہستہ آہستہ بین الاقوامی سرحد کے قریب اپنے گاؤں واپس جا رہے ہیں، لیکن سکول بند ہیں اور کھیتی باڑی کی
سرگرمیاں ابھی تک دوبارہ شروع نہیں ہوئی ہیں۔پرگوال-کھوڑ-گرکھل-چھمب پٹی میں 80 سے زیادہ گاؤں ہیں۔ گولہ باری سے 10 کلومیٹر تک گہرے علاقے متاثر ہوئے ہیں۔ نقصان وسیع ہے۔ ڈپٹی کمشنر جموں سچن کمار ویشیا نے بھی چھمب سیکٹر کا دورہ کیا تاکہ عوامی شکایات سنیں۔ انہوں نے کہا کہ حکومت متاثرہ لوگوں کے لیے تمام ضروری مدد اور اقدامات کو یقینی بنائے گی۔
